അവിഹിതബന്ധം പുറത്ത് പറയാതിരിക്കാന്‍ അമ്മ മകനെ വിഷം കൊടുത്തു കൊന്നു. മുനിയറ ഇല്ലിസിറ്റി വെച്ചുക്കരോട്ട് ബിജുവിന്റെ ഭാര്യ സുധയെ (39) ആണു മകന്‍ ആരോമലിനെ ചോറില്‍ വിഷം കലര്‍ത്തി കൊലപ്പെടുത്തിയ കേസില്‍ പോലീസ് അറസ്റ്റ് ചെയ്തത്. 2010 ഓഗസ്റ്റ് 29ന് ആയിരുന്നു സംഭവം.അമ്മയുടെ വഴിവിട്ട ബന്ധം പുറത്തുപറഞ്ഞതിന്റെ പേരില്‍ മകനെ കൊലപ്പെടുത്തുകയായിരുന്നുവെന്നു പൊലീസ് പറഞ്ഞു. 10 വയസ്സുകാരനായ ആരോമല്‍ മരിച്ചത് വിഷം ഉള്ളില്‍ ചെന്നാണെന്ന് പോസ്റ്റ്‌മോര്‍ട്ടം റിപ്പോര്‍ട്ടില്‍ ചൂണ്ടിക്കാട്ടിയിരുന്നുവെങ്കിലും കേസ് തെളിയിക്കാന്‍ കഴിഞ്ഞിരുന്നില്ല. വിഷം ഉള്ളില്‍ ചെന്നാണ് ആരോമല്‍ മരിച്ചതെന്നു രാസപരിശോധനാ ഫലം ഈയിടെ പുറത്തുവന്നതോടെയാണു കേസില്‍ വഴിത്തിരിവുണ്ടായത്. സുധയെയും മറ്റു കുടുംബക്കാരെയും അയല്‍വാസികളെയും ചോദ്യംചെയ്തതോടെ സുധ കുറ്റം സമ്മതിക്കുകയായിരുന്നു.
അയല്‍വാസിയായ യുവാവുമായുള്ള സുധയുടെ ബന്ധം ആരോമല്‍ ചിലരോടു പറഞ്ഞതില്‍ പ്രകോപിതയായ സുധ ആരോമലിനെ കൊലപ്പെടുത്തുകയായിരുന്നുവെന്നു പൊലീസ് പറഞ്ഞു. ഭര്‍ത്താവ് ബിജുവിന്റെ കുടുംബവീട്ടില്‍ നിന്നു വിഷം എടുത്തു സൂക്ഷിച്ച സുധ, വീട്ടില്‍ മറ്റാരുമില്ലാതിരുന്ന സമയത്തു മകനെ വിളിച്ചുവരുത്തി ചോറില്‍ കലര്‍ത്തി ഇറച്ചിക്കഷണവും ചേര്‍ത്തു നല്‍കുകയായിരുന്നുവെന്നു പൊലീസ് പറഞ്ഞു. വിഷം നല്‍കിയതിനു ശേഷം കുടുംബവീട്ടിലേക്കു പൊയ്‌ക്കൊള്ളാന്‍ സുധ നിര്‍ദേശിച്ചു. ആരോമല്‍ അവിടേക്കു പോയെങ്കിലും ഛര്‍ദിച്ചു തളര്‍ന്നുവീണു. തുടര്‍ന്ന് അടിമാലി താലൂക്ക് ആശുപത്രിയിലെത്തിച്ചെങ്കിലും മരിച്ചു.പ്രതിയെ ഇന്നു കോടതിയില്‍ ഹാജരാക്കും.