കതിരൂര്‍ മനോജ് വധക്കേസില്‍ സര്‍ക്കാര്‍ യുഎപിഎ നിയമം ദുരുപയോഗം ചെയ്യുകയാണെന്ന് സിപിഎം കണ്ണൂര്‍ ജില്ലാ സെക്രട്ടറി പി.ജയരാജന്‍. ദേശദ്രോഹികള്‍ക്കെതിരെ ചുമത്തുന്ന കുറ്റമാണ് സിപിഎം നേതാക്കള്‍ക്കെതിരെ ചുമത്തുന്നത്. കരിനിയമം ഉപയോഗിച്ച് സിപിഎമ്മിനെ വേട്ടയാടുകയാണ്. കോണ്‍ഗ്രസിലെ ക്രമിനില്‍ സംഘവും പോലീസിനൊപ്പം ചേര്‍ന്ന് സിപിഎമ്മിനെ വേട്ടയാടുന്നുണ്ട്.
കതിരൂര്‍ മനോജ് വധം അന്വേഷിക്കുന്ന പോലീസ് സിപിഎം പ്രവര്‍ത്തകരെ കള്ളക്കേസില്‍ കുടുക്കി മര്‍ദ്ദിക്കുന്നുവെന്ന് ആരോപിച്ച് തലശ്ശേരിയില്‍ സിപിഎം നടത്തുന്ന പ്രതിഷേധ മാര്‍ച്ച് ഉദ്ഘാടനം ചെയ്തു സംസാരിക്കുകയായിരുന്നു ജയരാജന്‍. ലോക്കപ്പ് മുറിയിലെ ക്രൂരമര്‍ദ്ദനത്തിലൂടെ കുപ്രസിദ്ധി നേടിയ ഡിവൈഎസ്പിയാണ് മനോജ് വധക്കേസും അന്വേഷിക്കുന്നത്. ചന്ദ്രശേഖരന്‍ വധക്കേസ് അന്വേഷണം നടത്തിയ ഉദ്യോഗസ്ഥനാണിയാള്‍.
കേസില്‍ പോലീസ് പ്രതിചേര്‍ത്ത പ്രഭാകരനെ അതിക്രൂരമായ മര്‍ദ്ദനമുറകള്‍ക്ക് ഇരയാക്കി. അടിയന്തരാവസ്ഥ കാലത്ത് കക്കയം ക്യാംപില്‍ നടന്നതിലും ക്രൂരമായ മര്‍ദ്ദനമാണ് ലോക്കപ്പില്‍ നടക്കുന്നത്. ലോക്കപ്പ് മര്‍ദ്ദനത്തിന്റെ പേരില്‍ പ്രഭാകരന്റെ ഭാര്യ കോടതിയെ സമീപിച്ചിട്ടുണ്ടെന്നും ജയരാജന്‍ പറഞ്ഞു.മനോജ് വധക്കേസില്‍ ആവേശം കൊണ്ട മാധ്യമപ്രവര്‍ത്തകര്‍ക്ക് കാസര്‍ഗോഡ് സിപിഎം പ്രവര്‍ത്തകന്‍ കൊല്ലപ്പെട്ടപ്പോള്‍ ആവേശം കണ്ടില്ലെന്നും ജയരാജന്‍ കുറ്റപ്പെടുത്തി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha