ഗവര്‍ണര്‍ പി. സദാശിവം വൈസ് ചാന്‍സലര്‍മാരുടെ യോഗം വിളിച്ചതിനെതിരെ കോണ്‍ഗ്രസും മുസ്ലീം ലീഗും പരസ്യമായി രംഗത്തെത്തി. ഗവര്‍ണര്‍ക്കെതിരെ മുഖ്യമന്ത്രി അമര്‍ഷം രേഖപ്പെടുത്തിയെങ്കിലും ഒന്നും പറഞ്ഞില്ല. അതേസമയം കോണ്‍ഗ്രസ് നേതാക്കള്‍ പരസ്യമായി രംഗത്തെത്തി.
സദാശിവത്തിനെതിരേ വിമര്‍ശനവുമായി കെപിസിസി വൈസ് പ്രസിഡന്റ് എം.എം.ഹസനാണ് ആദ്യം രംഗത്തെത്തിയത്. വൈസ് ചാന്‍സലര്‍മാരുടെ യോഗം വിളിച്ച ഗവര്‍ണറുടെ നടപടി ശരിയായില്ല എന്ന് ഹസന്‍ പറഞ്ഞു. 
ഗവര്‍ണറുടെ നടപടി സര്‍ക്കാരിന്റെ അധികാരത്തിന്മേലുള്ള കടന്നുകയറ്റമാണ്. ഗവര്‍ണര്‍ രൂപീകരിച്ച ചാന്‍സലേഴ്‌സ് കൗണ്‍സിലിന് യാതൊരു നിയമസാധുതയുമില്ല. മുന്‍പ് ഒരിക്കലും ഉണ്ടാകാത്ത കീഴ്‌വഴക്കമാണിതെന്നും ഇങ്ങനെപോയാല്‍ ഗവര്‍ണര്‍ മന്ത്രിസഭായോഗം വിളിക്കുമോയെന്നും അദ്ദേഹം ചോദിച്ചു. നിലവിലെ രാഷ്ട്രീയ സാഹചര്യത്തില്‍ ഗവര്‍ണറുടെ നടപടി രാഷ്ട്രീയ പ്രേരിതമാണോയെന്ന് സംശയമുണ്ടെന്നും എം.എം.ഹസന്‍ പറഞ്ഞു.
സദാശിവത്തിനെതിരെ വിമര്‍ശവുമായി യൂത്ത് ലീഗും രംഗത്തെത്തി. കേരളം കേന്ദ്ര ഭരണ പ്രദേശമല്ലെന്നും കേരളത്തില്‍ ജനാധിപത്യ സര്‍ക്കാരുണ്ടെന്നും ഗവര്‍ണര്‍ തിരിച്ചറിയണമെന്നു യൂത്ത് ലീഗ് സംസ്ഥാന പ്രസിഡന്റ് പി.എം. സാദിഖലി പറഞ്ഞു. 
അതേസമയം ഗവര്‍ണര്‍ ചാന്‍സലറാണെന്നും അതിനാല്‍ തന്നെ ചാന്‍സലര്‍ക്ക് കീഴിലുള്ള വൈസ് ചാന്‍സലര്‍മാരുടെ യോഗം വിളിച്ചതില്‍ ഒരു തെറ്റും ഇല്ലെന്നാണ് നിയമ വിദഗ്ദ്ധര്‍ പറയുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha