ഹ്രസ്വദൂരയാത്രയ്ക്കും മറ്റും വിളിച്ചാല്‍ വരാത്ത ഓട്ടോറിക്ഷക്കാര്‍ക്കെതിരെ നടപടിയുമായി മോട്ടോര്‍ വാഹന വകുപ്പ് രംഗത്ത്. യാത്രക്കാര്‍ പറയുന്ന സ്ഥലങ്ങളിലേക്കു കൃത്യമായി സവാരി പോകാത്തവരുടെ ലൈസന്‍സ് റദ്ദാക്കുന്നത് അടക്കമുള്ള നടപടി സ്വീകരിക്കാനാണ് മോട്ടോര്‍ വാഹനവകുപ്പ് തയാറെടുക്കുന്നത്.

ഗതാഗത വകുപ്പിന്റെ കണക്കുപ്രകാരം കേരളത്തില്‍ സര്‍വീസ് നടത്തുന്നത് 6,32,426 ഓട്ടോറിക്ഷകളാണ്. കൂടുതല്‍ ഓട്ടോറിക്ഷകളുള്ളത് മലപ്പുറത്ത് – 78,328 എണ്ണം. രണ്ടാം സ്ഥാനത്ത് തിരുവനന്തപുരം – 74,856 ഓട്ടോറിക്ഷകള്‍. ഏറ്റവും കുറവ് ഓട്ടോറിക്ഷയുള്ളത് വയനാട്ടിലും – 13,757 എണ്ണം. കൊല്ലം( 52,927), പത്തനംതിട്ട (25,489), ആലപ്പുഴ (29,212), കോട്ടയം (42,030 ), ഇടുക്കി (22,432 ), എറണാകുളം (59,936), തൃശൂര്‍ (61,595 ), പാലക്കാട് (45,914 ), കോഴിക്കോട് (53,395 ), കണ്ണൂര്‍ (47,469 ), കാസര്‍കോട് (25,067).

യാത്രക്കാരന്‍ പറയുന്ന സ്ഥലത്തേക്കു സവാരി പോകാന്‍ ഓട്ടോ ഡ്രൈവര്‍  വിസമ്മതിക്കുകയാണെങ്കില്‍ ഈ വാട്‌സാപ്പ് നമ്പറുകളിലൂടെ പരാതി നല്‍കാം. ഓട്ടോറിക്ഷയുടെ നമ്പര്‍ 8547639101 എന്ന നമ്പരിലേക്ക് വാട്‌സ് ആപ്പ് ചെയ്യുകയോ kl10@gmail.com എന്ന ഐഡിയിലേക്ക് മെയില്‍ ചെയ്യുകയോ ചെയ്യാം. ഏതു ജില്ലയില്‍നിന്നും ഈ നമ്പരിലേക്ക് വാട്‌സാപ്പ് സന്ദേശം അയയ്ക്കാം. ഈ നമ്പരില്‍ ലഭിക്കുന്ന പരാതികള്‍ ജില്ലകളിലേക്കു കൈമാറി അപ്പോള്‍ തന്നെ നടപടി സ്വീകരിക്കുമെന്നു ട്രാന്‍സ്‌പോര്‍ട്ട് കമ്മിഷണര്‍ കെ.പത്മകുമാര്‍ ഐപിഎസ് മനോരമ ഓണ്‍ലൈനോടു പറഞ്ഞു. 24 മണിക്കൂറിനുള്ളില്‍ നടപടിയുണ്ടാകുമെന്നാണു വകുപ്പ് പറയുന്നത്.