ശബരിമല യുവതീ പ്രവേശനത്തില് സി.പി.എം വനിതാ പ്രവര്ത്തകര് എതിരാണെന്ന് ചാനല് വാര്ത്ത നല്കിയതോടെ പ്രാദേശിക നേതാവ് റോസമ്മ വീഡിയോയിലൂടെ വിശദീകരണവുമായി രംഗത്തെത്തി
ശബരിമല യുവതീ പ്രവേശനത്തില് സി.പി.എം പ്രാദേശിക വനിതാ നേതാവ് എതിര്പ്പ് പ്രകടിപ്പിച്ചെന്ന രീതിയില് ചാനലുകള് വാര്ത്ത നല്കി. സംഭവം സോഷ്യല് മീഡിയ ഏറ്റെടുത്തതോടെ വനിതാ നേതാവ് റോസമ്മ വിശദീകരണവുമായി രംഗത്തെത്തി. സി.പി.എമ്മിന്റെ നേതൃത്വത്തില് സ്ത്രീ അവകാശ സംരക്ഷണ സംഗമം ഇന്ന് രാവിലെ പത്തനംതിട്ടയില് സംഘടിപ്പിച്ചതിനിടെയായിരുന്നു സംഭവം. പരിപാടിയില് പങ്കെടുക്കാനെത്തിയ സി.പി.എം പ്രാദേശിക നേതാവ് റോസമ്മയോട് യുവതീ പ്രവേശനത്തെ കുറിച്ച് ചാനല് പ്രവര്ത്തകന് അഭിപ്രായം ആരാഞ്ഞു, വിശ്വാസം ഉള്ളവര് പോകട്ടെ, അല്ലാത്തവര് പോകണ്ട എന്നായിരുന്നു പ്രതികരണം. എന്നാല് യുവതികള് മലകയറുന്നതിനെ വനിതാ സഖാക്കള് എതിര്ത്തു എന്ന രീതിയിലാണ് ചാനല് വാര്ത്ത നല്കിയത്.
സുപ്രീംകോടതി വിധിയെ സി.പി.എമ്മുകാരായ വനിതകള് തന്നെ എതിര്ക്കുന്നു എന്നും വാര്ത്ത വന്നതോടെയാണ് റോസമ്മ അടക്കമുള്ള നേതാക്കള് സോഷ്യല് മീഡിയയിലൂടെ വിശദീകരണവുമായി എത്തിയത്. ബി.ജെ.പിയും കോണ്ഗ്രസും പാര്ലമെന്റ് തെരഞ്ഞെടുപ്പ് മുന്നില് കണ്ട് വര്ഗീയധ്രുവീകരണം നടത്തുകയാണെന്ന് റോസമ്മ ആരോപിച്ചു. സി.പി.എം പ്രവര്ത്തകരായ വനിതകള് ശബരിമലയില് പോകരുതെന്ന് താന് പറഞ്ഞിട്ടില്ലെന്നും ഇവര് വ്യക്തമാക്കി. ഇവരുടെ വാക്കുകള് വളച്ചൊടിച്ച് ചാനല് നല്കിയതോടെ ബി.ജെ.പിയും കോണ്ഗ്രസും അത് മുതലെടുത്തു. സി.പി.എമ്മിലെ വനിതകള് കോടതിവിധിക്കെതിരാണ് എന്ന് കാട്ടിയാണ് ഇവര് റോസമ്മയുടെ പ്രതികരണം പ്രചരിപ്പിച്ചത്.
പത്തനംതിട്ട അടക്കമുള്ള മധ്യതിരുവിതാംകൂറില് മാത്രമാണ് നാമജപയാത്ര എന്ന പേരില് ശബരിമല കോടതി വിധിയുടെ പേരില് സര്ക്കാരിനെതിരെ പ്രതിഷേധം ഉയരുന്നത്. അത് പ്രതിരോധിക്കാനാണ് സി.പി.എം വനിതാ അവകാശ സംരക്ഷണ സംഗമങ്ങള് എല്ലാ ജില്ലകളിലും നടത്താന് തീരുമാനിച്ചത്. ഇന്ന് പത്തനംതിട്ടയില് നടന്ന സംഗമം പി.കെ ശ്രീമതി എം.പി ഉദ്ഘാടനം ചെയ്തു. സ്ത്രീകളുടെ വിശ്വാസം സംരക്ഷിക്കാന് സര്ക്കാര് ബാധ്യസ്ഥരാണെന്നും വിശ്വാസികളായ യുവതികള് ശബരിമലയില് ദര്ശനം നടത്തട്ടെയെന്നും പി.കെ ശ്രീമതി ടീച്ചര് പറഞ്ഞു.
https://www.facebook.com/Malayalivartha
