ബിജെപിയെ പിണക്കാതെ സിപിഎമ്മിനെ സുഖിപ്പിച്ച് അച്ഛനും മകനും; തമ്പ്രാക്കന്മാരുടെ അടിയന്മാരാകാന് ഇല്ലെന്ന് അച്ഛന് വെള്ളാപ്പള്ളി നടേശന് പറയുമ്പോള് അച്ഛന്റെ കാലുവാരി ആചാരാനുഷ്ഠാനങ്ങള്ക്കു വേണ്ടി പോരാടുമെന്ന് തുഷാര് വെള്ളാപ്പള്ളി; തുഷാര് വെള്ളാപ്പള്ളിയെ കേന്ദ്രത്തില് കയറ്റുകയും വേണം വെള്ളാപ്പള്ളിയ്ക്ക് കേസില് നിന്ന് ഊരുകയും വേണം; രണ്ടും തള്ളിക്കളഞ്ഞ് ശ്രീനാരായണീയര് അയ്യപ്പനൊപ്പം
ശബരിമല സ്ത്രീപ്രവേശന വിഷയത്തില് അച്ഛന് വെള്ളാപ്പള്ളി നടേശനും മകന് തുഷാര് വെള്ളാപ്പള്ളിയും രണ്ട് വഴിയിലേക്ക്. തമ്പ്രാക്കന്മാരുടെ അടിയന്മാരാകാന് ഇല്ലെന്ന് അച്ഛന് വെള്ളാപ്പള്ളി നടേശന് പറയുമ്പോള് അച്ഛന്റെ കാലുവാരി ആചാരാനുഷ്ഠാനങ്ങള്ക്കു വേണ്ടി പോരാടുമെന്ന് തുഷാര് വെള്ളാപ്പള്ളിയും പറയുന്നു. ഇതോടെ അച്ഛന്റേയും മകന്റേയും ഒത്തുകളി വീണ്ടും വെളിയിലാവുകയാണ്. മൈക്രോ ഫിനാന്സ് തട്ടിപ്പ് കേസില് നിന്നും ഊരാന് വെള്ളാപ്പള്ളി ശ്രമിക്കുമ്പോള് മകന് വെള്ളാപ്പള്ളി കേന്ദ്രത്തിലെത്താനാണ് നോക്കുന്നത്.
സ്ത്രീകള് ശബരിമലയില് പ്രവേശിക്കുന്നതിനെ സ്വാഗതം ചെയ്യുന്നില്ലെങ്കിലും സുപ്രീ കോടതിവിധി നടപ്പാക്കുന്നതിന്റെ പേരില് സംസ്ഥാന സര്ക്കാരിനെതിരെ നിലപാടെടുക്കില്ലെന്നും എന്.എസ്.എസ് അടക്കമുള്ള സംഘടനകള് നടത്തുന്ന പ്രതിഷേധങ്ങളോട് എതിര്പ്പാണുള്ളതെന്നും എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശന് വ്യക്തമാക്കി.
തമ്പ്രാക്കന്മാര് തീരുമാനിക്കുന്നത് അടിയാന്മാര് അനുസരിക്കണമെന്നതാണു ചിലരുടെ വാശിയെന്നും വെള്ളാപ്പള്ളി പറഞ്ഞു. സര്ക്കാരുമായി ചര്ച്ചയ്ക്കു തയാറാകാത്ത തന്ത്രികുടുംബത്തിന്റെയും പന്തളം കൊട്ടാരത്തിന്റെയും നിലപാടു ശരിയല്ലെന്നും വെള്ളാപ്പള്ളി കണിച്ചു കുളങ്ങരയിലെ വസതിയില് മാധ്യമങ്ങളോടു പറഞ്ഞു.
വീണ്ടുമൊരു വിമോചന സമരത്തിനുള്ള ശ്രമം പരാജയപ്പെടുത്തുമെന്നാണ് അദ്ദേഹം പറയുന്നത്. അതേസമയം യോഗം വൈസ് പ്രസിഡന്റ് കൂടിയായ തുഷാര് വെള്ളാപ്പള്ളി നേതൃത്വം നല്കുന്ന ബി.ഡി.ജെ.എസ് സമരരംഗത്ത് ശക്തമാകാനാണ് തീരുമാനിച്ചിരിക്കുന്നത്. അടിയന്തിര സംസ്ഥാന എക്സിക്യൂട്ടീവ് കമ്മിറ്റി ചേര്ന്നാണ് വിശ്വാസികള്ക്കൊപ്പം ഉറച്ചു നില്ക്കാനുള്ള പാര്ട്ടി നിലപാട് സ്വീകരിച്ചത്.
ഇതോടെ ചെങ്ങന്നൂര് ഉപതെരഞ്ഞെടുപ്പ് കാലത്തേതിനു സമാനമായ സാഹചര്യത്തിലേക്കാണ് നീങ്ങുന്നത്. ചെങ്ങന്നൂരില് എസ്.എന്.ഡി.പി യോഗം എല്.ഡി.എഫിനെയും ബി.ഡി.ജെ.എസ് എന്.ഡി.എയുമാണ് പിന്തുണച്ചത്. എന്.ഡി.എയുടെ ആഭിമുഖ്യത്തില് ഇന്ന് പന്തളത്തുനിന്ന് ആരംഭിക്കുന്ന ശബരിമല സംരക്ഷണ യാത്രയുടെ ഉദ്ഘാടന ചടങ്ങില് പങ്കെടുക്കുമെന്ന് ബി.ഡി.ജെ.എസ് പ്രസിഡന്റ് തുഷാര് വെള്ളാപ്പള്ളി പറഞ്ഞു. സി.കെ ജാനു അടക്കമുള്ള ഘടകകക്ഷി നേതാക്കള് പങ്കെടുക്കുമോയെന്ന് അറിയില്ല.
ലോങ് മാര്ച്ചോടെ 15ന് തിരുവനന്തപുരത്ത് സമാപിക്കുന്ന പ്രതിഷേധ പരിപാടിയില് പങ്കെടുക്കാന് ബി.ഡി.ജെ.എസ് പ്രവര്ത്തകര്ക്ക് നിര്ദ്ദേശം നല്കിയിട്ടുണ്ട്. എസ്.എന്.ഡി.പി യോഗത്തിന്റേത് വിശ്വാസികളുടെ താല്പര്യങ്ങള്ക്ക് വിരുദ്ധമായ നിലപാടല്ലെന്നും ഹിന്ദു സംഘടനകള് നടത്തുന്ന പ്രക്ഷോഭങ്ങളിലേക്ക് ആരും ക്ഷണിച്ചില്ലെന്ന അഭിപ്രായമാണ് ജനറല് സെക്രട്ടറി പങ്കുവച്ചിട്ടുള്ളതെന്നും തുഷാര് പറയുന്നു.
ലോക്സഭാ തെരഞ്ഞെടുപ്പ് മുന്നില് കണ്ട് എല്ലാ ജില്ലകളിലും സംഘടനാ സംവിധാനം ശക്തിപ്പെടുത്താനുള്ള പ്രവര്ത്തനങ്ങള് ആരംഭിക്കാനാണ് ബി.ഡി.ജെ.എസ് തീരുമാനം. ശബരിമല വിഷയം പാര്ട്ടി കാമ്പയിനാക്കാനും നീക്കമുണ്ട്.
ആലപ്പുഴ ജില്ലയില് ഏതാനും നേതാക്കള് ബി.ഡി.ജെ.എസ് വിട്ട് സി.പി.എമ്മില് ചേരാന് തീരുമാനിച്ചതും സംസ്ഥാന എക്സിക്യൂട്ടീവ് കമ്മിറ്റിയില് ചര്ച്ചാ വിഷയമായി. വിവിധ സമുദായ സംഘടനാ നേതാക്കള് നേതൃത്വം നല്കുന്ന ബി.ഡി.ജെ.എസിന് ശബരിമല പ്രശ്നത്തില് ബി.ജെ.പിയേക്കാള് കൂടുതല് ഹൈന്ദവ സമൂഹത്തില് സ്വാധീനം ചെലുത്താന് കഴിയുമെന്ന വിലയിരുത്തലും യോഗത്തില് മുതിര്ന്ന നേതാക്കള് പങ്കുവച്ചു.
https://www.facebook.com/Malayalivartha
