പിണറായിയിൽ മാനസിക വെല്ലുവിളി നേരിടുന്ന യുവാവിനെ ആക്രമിച്ച 11 പേര്‍ക്കെതിരെ കേസ്.ഉമ്മന്‍ ചിറയില്‍ നസീബ മന്‍സിലില്‍ മുഹമ്മദ് നബീല്‍ (24)ആണ് സദാചാര ആക്രമണത്തിനിരയായത്. ബന്ധുക്കളുടെ പരാതിയില്‍ ഉമ്മന്‍ച്ചിറ സ്വദേശികളായ ഷരീഫ്, അന്‍സാര്‍, ദില്‍സാര്‍, ഷഫാദ്, സാദിഖ് എന്നിവര്‍ക്കതിരെയും കണ്ടാലറിയാവുന്ന ആറ് പേര്‍ക്കെതിരെയുമാണ് കേസെടുത്തത്.

മാനസിക വെല്ലുവിളി നേരിടുന്ന യുവാവ് രാത്രി സമയങ്ങളില്‍ വീട്ടില്‍ നിന്ന് ഇറങ്ങി നടക്കുന്നത് പതിവാണെന്നും കണ്ടെത്തിയാല്‍ നാട്ടുകാര്‍ തിരികെ വീട്ടിലേക്ക് എത്തിക്കാറുണ്ടെന്നും ബന്ധുക്കള്‍ പറഞ്ഞു. ചൊവ്വാഴ്ച പുലര്‍ച്ചെ ഉമ്മന്‍ചിറയിലെ മറ്റൊരു വീടിന് സമീപത്ത് വെച്ച്‌ നബീലിനെ കണ്ട പതിനൊന്നംഗ സംഘം സദാചാര പൊലീസ് ചമഞ്ഞ് ചോദ്യം ചെയ്ത് മര്‍ദ്ദിക്കുകയായിരുന്നുവെന്നാണ് പരാതി.

നബീലിന്റെ നിലവിളി കേട്ടെത്തിയ പ്രദേശവാസികളും വീട്ടുകാരും ചേര്‍ന്നാണ് യുവാവിനെ തലശേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചത്. തുടര്‍ന്ന് അടിയന്തര ശാസ്ത്രക്രിയയ്ക്കും നബീലിനെ വിധേയനാക്കി. മര്‍ദ്ദനത്തില്‍ ജനനേന്ദ്രീയത്തിനും പരിക്കേറ്റിട്ടുണ്ട്. കൈവിരലുകള്‍ക്കും ഇടത് കൈയുടെയും എല്ലിനും പൊട്ടലുണ്ട്. സിഗരറ്റ് ഉപയോഗിച്ച്‌ പൊള്ളിച്ച പാടുമുണ്ടെന്ന് പരാതിയില്‍ പറയുന്നു. നട്ടെല്ലിന് ക്ഷതമേറ്റതിനാല്‍ ഒരു വര്‍ഷത്തേക്ക് വിശ്രമം വേണമെന്നാണ് ആശുപത്രി അധികൃതർ വ്യക്തമാക്കുന്നത്. പ്രതികള്‍ക്ക് വേണ്ടി അന്വേഷണം ആരംഭിച്ചു.