വിദ്യാര്ത്ഥികള്ക്കാവശ്യമായ സൗകര്യങ്ങള് ഉണ്ടെന്നുറപ്പിക്കാനായി ഹയര് സെക്കന്ഡറി സ്കൂളുകള്ക്ക് ഇനി പഞ്ചായത്ത് മേല്നോട്ടവും
ഹയര് സെക്കന്ഡറി സ്കൂളുകളില് ഇനി പഞ്ചായത്തുകളും നഗരസഭകളും പരിശോധന നടത്തും. വിദ്യാര്ഥികള്ക്കാവശ്യമായ സൗകര്യങ്ങള് ഉണ്ടെന്നുറപ്പിക്കുന്നതിനു വര്ഷം കുറഞ്ഞതു രണ്ടു തവണ പരിശോധന നടത്താനാണു തദ്ദേശ സ്ഥാപനങ്ങള്ക്കു നിര്ദേശം നല്കിയിരിക്കുന്നത്.
തങ്ങളുടെ പരിധിയിലുള്ള സര്ക്കാര്, എയ്ഡഡ് സ്കൂളുകളുകളിലും അണ് എയ്ഡഡ് സ്കൂളുകളിലും പരിശോധനയ്ക്കു തദ്ദേശ സ്ഥാപനങ്ങള്ക്ക് അധികാരമുണ്ടാകും. അധ്യയനസമയം വര്ധിപ്പിച്ചതോടെ വിദ്യാര്ഥിനികള് ഒട്ടേറെ ആരോഗ്യപ്രശ്നങ്ങള് നേരിടുന്നതായി പരാതിയുയര്ന്നിരുന്നു. ഹയര് സെക്കന്ഡറിയില് രാവിലെ ഒമ്പതു മുതല് വൈകിട്ട് 4.30 വരെയാണ് അധ്യയന സമയം.
ആരോഗ്യപ്രശ്നങ്ങള് ഒഴിവാക്കാനാവശ്യമായ ഇടപെടലുകള് ആവശ്യപ്പെട്ട് ഒരു വിഭാഗം വിദ്യാര്ഥിനികള് ഒന്നര വര്ഷം മുമ്പു ബാലാവകാശ സംരക്ഷണ കമ്മിഷനില് സമര്പ്പിച്ച പരാതിയുടെ അടിസ്ഥാനത്തിലാണു നടപടി.
ശുദ്ധമായ കുടിവെള്ളം, ആണ്കുട്ടികള്ക്കും പെണ്കുട്ടികള്ക്കും പ്രത്യേകം മൂത്രപ്പുര, കക്കൂസ് എന്നിവ സ്കൂള് നടത്തിപ്പിന് അംഗീകാരം നല്കുന്നതിനുള്ള മാനദണ്ഡങ്ങളുടെ ഭാഗമാക്കണമെന്നു കമ്മിഷന് നിര്ദേശിച്ചിരുന്നു. പെണ്കുട്ടികള്ക്കു നാപ്കിന് വെന്ഡിങ് യന്ത്രം, ഇന്സിനറേറ്റര് അല്ലെങ്കില് മാലിന്യം നിര്മാര്ജനം ചെയ്യുന്നതിനുള്ള സൗകര്യം എന്നിവയും മാനദണ്ഡമാക്കണമെന്ന് നിര്ദേശം ഉയര്ന്നിരുന്നു. ഇത്തരം സൗകര്യമില്ലാത്ത സ്കൂളുകള്ക്കെതിരേ കര്ശന നടപടി സ്വീകരിക്കണമെന്നും നിര്ദേശിച്ചിരുന്നു.
ഇവ എല്ലാ ഹയര് സെക്കന്ഡറി, വൊക്കേഷണല് ഹയര് സെക്കന്ഡറി സ്കൂളുകളിലും നടപ്പാക്കുന്നുണ്ടെന്ന് ഉറപ്പുവരുത്താനാണു തദ്ദേശ സ്ഥാപനങ്ങള് പരിശോധന നടത്തണ്ടത്. ആവശ്യമായ സൗകര്യങ്ങള് ലഭ്യമാക്കിയിട്ടില്ലെങ്കില് നടപടിയെടുക്കുന്നതു സംബന്ധിച്ച് ഉത്തരവില് പരാമര്ശമില്ല. കമ്മിഷന് നിര്ദേശിച്ച സൗകര്യങ്ങള് നടപ്പാക്കുന്നതില് പിന്നിലായ സര്ക്കാര് സ്കൂളുകളാകും പരിശോധന മൂലം വെട്ടിലാകുക.
https://www.facebook.com/Malayalivartha
