ചുവട്ടിലെ മണ്ണ് ഒലിച്ച് പോകുന്നു... പാര്ട്ടിക്കുള്ളിലും പരമ ഭക്തര് ഉണ്ടെന്ന് തിരിച്ചറിയാന് സിപിഎമ്മിനായില്ല; പാര്ട്ടിക്കാരുടെ വീട്ടില് നിന്നു പോലും ശരണം വിളി ഒരാവേശമായി ഏറ്റെടുത്തപ്പോള് ഏറെ വൈകിപ്പോയി; ശബരിമലയിലേക്ക് സ്ത്രീകളെ എത്തിക്കാന് സര്ക്കാരോ പാര്ട്ടിയോ ഇല്ലെന്ന് കോടിയേരി വ്യക്തമാക്കിയതിന്റെ പിന്നില്...
ശബരിമല വിഷയത്തില് കോടതി വിധി വന്നപ്പോള് ചെറിയ പ്രതിഷേധം ഉണ്ടാകുമെങ്കിലും പാര്ട്ടിക്കാര് അത് ഉള്ക്കൊള്ളുമെന്നാണ് സിപിഎം കരുതിയത്. എന്നാല് ഭക്തര്ക്ക് പാര്ട്ടിയില്ല എന്ന ആശയം മുന്നോട്ട് വന്നതോടെ ലോകത്തെല്ലായിടത്തും അതിന്റെ അലയൊലിയുണ്ടായി. ഭക്തരുടെ ഈ വികാരം ബിജെപിയും കോണ്ഗ്രസും നന്നായി മുതലെടുത്തു. ലക്ഷോപ ലക്ഷം ജനങ്ങള് പാര്ട്ടി നോക്കാതെ നാമജപ സമരത്തില് അണി ചേര്ന്നു.
പാര്ട്ടിക്കാര് ഭക്തര്ക്കെതിരെ തിരിയുമെന്നായിരുന്നു വിചാരം. എന്നാല് പ്രവര്ത്തകര് എല്ലാം മറന്ന് ഒരാപത്തു വന്നപ്പോള് ഒത്തു ചേര്ന്നു. എല്ലാം നടപ്പിലാക്കുന്നത് അമ്പലങ്ങളില് മാത്രമാണല്ലോ എന്ന വികാരം ശക്തിപ്പെട്ടു. ഇത്ര ധൃതിപിടിച്ച് സ്ത്രീകളെ ശബരി മലയില് കയറ്റുന്നതിനെതിരെ പാര്ട്ടിക്കര് നേതാക്കളോട് ചോദിച്ചു തുടങ്ങി. കുരിശിനെ വിശുദ്ധമാക്കി സംസാരിച്ചപ്പോള് തങ്ങളുടെ വികാരം മാനിച്ചില്ലെന്നാണ് പാര്ട്ടിക്കാരായ പലരും പറയുന്നത്.
നാമജപയാത്രയില് പല പാര്ട്ടിക്കാരും പങ്കെടുക്കുന്നതായാണ് വ്യക്തമായത്. പ്രത്യേകിച്ചും സ്ത്രീകള് ആവേശത്തോടെയാണ് പങ്കെടുക്കുന്നത്. ലോക്സഭാ തെരഞ്ഞെടുപ്പ് അടുത്തിരിക്കുന്ന ഈ സമയത്ത് പാര്ട്ടിക്കാരുടെ കൊഴിഞ്ഞ് പോക്ക് ഒട്ടും ആശാവഹമല്ല. അതിനാലാണ് പാര്ട്ടി സംസ്ഥാന സെക്രട്ടറി കോടിയേരി ബാലകൃഷ്ണന് തന്നെ രംഗത്തെത്തിയത്.
രണ്ടാം വിമോചന സമരത്തിനു ചിലര് കോപ്പുകൂട്ടുന്നതായും ശബരിമ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് പറഞ്ഞു. ശബരിമല വിഷയത്തില് രണ്ടു മാസം നീണ്ടുനില്ക്കുന്ന പ്രചാരണ പ്രവര്ത്തനങ്ങള് സംഘടിപ്പിക്കാനാണ് സിപിഎം ന്റെ തീരുമാനം. തിരുവനന്തപുരത്തെ പാര്ട്ടി അംഗങ്ങള്ക്കുള്ള റിപ്പോര്ട്ടിങ്ങിലാണ് കോടിയേരി ഇക്കാര്യത്തില് വ്യക്തമാക്കിയത്.
പ്രകോപനപരമായ നിലപാടു പാടില്ലായെന്നും കോടതി വിധി പഠിച്ച ശേഷം ജനങ്ങളെ സമീപിക്കണമെന്നും കോടിയേരി നിര്ദ്ദേശം നല്കി. യുവതീ പ്രവേശന വിവാദത്തില് സൂക്ഷിച്ചുനീങ്ങാന് സര്ക്കാരിനു സിപിഎം നേരത്തെ തന്നെ ഉപദേശം നല്കിയിട്ടുണ്ടായിരുന്നു.
വിശ്വാസികളെ പാര്ട്ടിക്കും സര്ക്കാരിനുമെതിരാക്കാനുള്ള ശ്രമങ്ങള് നടക്കുന്നുണ്ടെന്നും ആ കെണിയില് പെട്ടുപോയവരുമുണ്ടെന്നും അദ്ദേഹം വെളിപ്പെടുത്തി. സമയമെടുത്തും ക്ഷമാപൂര്വവും തെറ്റിദ്ധാരണകളകറ്റാന് നോക്കണമെന്നാണു സിപിഎം സംസ്ഥാനകമ്മിറ്റിയുടെ നിര്ദേശം.
ശബരിമലയിലേക്കു സ്ത്രീകളെ എത്തിക്കാന് സര്ക്കാരോ പാര്ട്ടിയോ ഇല്ല, എന്നാല് വിധി നടപ്പാക്കുന്നതില് നിന്നു പാര്ട്ടി നേതൃത്വം നല്കുന്ന സര്ക്കാരിനു പിന്നോട്ടുപോകാന് കഴിയില്ലെന്നും അദ്ദേഹം വ്യക്തമാക്കി.
https://www.facebook.com/Malayalivartha