ബിഷപ്പ് ഫ്രാങ്കോ മുളയ്ക്കലിന് ഹൈക്കോടതി ജാമ്യം അനുവദിച്ചത് പരാതിക്കാരിയായ കന്യാസ്ത്രീയേയും അവര്‍ക്കൊപ്പമുള്ള കന്യാസ്ത്രീകളെയും വിശ്വാസികളെയും ഞെട്ടിച്ചു. അതേസമയം കന്യാസ്ത്രീക്കൊപ്പമുള്ള സിസ്റ്റര്‍ ടീന പറയുന്നത് സ്വാഭാവികമായ ജാമ്യമാണെന്നാണ് അറിയുന്നത്. എന്നാല്‍ പ്രോസിക്യൂഷന്‍ ജാമ്യാപേക്ഷയെ എതിര്‍ത്തു എന്നത് ശ്രദ്ധേയമാണ്. അന്വേഷണം പൂര്‍ത്തിയാകാത്തതിനാല്‍ പ്രതികളെ സ്വാധീനിക്കാനും തെളിവുകള്‍ നശിപ്പിക്കാനും സാക്ഷികളെ കയ്യിലെടുക്കാനും സാധ്യതയുണ്ടെന്ന് പ്രമുഖ അഭിഭാഷകയായ ആശ ഉണ്ണിത്താന്‍ അഭിപ്രായപ്പെട്ടു. ബിഷപ്പ് കേരളത്തില്‍ വരരുതെന്ന് നിര്‍ദ്ദേശമുണ്ടെങ്കിലും റിമാന്‍ഡില്‍ കഴിയവെ തന്നെ കേസ് അട്ടിമറിക്കാനുള്ള നീക്കം ബിഷപ്പ് നടത്തിയിരുന്നതായി ആരോപണമുണ്ട്. പലരും കൂറുമാറിയത് അതിന് ഉദാഹരണമുണ്ടെന്നും അഭിഭാഷക പറഞ്ഞു.

ജാമ്യം പുന:പ്പരിശോധിക്കാന്‍ ഹര്‍ജി സര്‍ക്കാര്‍ നല്‍കണമെന്ന് അഡ്വ. ആശ ഉണ്ണിത്താന്‍ ഉള്‍പ്പെടെയുള്ളവര്‍ ആവശ്യപ്പെട്ടിട്ടുണ്ട്. സാധാരണ ഒരാള്‍ക്ക് ജാമ്യം നല്‍കിയാല്‍ കേരളം വിട്ടുപോകാനാണ് അനുവദിക്കാത്തത്. ഇത് ഫ്രാങ്കോയെ ജലന്ദറില്‍ യഥേഷ്ടം വിഹരിക്കാനാണ് കൂടുതുറന്ന് കോടതി വിട്ടതെന്നും ആക്ഷേപമുണ്ട്. ബിഷപ്പ് കേരളത്തിലില്ലെങ്കിലും പണവും സ്വാധീനവും ഉപയോഗിച്ച് കേസ് അട്ടിമറിക്കാന്‍ നീക്കം നടത്തുമെന്ന് ഉറപ്പാണ്. റിമാന്‍ഡില്‍ കഴിഞ്ഞപ്പോഴും അത് നടന്നിരുന്നു. അതിനാല്‍ പ്രോസിക്യൂഷന്‍ ജാമ്യം പുന:പരിശോധിക്കാന്‍ ഹര്‍ജി നല്‍കണമെന്നാണ് ആവശ്യം.

അതേസമയം സര്‍ക്കാര്‍ അതിന് മുതിരില്ലെന്ന് ഉറപ്പാണ്. കാരണം ബിഷപ്പിനെ അറസ്റ്റ് ചെയ്തത് തന്നെ കത്തോലിക്കാ സഭകളെ ചൊടിപ്പിച്ചിരുന്നു. മാത്രമല്ല ശബരിമല വിഷയത്തില്‍ ഹിന്ദുസമൂഹമാകെ സര്‍ക്കാരിനെതിരെ തിരിഞ്ഞിരിക്കുകയാണ്. സുന്നിപ്പള്ളികളില്‍ സ്ത്രീകളെ പ്രവേശിപ്പിക്കണമെന്ന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും മന്ത്രി കെ.ടി ജലീലും ആവശ്യപ്പെട്ടത് വിവാദമായിരുന്നു. സുന്നിപ്പള്ളികളിലെ കാര്യം അവര്‍ നോക്കിക്കൊള്ളുമെന്ന് കുഞ്ഞിലിക്കുട്ടിയും വിശ്വാസികളുടെ കാര്യത്തില്‍ അവിശ്വാസിയായ കോടിയേരി എന്തിന് ഇടപെടുന്നെന്ന് മുസ്്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദും ചോദിച്ചിരുന്നു. ഇത്തരം സംഭവങ്ങളുടെ പശ്ചാത്തലത്തില്‍ വീണ്ടും ക്രൈസ്തവ സഭകളെ ചൊടിപ്പിക്കാന്‍ സര്‍ക്കാര്‍ തയ്യാറാകില്ലെന്നാണ് അറിയുന്നത്.