ദിലീപ് അമ്മയില് നിന്ന് രാജിവെച്ചു, രേവതിയുടെ ആരോപണങ്ങള് തേജോവധം ചെയ്യാന്, മോഹന്ലാലിനെതിരെ ആരോപണം ഉന്നയിച്ചവര്ക്കെതിരെ നടപടിയുണ്ടാവും, മീ ടൂ നല്ലതാണ് പക്ഷെ, ആരാണ്? എപ്പോഴാണ്, എവിടെയാണ് സംഭവിച്ചതെന്ന് തുറന്ന് പറയണം, അല്ലാത്തവര്ക്കെതിരെ നടപടിയുണ്ടാകും
ദിലീപ് താരസംഘടനയായ അമ്മയില് നിന്ന് രാജിവെച്ചെന്ന് സെക്രട്ടറി സിദ്ദിഖ്. ഈമാസം 10നാണ് രാജികത്ത് നല്കിയത്. മോഹന്ലാല് ദിലീപുമായി സംസാരിച്ചപ്പോള് ഞാന് സംഘടനയുമായി സഹകരിക്കുന്നത് ആര്ക്കെങ്കിലും ഇഷ്ടമല്ലെങ്കില് രാജിവയ്ക്കുകയാണെന്ന് അറിയിച്ചു. ഇത് മനസിലാക്കിയാണ് വിമന് ഇന് കളക്ടീവ് കഴിഞ്ഞദിവസം പത്രസമ്മേളനം നടത്തിയത്. സംഘടനയിലുള്ള മൂന്ന് നടിമാര് പ്രസിഡന്റ് മോഹന്ലാലിനെതിരെ പരസ്യമായി ആരോപണം ഉന്നയിച്ചതിനാല് നടപടിയുണ്ടാകും. ആരോപണം ഉന്നയിച്ചയാള് 24 വര്ഷമായി സംഘടനയുടെ ജനറല്ബോഡിയില് പങ്കെടുത്തിട്ടില്ലെന്നും സിദ്ധിഖ് വ്യക്തമാക്കി.
ഏതെങ്കിലും മൂന്ന് നടിമാര് തീരുമാനിച്ചാല് മമ്മൂട്ടിയേയും മോഹന്ലാലിനേയും ദിലീപിനേയും ജനങ്ങളുടെ മനസില് നിന്ന് പറിച്ചെറിയാനാകില്ല. ആരോപണ വിധേയരുടെ പ്രോജക്ടുകള് ആമീര്ഖാനും അക്ഷയ്കുമാരും ഉപേക്ഷിച്ചെന്നാണ് ഇവര് പറയുന്നത്. അങ്ങനെയെങ്കില് അവര് രണ്ടും ചെയ്തത് തെറ്റാണ്. ഒരാളുടെ ജോലി തടസപ്പെടുത്തുന്നതിനോട് സംഘടനയ്ക്ക് ജോയിപ്പില്ല. ആമീറിനും അക്ഷയ്കുമാറിനെതിരെയും ഇതേ ആരോപണം ഉണ്ടായാല് അവര് പ്രോജക്ട് ഉപേക്ഷിക്കുമോ എന്നും സിദ്ധിഖ് ചോദിച്ചു. ചിലര് നടിമാര് പറഞ്ഞാല് ദിലീപിനെ അഭിനയിപ്പിക്കാതിരിക്കാനും പറഞ്ഞാല് അഭിനയിപ്പിക്കാനും പറ്റില്ല. മീ ടൂ ക്യാമ്പയിന് നല്ലതാണ്. എന്നാല് അത് മറ്റാരേയും തേജോവധം ചെയ്യാനാകരുത്. വെളിപ്പെടുത്തല് നടത്തുമ്പോള് ആര്, എപ്പോള്, എവിടെ നടന്നെന്ന് വ്യക്തമാക്കണം.
കഴിഞ്ഞദിവസം ഒരു നടി പറഞ്ഞത് 25 വര്ഷം മുമ്പ് രാത്രി ഒരു പെണ്കുട്ടി കരഞ്ഞുകൊണ്ട് തന്റെ റൂമില് അഭയം തേടിയെന്നാണ്, അത് ഏത് സിനിമയുടെ സെറ്റില്, ആരാണ് സംവിധായകന്, നിര്മാതാവ് എന്ന് വ്യക്തമാക്കണം. ഞങ്ങള് അന്വേഷിക്കാമെന്നും സിദ്ധിഖ് പറഞ്ഞു. പെണ്കുട്ടിയുടെ പേര് പറയേണ്ട. സിനിമയുടെ തുടക്കകാലത്ത് ഒരുപാട് പീഡനം നേരിടേണ്ടി വന്നെന്ന് മറ്റൊരു നടി പറഞ്ഞു. ശരിയായിരിക്കാം തുടക്കകാലത്ത് അങ്ങനെ സംഭവിച്ചിരിക്കാം. എങ്കില് ഇപ്പോള് പറയൂ... ആരാണ് പീഡിപ്പിച്ചത്. അവര്ക്കെതിരെ ക്രിമിനല്ക്കേസെടുക്കാം. അങ്ങനെ ചെയ്യുന്നതിന് പകരം ആര്ക്കെങ്കിലുമെതിരെ ആരോപണം ഉന്നയിക്കുന്നവര്ക്കെതിരെ നടപടിയുണ്ടാകും. അത് അമ്മയും ഫെഫ്കയും ഫിയോക്കും മറ്റ് സംഘടനകളും ആലോചിച്ച് തീരുമാനിക്കും.
അമ്മ മൗനം തുടര്ന്നത് ആരെയും ഭയന്നല്ല, പലതിനും മറുപടി പറയേണ്ടെന്ന് തോന്നിയതിനാലാണ്. മൂന്ന് നടിമാരുടെ ആവശ്യം ദിലീപിനെ പുറത്താക്കണമെന്നാണ്. ദിലീപിനെ എക്സിക്യൂട്ടീവ് കമ്മിറ്റി പുറത്താക്കിയാണ്. 280 അംഗങ്ങള് ചേര്ന്ന ജനറല്ബോഡിയാണ് ആ തീരുമാനം മരവിപ്പിച്ചത്. ജനറല് ബോഡി തീരുമാനം മറികടക്കാന് എക്സിക്യൂട്ടീവ് കമ്മിറ്റിക്ക് കഴിയില്ല. വിമന് ഇന് കളക്ടീവ് സംഘടനയിലുള്ളവരെ ജനങ്ങള് തെറിവിളിക്കുന്നത് നിയന്ത്രിക്കാന് മമ്മൂട്ടിക്കും മോഹന്ലാലിനും ആവില്ല. ജനങ്ങളുടെ പ്രതികരണമാണത്. ഞാന് എന്തെങ്കിലും തെറ്റായി പറഞ്ഞാല് ജനംപ്രതികരിക്കും. അത് ഞാന് മനസിലാക്കുകയാണ് വേണ്ടത്. കലാകാരന്മാരുടെ ഓരോ വാക്കും പ്രവര്ത്തിയും സമൂഹം ശ്രദ്ധിക്കും അതിനാല് സൂക്ഷിച്ചേ സംസാരിക്കാവൂ എന്നും സിദ്ധിഖ് പറഞ്ഞു. നടിമാരാരും പള്സര് സുനിക്കെതിരെ ആരോപണം ഉന്നയിക്കാത്തതെന്തെന്നും സിദ്ധിഖ് ചോദിച്ചു.
https://www.facebook.com/Malayalivartha
