ദിലീപിനെ പുറത്താക്കുന്നതിനെ ചൊല്ലി അമ്മയില് അഭിപ്രായഭിന്നതയും പൊട്ടിത്തറിയും, ഞാന് പിടിച്ച മുയലിന് രണ്ട് കൊമ്പെന്ന നിലപാടില് ജഗദീഷും സിദ്ധിഖും, താമസിക്കാതെ ചില നടിമാര് ദുരനുഭവങ്ങള് വെളിപ്പെടുത്തും അത് കാര്യകാരണ സഹിതമായിരിക്കും
താരസംഘടനയായ അമ്മയില് പൊട്ടിത്തെറി. നടിമാരുടെ പരാതി അനുഭാവപൂര്വം പരിഗണിക്കണമെന്ന മോഹന്ലാലിന്റെയും ജഗദീഷിന്റെയും തീരുമാനത്തിനെതിരെ സിദ്ധിഖും മുകേഷും ഗണേഷ്കുമാറും അടക്കമുള്ളവര് കൈകോര്ത്തെന്നാണ് സൂചന. വിശാല ജനറല് ബോഡി താമസിക്കാതെ വിളിക്കുമെന്ന് ജഗദീഷ് വാര്ത്താക്കുറിപ്പ് ഇറക്കിയതിന് പിന്നാലെ അതിനെ അപ്പാടെ തള്ളിപ്പറഞ്ഞുകൊണ്ട് സിദ്ധിഖ് വാര്ത്താസമ്മേളനം നടത്തിയത് അതിനാലാണ്. ദിലീപുമായി ഏറെ അടുപ്പമുള്ള സിദ്ധിഖും കെ.പി.എ.സി ലളിതയും ചേര്ന്നാണ് മാധ്യമങ്ങളെ കണ്ടത് എന്നതും ശ്രദ്ധേയം. അതേസമയം വക്താവായ താന് പറയുന്നതാണ് അമ്മയുടെ യഥാര്ത്ഥ നിലപാടെന്ന് ജഗദീഷും പറയുമ്പോള് ഇവരെല്ലാം തമ്മില് ശക്തമായ അഭിപ്രായഭിന്നത നിലനില്ക്കുകയാണെന്ന് വ്യക്തം.
തങ്ങളുമായി ഒരുതരത്തിലുമുള്ള അനുരഞ്ജനവും ഇനിയില്ലെന്ന് സിദ്ധിഖും അങ്ങനെയല്ലെന്ന് ജഗദീഷും വ്യക്തമാക്കിയതിനാല് ഇതില് ഏതാണ് നിലപാടെന്ന് അവര് തന്നെ പറയട്ടെ എന്ന നിലപാടിലാണ് വിമന് ഇന് കളക്ടീവ്. രാജിവെച്ച നടിമാരെ തിരിച്ചെടുക്കില്ലെന്നും മാപ്പ് പറഞ്ഞ ശേഷം സംഘടനയിലേക്ക് മടക്കിവരാമെന്നുമുള്ള കെ.പി.എ.സി ലളിതയുടെ പ്രസ്താവനയ്ക്കെതിരെ താമസിക്കാതെ വിമന് ഇന് കളക്ടീവ് രംഗത്തെത്തും. അത് പോലെ മീ ടൂ വെളിപ്പെടുത്തലുകളും ഉണ്ടാകുമെന്നാണ് അറിയുന്നത്. ആര്, എപ്പോള്, എവിടെ വെച്ച് പീഡിപ്പിച്ചു, അല്ലെങ്കില് മോശമായി പെരുമാറി എന്നൊക്കെ കൃത്യമായി പറയാതെ മറ്റുള്ളവരെ തേജോവധം ചെയ്യുന്നത് ശരിയല്ല. അങ്ങനെ സംഭവിച്ചാല് മീ ടു ക്യാമ്പയിന്റെ ഉദ്ദേശശുദ്ധിതന്നെ ഇല്ലാതാകുമെന്നും സിദ്ധിഖ് പറഞ്ഞതിന് വ്യക്തമായ മറുപടി കൊടുക്കാനാണ് വിമന് ഇന് കളക്ടീവ് തീരുമാനം എന്നറിയുന്നു.
പ്രമുഖ നടന്മരില് നിന്നും സംവിധായകരില് നിന്നും നേരിടേണ്ടിവന്ന ദുരനുഭവങ്ങള് ഡബ്ള്യൂ.സി.സിയിലെ ചില അംഗങ്ങള് കാര്യകാരണസഹിതം വെളിപ്പെടുത്തുമെന്നാണ് സൂചന. കുറേ നാളുകളായി മലയാളസിനിമയുടെ അന്തരീക്ഷത്തില് അതിനുള്ള മേഘങ്ങള് ഉരുണ്ട് കൂടിയിട്ടുണ്ട്. അതൊന്ന് പെയ്ത് കാണാന് വിമന് ഇന്കളക്ടീവിനെ മുന്നിര്ത്തി കളിക്കുന്ന ചിലരും പലരും ചവിട്ടിമെതിച്ച് , ഒതുക്കിയിട്ടിരിക്കുന്ന ചില നടന്മാരും നടിമാരും ആഗ്രഹിക്കുന്നുണ്ട്. അതിന്റെ ഭാഗമായാണ് അമ്മ ജനറല്ബോഡി യോഗത്തിലെ സംഭാഷണങ്ങള് മാധ്യമപ്രവര്ത്തകര്ക്ക് വാട്സാപ്പ് സന്ദേശമായി അയച്ചത്. സുകുമാരനെയും തിലകനെയും വിനയനെയും ക്യാപ്ടന്രാജുവിനെയും ഉള്പ്പെടെ പലരെയും ഒതുക്കിയ അമ്മയോട് കുറ്റാരോപിതനായ ദിലീപിനെ പുറത്താക്കണമെന്ന് ആവശ്യപ്പെട്ടപ്പോള് ഉണ്ടായ പൊട്ടിത്തെറി കാലം കരുതിവെച്ചതാകാമെന്നാണ് സിനിമയിലുള്ള ചില സുമനസുകള് പറയുന്നത്.
https://www.facebook.com/Malayalivartha
