കുടുംബശ്രീയിലെ എല്ലാ സ്ത്രീകള്‍ക്കും ഇനി അനായാസം പത്താം ക്ലാസ് യോഗ്യത നേടാം. സാക്ഷരതാ മിഷന്‍ 'സമ' എന്ന പുതിയ പദ്ധതി ആവിഷ്‌കരിക്കുന്നു. ഈ പദ്ധതി പ്രകാരം ഇനി മുതല്‍ കുടുംബശ്രീയിലെ എല്ലാ സ്ത്രീകള്‍ക്കും പത്താം ക്ലാസ് യോഗ്യത നേടിയെടുക്കാം. ഒരു വാര്‍ഡില്‍ 30 ല്‍ കൂടുതല്‍ സ്ത്രീകള്‍ പഠിതാക്കളായുണ്ടെങ്കില്‍ വാര്‍ഡ് അടിസ്ഥാനത്തില്‍ ക്ലാസുകള്‍ സംഘടിപ്പിക്കും. 30 ല്‍ കുറവാണെങ്കില്‍ ജില്ലയിലെ സാക്ഷരതാമിഷന്റെ പൊതു ക്ലാസില്‍ വെച്ചാകും ക്ലാസ് നടത്തുക.

സാക്ഷരതാ മിഷനില്‍ നിന്നുള്ള മറ്റധ്യാപകര്‍ക്കൊപ്പം കുടുംബശ്രീയില്‍ തന്നെയുള്ള അധ്യാപക യോഗ്യതയുള്ളവരെയും പഠനത്തില്‍ സഹായികളായി നിയമിക്കും. നവംബറില്‍ റജിസ്‌ട്രേഷന്‍ ആരംഭിക്കുന്ന സമയില്‍ 17 വയസ്സ് കഴിഞ്ഞ ആര്‍ക്കും രജിസ്റ്റര്‍ ചെയ്യാം. ആഴ്ചയിലെ ഒഴിവുദിവസങ്ങളിലായിരിക്കും ക്ലാസ്. പത്താംതരം വിജയിച്ചിട്ടില്ലാത്ത കുടുംബശ്രീയിലെ വനിതകളുടെ കണക്കെടുപ്പ് ആരംഭിച്ചു കഴിഞ്ഞു.