പമ്പയിലേക്ക് പോയ വനിതകളെ മുതിര്ന്ന ഭക്തകള് ബസില് നിന്ന് ബലമായി പിടിച്ചിറക്കിയതോടെ നിലയ്ക്കലില് സംഘര്ഷാവസ്ഥ ശക്തം, രണ്ട് ബറ്റാലിയന് വനിതാ പൊലീസിനെ വൈകുന്നേരത്തോടെ വിന്യസിക്കും, ഇതിനെ ശബരിമല ആചാരസംരക്ഷണ സമിതി എങ്ങനെ നേരിടുമെന്ന് കാത്തിരുന്ന് കാണാം
പമ്പയിലേക്ക് പോയ വനിതാ മാധ്യമപ്രവര്ത്തകരെയും ജേര്ണലിസം വിദ്യാര്ത്ഥിനികളെയും വിശ്വാസികളായ വനിതകള് ബസില് നിന്ന് ഇറക്കിവിട്ടതിനെ തുടര്ന്ന് നിലയ്ക്കലില് ഉള്പ്പെടെ കൂടുതല് വനിതാ പൊലീസിനെ വിന്യസിക്കാന് സര്ക്കാര് തീരുമാനിച്ചു. രണ്ട് കമ്പനി ബെറ്റാലിയനെ ഇന്ന് വൈകുന്നേരത്തോടെ നിലയ്ക്കലിലും എരുമേലിയിലും പമ്പയിലും അടക്കം വിന്യസിക്കും. ഇതോടെ വിശ്വാസികളുടെ വാഹനം തടഞ്ഞ് പരിശോധിക്കുന്നതും കെ.എസ്.ആര്.ടി.സി ബസില് നിന്ന് ഉള്പ്പെടെ ബലമായി പിടിച്ചിറക്കുന്നതും തടയാനാകുമെന്ന് കരുതുന്നു. എന്നാല് കൂടുതല് ഭക്തര് പ്രദേശത്തേക്ക് എത്തുന്നതോടെ ഇവിടങ്ങളിലെല്ലാം സംഘര്ഷം ഉണ്ടാകുമെന്ന് ഉറപ്പാണ്. ഇതിനെ എങ്ങനെ നിയന്ത്രിക്കുമെന്നത് ഏറെ ശ്രമകരമായ ജോലിയാണ്.
ശബരിമല ആചാര സംരക്ഷണ സമിതിയുടെ നേതൃത്വത്തിലാണ് നിലയ്ക്കലില് പര്ണശാല കെട്ടി പ്രതിഷേധം നടത്തുന്നത്. ഇവരാണ് അയ്യപ്പഭക്തരുടെ വാഹനങ്ങള് തടയുന്നത്. കോടതി ഉത്തരവ് നടപ്പാക്കുമെന്ന് സര്ക്കാര് ആവര്ത്തിച്ച് വ്യക്തമാക്കിയതിന് പിന്നാലെയാണ് ഭക്തര് സമരം ശക്തമാക്കിയത്. സമരക്കാര്ക്ക് പിന്തുണയുമായി പുരുഷന്മാരുണ്ടെങ്കിലും അവര് വാഹനങ്ങള് തടയാനോ മറ്റ് പ്രതിഷേധങ്ങള്ക്കൊ തയ്യാറായില്ല. പമ്പയിലെ എഡ് പോസ്റ്റില് ഇന്ന് ഉച്ചവരെയും വനിതാ പൊലീസിനെ വിന്യസിച്ചിട്ടില്ല. സ്വകാര്യവാഹനങ്ങള്ക്ക് നിലയ്ക്കല് വരെയെ പ്രവേശനമുള്ളൂ. അവിടെ നിന്ന് കെ.എസ്.ആര്.ടി.സി ബസില് ഭക്തരെ പമ്പയിലെത്തിക്കും.
അതേസമയം ശബരിമലയില് യുവതികള്ക്ക് പ്രവേശനമില്ലെന്ന ബോര്ഡ് പമ്പയില് നിന്ന് ദേവസ്വം ബോര്ഡ് ഇതുവരെ നീക്കം ചെയ്തിട്ടില്ല എന്നതും ശ്രദ്ധേയമാണ്. നാളെ രാവിലെ അഞ്ചരയ്ക്കാണ് നടതുറക്കുന്നത്. ദര്ശനം നടത്തുന്നതിനായി അന്യസംസ്ഥാനത്ത് നിന്ന് നിരവധി ഭക്തര് പമ്പയില് എത്തിയിട്ടുണ്ട്. ഇവരെ നാളെ രാവിലെ മുതല് സന്നിധാനത്തേക്ക് കയറ്റിവിടും.
https://www.facebook.com/Malayalivartha
