തങ്ങളെ ചര്‍ച്ചയ്ക്ക് വിളിച്ചിട്ട് ഉന്നയിച്ച ഒരുകാര്യവും അംഗീകരിക്കാത്ത ദേവസ്വം ബോര്‍ഡിന്റെ നിലപാട് ദു: ഖകരമാണെന്ന് പന്തളം രാജകുടുംബ പ്രതിനിധി ശശികുമാരവര്‍മ്മ മാദ്ധ്യമങ്ങളോട് പറഞ്ഞു. ശബരിമലയെ യുദ്ധക്കളമാക്കാന്‍ ആഗ്രഹമില്ലെന്നും അദ്ദേഹം പറഞ്ഞു. 1991ലെ ഹൈക്കോടതി വിധി നിലനില്‍പ്പുണ്ട്, അതിനാല്‍ ശബരിമലയില്‍ തല്‍സ്ഥിതി തുടരണമെന്ന് തങ്ങള്‍ ആവശ്യപ്പെട്ടു. സുപ്രീംകോടതി വിധിക്കെതിരെ ഇന്ന് തന്നെ റിവ്യൂഹര്‍ജി നല്‍കണമെന്നും പറഞ്ഞു. 19ന് ചേരുന്ന ബോര്‍ഡ് യോഗം അക്കാര്യം ചര്‍ച്ച ചെയ്യാണമെന്ന് പറഞ്ഞതല്ലാതെ ഉറപ്പൊന്നും നല്‍കിയില്ലെന്നും ശശികുമാര വര്‍മ പറഞ്ഞു.

മുഖ്യമന്ത്രി വിളിച്ച ചര്‍ച്ചയില്‍ ശശികുമാര വര്‍മയും തന്ത്രി കുടുംബംഗങ്ങളും പങ്കെടുത്തിരുന്നില്ല. അതിന് ശേഷമാണ് ദേവസ്വം ബോര്‍ഡ് ഇവരെ ചര്‍ച്ചയ്ക്ക് വിളിച്ചത്. മുഖ്യമന്ത്രി ഔദ്യോഗികമായി ചര്‍ച്ചയ്ക്ക് വിളിച്ചിട്ടില്ലെന്ന് പന്തളം കൊട്ടാരത്തിലെ പി.രാമവര്‍മ രാജ വ്യക്തമാക്കിയിരുന്നു. വിധി നടപ്പാക്കുന്ന കാര്യം ചര്‍ച്ച ചെയ്യാനാണെങ്കില്‍ പങ്കെടുക്കില്ലെന്നും പറഞ്ഞിരുന്നു. പ്രളയം ശബരിമലയെ തകര്‍ത്തെറിഞ്ഞതിനാല്‍ വിധി നടപ്പാക്കുന്നത് ഒരു വര്‍ഷത്തേക്കെങ്കിലും നീട്ടിവയ്ക്കണമെന്നും രാമവര്‍മരാജ ആവശ്യപ്പെട്ടിരുന്നു. ശബരിമലയില്‍ യുവതികളെ പ്രവേശിപ്പിക്കണമെന്ന് 2009ല്‍ ഒരു പത്രത്തിന് നല്‍കിയ അഭിമുഖത്തില്‍ രാമവര്‍മരാജ വ്യക്തമാക്കിയിരുന്നു. ശബരിമല യുവതീപ്രവേശനത്തില്‍ ഒരു കൊടിയുടെ കീഴിലും നിന്ന് സമരം നടത്തില്ലെന്ന് ശശികുമാര വര്‍മ ആദ്യമേ വ്യക്തമാക്കിയിരുന്നു.