ജീവന് കൊടുത്തും വിശ്വാസം സംരക്ഷിക്കാന് പ്രതിജ്ഞയെടുത്തവര്, മനുഷ്യക്കോട്ട കെട്ടി അയ്യപ്പനു സംരക്ഷണമൊരുക്കി നില്ക്കുമ്പോള് വികാരം വൃണപ്പെടുത്തി, എന്തിനാണ് യുവതികളെ നിങ്ങളിപ്പോള് ശബരിമലയിലേക്ക് കെട്ടിയെഴുന്നള്ളുന്നത്.അരുതെന്ന് പറയുന്ന നിയമങ്ങളില്ലെങ്കിലും എന്തിനാണ് എരിതീയില് എണ്ണയൊഴിക്കാന് വനിതാ മാധ്യമപ്രവര്ത്തകര് അവിടെയെത്തിയത്. കഴിഞ്ഞ ഒരാഴ്ചയിലേറെയായി കേരളത്തിന്റെ തെരുവുകളൊക്കെ അയ്യപ്പഭക്തിയുടെ മന്ത്രധ്വനിയുമായി നടന്നു നീങ്ങിയ പതിനായിരക്കണക്കിന് വിശ്വാസികളുടെ സഹന സമരത്തെ പരിഹസിക്കുകയല്ലെ നിങ്ങള് ചെയ്തത്. നിങ്ങള് ഹിന്ദുവാകാം. നിയമം നിങ്ങള്ക്ക് എല്ലാവിധ പരിരക്ഷയും നല്കിയേക്കാം എങ്കിലും അക്രമമില്ലാതെ, ക്ഷമയോടെ ലോക മലയാളികള് ഒന്നിച്ചു നീങ്ങിയ ഈ പ്രക്ഷോഭത്തെ നിങ്ങള് ബഹുമാനിച്ചില്ലെങ്കിലും അവഹേളിക്കരുത്. അവരുടെ രോദനം ഭക്തിയാല് ജ്വലിക്കുന്നത് നിങ്ങള് കണ്ടതല്ലേ. സര്ക്കാര് നല്കുന്നത് നിയമപരമായ പരിരക്ഷ. അതിനപ്പുറം ഈ വിശ്വാസി സമൂഹത്തോട് കേരളത്തിനു ചില ഉത്തരവാദിത്വങ്ങളില്ലേ. അവര്ക്കിടയില് നുഴഞ്ഞു കയറിയ കലാപകാരികള്ക്ക് കേരളത്തില് ഇടമൊരുക്കരുത്.ഇത് ഭക്തിയുടെ ആള്ക്കൂട്ടമാണ്. ആള്ക്കൂട്ടത്തിന്റെ മനശാസ്ത്രം വികാരമാണ്. അവയാളിക്കത്തിച്ച് കലാപമാക്കി മാറ്റരുത്. പമ്പയിലേക്ക് തിരിക്കുന്ന യുവതികള്ക്ക് സംരക്ഷണമൊരുക്കാന് ഒരു പക്ഷേ പോലീസിനു കഴിഞ്ഞേക്കാം. പക്ഷേ ഇവിടെ നിങ്ങള് വിലയായി നല്കുന്നത് കേരളം ഇന്നേവരെ അനുഭവിച്ചിട്ടില്ലാത്ത സംഘര്ഷ മുഹൂര്ത്തങ്ങളാണ്. സര്വ്വം കൈവിട്ടുപോകാന് അന്ധമായ വിശ്വാസത്തിന്റെ ഒരു നിമിഷത്തെ വികാരത്തള്ളല് മാത്രമാകാം. പ്രളയവും പെരുമഴയും നമ്മളതിജീവിച്ചു. വിശ്വാസ സംരക്ഷണത്തിനായി സഹനപാതയില് നമ്മളൊത്തു ചേര്ന്നു. ഉറക്കെ പ്രാര്ത്ഥിച്ചു. തെരുവുകളെ മന്ത്രധ്വനിയില് മുഖരിതമാക്കി. നിരത്തുകള് കറുത്ത കടലാക്കി. അയ്യപ്പവിഗ്രഹം അലങ്കരിച്ചു കേരളമൊന്നാകെ നീങ്ങി.നിങ്ങളിപ്പോള് ആവര്ത്തിക്കുന്ന നവോത്ഥാനവും, സ്ത്രീ സമത്വവുമൊക്കെ പടവെട്ടിതന്നെ നേടിയെടുക്കേണ്ടതാണ്. എങ്കിലും വിശ്വാസിയുടെ ആത്മാവിനെ തീയിലേക്കെറിഞ്ഞു കൊടുത്തുകൊണ്ടാകരുത്. മണ്ഡലകാലം നാളെ തുടങ്ങുകയാണ്. വെല്ലുവിളിയുമായി യുവതികളെത്തിയാല് നിലയ്ക്കല് ആളിക്കത്തും. അഗ്നി കേരളം മുഴുവന് പടരും. വിവേകത്തോടെ ഒരു തീരുമാനമെടുക്കുക. തത്കാലം ശബരിമലയിലേക്ക് പോകണ്ട. അയ്യപ്പന് അനുവദിക്കുന്നുവെങ്കില് കാലം തിരുത്തും. അതുവരെ നമുക്കു കാത്തിരിക്കാം.
