യുവതി പ്രവേശനം അനുവദിച്ചുകൊണ്ടുള്ള സുപ്രീംകോടതി വിധി സ്വാഗതം ചെയ്തു ഇരുമുടിയേന്തി യുവതികൾ ശബരിമലയിലെത്തിയെങ്കിലും ഭകതരുടെ കടുത്ത പ്രതിഷേധം മൂലം തിരികെ മടങ്ങേണ്ടി വന്നു. സിനിമാതാരങ്ങളുൾപ്പടെ മറ്റ് പലരും ശബരിമലയിലെ യുവതിപ്രവേശനത്തെ അനുകൂലിച്ചും എതിർത്തും രംഗത്തെത്തിയിരുന്നു. അതേസമയം ശബരിമലയിലേക്ക് പോവുമോ എന്ന ചോദ്യത്തിന് മറുപടിയുമായി എഴുത്തുകാരി ലക്ഷമി രാജീവ് രംഗത്തെത്തിയിരിക്കുകയാണ്.

ലക്ഷമി രാജീവിന്റെ ഫേസ്ബുക്ക് പോസ്റ്റ്......

​ശബരിമലക്ക് ഞാൻ പോകണം എന്നും കൂടെ വരാം എന്നും മക്കളെ കൂടെവിടാം എന്നും മറ്റും പറഞ്ഞു നിരവധിപേർ വിളിച്ചിരുന്നു.

കുറച്ചു ശവങ്ങൾ അവിടെ വീഴുമെന്ന് മാത്രമേ അതുകൊണ്ടു നേട്ടം ഉണ്ടാവൂ. നഷ്ടപ്പെടുക ശബരിമല തന്ത്രിയെയും ​ മേൽശാന്തിയേയും --ആചാരങ്ങളെക്കുറിച്ചു , ഭഗവാനെക്കുറിച്ച് , ക്ഷേത്ര തന്ത്രത്തെക്കുറിച്ചു സംസാരിച്ചു അവർ വെറും പൊള്ളയായ മനുഷ്യർ ആണെന്ന് തെളിയിക്കാനുള്ള ഏക സ്ത്രീയെയാണ്. കൂടെ ഒന്നുമറിയാത്ത പാവം പെൺകുട്ടികളും. അതല്ല ഞാനും കുറച്ചു നിരപരാധികളും പോലീസുകാരും ചാകണം എന്നാണെങ്കിൽ പോകാം. ആരും വരേണ്ട. ഒറ്റയ്ക്ക് പോകാം. എന്റെ കൂടെ കൊണ്ടുപോയി ആരുടെയും മക്കളെ ഞാൻ കൊല്ലിക്കില്ല .

ശബരിമലയിൽ ഇപ്പോൾ കൂടി നിൽക്കുന്ന മനുഷ്യരുടെ കൈയിൽ എന്താണ് ആയുധങ്ങൾ, ബോംബ് ഉണ്ടോ, മറ്റു explosive ഉണ്ടോ എന്നൊന്നും ഉറപ്പില്ലാത്ത സമയമാണ്. സകല ശ്രദ്ധയും ശബരിമലയിലേക്ക് പോകുമ്പോൾ മറ്റു തിരക്കേറിയ ഇടങ്ങൾ , കെട്ടിടങ്ങൾ എന്നിവിടങ്ങളിൽ സുരക്ഷാ സംവിധാനങ്ങൾ മെച്ചപ്പെടുത്തണം എന്ന് അപേക്ഷിക്കുന്നത് - അതേക്കുറിച്ചു വളരെയധികം ബോധമുള്ള ഒരാളാണ്.

​ഇത് ഭേദിച്ച് അവിടെ കയറാൻ ശ്രമിച്ച ഓരോ പെൺകുട്ടിയും എന്റെ മനസ്സിൽ ഓരോ വിഗ്രഹങ്ങളാണ് .

ഞാൻ പോകുമ്പോൾ ഞാൻ കയറിയിരിക്കണം. തിരികെ വരേണ്ടി വന്നാൽ ഞാൻ ഈ മതം ഉപേക്ഷിക്കുമെന്നു പറഞ്ഞിട്ടുണ്ട്. ​

അതിനുള്ള ഉറപ്പു ഈ സർക്കാർ തരട്ടെ. എന്നിട്ടു വരും. അത്രയേ പറ്റൂ. ഈ അവസരത്തിൽ അവർ ആഗ്രഹിക്കുന്ന ജഡമാകാൻ എനിക്ക് മനസില്ല.