അകാലത്തില്‍ പൊലിഞ്ഞ സംഗീതജ്ഞന്‍ ബാലഭാസകറിന് സൂര്യ ഫെസ്റ്റിവെല്‍ വേദിയില്‍ സംഗീത ലോകത്തെ സുഹൃത്തുക്കളുടെ രാഗ പ്രണാമം. അറിയാതെയെങ്കിലും ബാലഭാസ്‌കറിന്റെ ഹൃദയത്തില്‍ തൊട്ട് വരുന്ന ആ ഈണം വീണ്ടും വീണ്ടും കേള്‍ക്കാനുള്ള കൊതി തോന്നും. ബാലഭാസ്‌കര്‍ സൂര്യക്കു സമ്മാനിച്ച തീം സോങ് വെറുമൊരു പശ്ചാത്തല സംഗീതത്തോടു ഉപമിക്കാന്‍ പോലുമാവില്ല. സൂര്യ ദേവനെ പ്രണമിച്ചു 17 വര്‍ഷങ്ങള്‍ക്കപ്പുറം ബാലഭാസ്‌കര്‍ ഈണമിട്ടതാണ് ആ സംഗീതം. ഒക്ടോബര്‍ 20, ശനിയാഴ്ച അകാലത്തില്‍ പൊലിഞ്ഞ മഹാപ്രതിഭക്കു സൂര്യയുടെ സംഗീത പ്രണാമം.

തിരുവനന്തപുരം തൈക്കാട് സൂര്യ ഗണേശം ഓഡിറ്റോറിയത്തില്‍ സ്റ്റീഫന്‍ ദേവസ്സിയുടെയും, ആറ്റുകാല്‍ ബാലസുബ്രമണ്യത്തിന്റെയും നേതൃത്വത്തില്‍ 51 വയലിനിസ്റ്റുകള്‍ അണിനിരന്ന് ബാലഭാസ്‌കറിന് സംഗീതാര്‍ച്ചന നടത്തി. ബാലഭാസ്‌കറിന്റെ ബിഗ് ബാന്‍ഡും സൂര്യ കൃഷ്ണമൂര്‍ത്തി നയിക്കുന്ന സൂര്യയുടെ തൃശക്തിയും ഒപ്പം ചേര്‍ന്നു.

മലയാളത്തിലെ 51 അക്ഷരങ്ങളെ പ്രതീകാത്മമാക്കിയാണ് 51 കലാകാരന്മാര്‍ വേദിയിലെത്തിയത്. ബാലുവിന്റെ പ്രായമായ 41 നെ പ്രതിനിധീകരിച്ച് ഇക്കൂട്ടത്തില്‍ 41 വയലിനിസ്റ്റുകളെ ഉള്‍പ്പെടുത്തി. ഇവര്‍ ഒരുമിച്ച് അവതരിപ്പിച്ച ഫ്യൂഷന്‍ സംഗീതമാണ് അപൂര്‍ണം എന്ന പേരില്‍ വേദിയിലെത്തിയത്. ബാലഭാസകറിന്റെ ബിഗ് ബാന്‍ഡും സൂര്യയും ത്രിശക്തി ബാന്‍ഡും പരിപാടിയില്‍ പങ്കാളികളായി.