തുലാമാസപൂജ പൂര്‍ത്തിയാക്കി ക്ഷേത്രനട നാളെ രാത്രി 10ന് അടയ്ക്കും. മേല്‍ശാന്തി എ.വി. ഉണ്ണിക്കൃഷ്ണന്‍ നമ്പൂതിരി അയ്യപ്പ വിഗ്രഹത്തില്‍ ഭസ്മാഭിഷേകം നടത്തിയാണു നട അടയ്ക്കുക.

ദോഷ പരിഹാരത്തിനായി അയ്യപ്പ സന്നിധിയില്‍ മഹാമൃത്യുഞ്ജയ ഹോമം നടന്നു. ദേവപ്രശ്‌ന പരിഹാരക്രിയയുടെ ഭാഗമായാണിത്. തന്ത്രി കണ്ഠര് രാജീവര് കാര്‍മികത്വം വഹിച്ചു. ഉച്ചപൂജയോട് അനുബന്ധിച്ച് കളഭാഭിഷേകവും നടന്നു.

മലകയറിയേ പറ്റൂവെന്നു പറഞ്ഞ് എത്തുന്ന യുവതികളെ അനുനയിപ്പിച്ച് കാര്യം ബോധ്യപ്പെടുത്തി മടക്കാനാണ് ആദ്യം ശ്രമിക്കുന്നത്. എന്നിട്ടും നിര്‍ബന്ധം പിടിക്കുന്നവരെ മുകളിലേക്കു കൊണ്ടുപോകുമെങ്കിലും ശക്തമായ പ്രതിഷേധം എവിടെവച്ചുയരുന്നോ അവിടെവച്ച് തിരിച്ചിറങ്ങുകയെന്ന നയം തന്നെയാകും പൊലീസ് ഇന്നും നാളെയും പ്രയോഗിക്കുക. ദേശിയ മാധ്യമങ്ങള്‍ വരെ തമ്പടിച്ചിട്ടുള്ളതിനാല്‍ എല്ലാം സൂക്ഷ്മതയോടെ മതിയെന്ന നിര്‍ദേശം പൊലീസിനു ലഭിച്ചിട്ടുണ്ട്.