താന്‍ ഒരു ഭക്തയാണെന്നും ശബരിമല ദര്‍ശനം നടത്തുന്നതിന് ആഗ്രഹമുണ്ടെന്നും അവിടെയെത്തിയാല്‍ മതിയായ സുരക്ഷ ലഭിക്കുമോയെന്നും ആവശ്യപ്പെട്ട് വ്യാഴാഴ്ചയാണ് യുവതി ഐജി മനോജ് എബ്രഹാമിന് സന്ദേശം അയച്ചത്. ശബരിമല ദര്‍ശനം നടത്താന്‍ തയ്യാറായ തന്നെ ഭയപ്പെടുത്തി പിന്തിരിപ്പിക്കുാന്‍ ശ്രമിച്ചതായി യുവതിയുടെ പരാതി.

കോഴിക്കോട് സ്വദേശിനിയായ യുവതിയാണ് ഇത്തരത്തില്‍ പരാതിയുമായി രംഗത്തുവന്നിരിക്കുന്നത്. തുടര്‍ന്ന്, കോഴിക്കോട് എസ്പി തന്നെ ഫോണില്‍ ബന്ധപ്പെടുകയും ചെയ്തിരുന്നു. എന്നാല്‍, തന്നെ പിന്തിരിപ്പിക്കുന്ന തരത്തിലായിരുന്നു അദ്ദേഹം സംസാരിച്ചതെന്നും യുവതി വ്യക്തമാക്കി. ഭയം കൊണ്ട് തന്റെ പേര് വെളിപ്പെടുത്തുന്നില്ലെന്നും യുവതി പറഞ്ഞു.

നിരുത്സാഹപ്പെടുത്തുന്നില്ല എന്നാല്‍ ഈ സാഹചര്യത്തില്‍ പോകുന്നത് ബുദ്ധിമുട്ടായിരിക്കുമെന്നും അദ്ദേഹം ഫോണിലൂടെ പറയുകയും ചെയ്തു. പിന്നീട് അന്വേഷണത്തിനായി പോലീസ് വീട്ടിലെത്തുകയും ചെയ്തു. എന്നാല്‍, ഇവര്‍ മാതാപിതാക്കളെ അടക്കം ഭയപ്പെടുത്തിയ ശേഷമാണ് പോയതെന്നും അവര്‍ പറഞ്ഞു.