തള്ളമയിൽ ഉപേക്ഷിച്ച കുഞ്ഞുങ്ങൾക്ക് സംരക്ഷണമൊരുക്കി ഒരു കുടുംബം. കൊല്ലം മരുത്തടി പഴവൂർ ജംഗ്ഷന് സമീപം ആശാരിമുളയ്ക്കൽ സോമന്റെ വീട്ടിലാണ് മയിൽ കുഞ്ഞുങ്ങൾ അതിഥിയായി എത്തിയത്. നാട്ടുകാർക്ക് കൗതുകമായി മാറിയിരിക്കുകയാണ് മയിൽ കുഞ്ഞുങ്ങൾ മയിലുകളെ നഗരപ്രദേശങ്ങളിൽ യാദൃശ്ചികമായി കാണാറുണ്ടെങ്കിലും മയിലിന്റെ കുഞ്ഞുങ്ങളെ കാണുന്നത് ഒരു പക്ഷേ ആദ്യമായിരിക്കും കാരണം മയിലുകൾ മുട്ടയിട്ട് അടയിരുന്ന്കുഞ്ഞുങ്ങളെ വിരിയിക്കുന്നത് വനപ്രദേശങ്ങളിലാണ്.

അതിനാൽ തന്നെ സോമന്റെ വീട്ടിൽ കുഞ്ഞ്അതിഥികളെ കാണാൻ നല്ല തിരക്കാണ്. കഴിഞ്ഞ ദിവസമാണ് അമ്മ മയിലും നാല് കുഞ്ഞുങ്ങളും സോമന്റെ ആശാരിമുളയ്ക്കൽ വീടിന്റെ മുറ്റത്ത് തീറ്റ തേടുന്നത് വീട്ടുകാർ കണ്ടത്. വീട്ടുകാരെ കണ്ടതും കുഞ്ഞു മയിലുകളെതനിച്ചാക്കി അമ്മ മയിൽ പറന്നകുന്നു. തളള പക്ഷി പോയതറിയാതെ മയിൽ കുഞ്ഞുങ്ങൾ വീടിനുള്ളിൽ കയറി. എന്ത് ചെയ്യണമെന്നറിയാതെ വീട്ടുകാരും വിഷമിച്ചു. അമ്മ മയിൽ കുഞ്ഞുങ്ങളെ വിട്ട് പോകാതെ വീടിന് പരിസരത്തായി പറന്ന് നടക്കുകയാണ്. ഉച്ചത്തിൽ കരയുകയും ചെയ്യാറുണ്ടെന്ന് നാട്ടുകാർ പറയുന്നു.

ഏകദേശം പത്ത് ദിവസം പ്രായമായ നാല് കുഞ്ഞുങ്ങളാണുള്ളത്. സോമന്റെ വീടിന് സമീപത്തെ മറ്റൊരു വീടിന് മുകളിൽ അടുക്കള ചിമ്മിനിയ്ക്ക് സമീപം മയിൽ മുട്ടയിട്ട് അടയിരിക്കുന്നത് പ്രദേശവാസികളിൽ ചിലർ കണ്ടിരുന്നതായി പറയുന്നു.ഇരുപത്തിയെട്ട് ദിവസമാണ് മയിൽ അടയിരുന്ന് മുട്ട വിരിയിക്കുന്നത്.കഴിഞ്ഞ കുറച്ച് നാളുകളായി ഈ പ്രദേശത്ത് രണ്ട് മയിലുകളുടെ സാന്നിദ്ധ്യമുള്ളതായി നാട്ടുകാർ പറയുന്നു.

മയിൽ കുഞ്ഞുങ്ങളുടെ വരവറിഞ്ഞ് നാട്ടുകാരുടെ നല്ല തിരക്കാണ് മയിലിനെ കാണാൻ. തുറന്ന് വിട്ടാൽ മയിൽ കുഞ്ഞുങ്ങൾ അപകടത്തിൽപ്പെടാൻ സാധ്യത മനസിലാക്കി സോമന്റെ മകൻ പവൻ കാർഡ് ബോഡ് പ്പെട്ടിക്കുള്ളിലാക്കി വീട്ടിൽ സൂക്ഷിച്ചിരിക്കുകയാണ്. മയിലിനെ വീട്ടിൽ വളർത്താൻ നിയമം അനുവദിക്കാത്തതിനാൽ കുഞ്ഞുങ്ങളെ എന്ത് ചെയ്യണമെന്നറിയാതെ വിഷമിക്കുകയാണ് കുടുംബം. വനം വകുപ്പിനെയും, പോലീസിനെയും വിവരം അറിയിച്ചെങ്കിലും അവരുടെ ഭാഗത്ത് നിന്നും ഒരു നടപടിയും ഉണ്ടായിട്ടില്ലന്ന് വീട്ടുകാർ പറയുന്നു.ചെറിയ ധാന്യങ്ങളും, ചെറു പ്രാണികളുമാണ് മയിൽ കുഞ്ഞുങ്ങളുടെ ആഹാരം. ഇടയ്ക്ക് കൂടിന് പുറത്ത് ഇറക്കിവിടാറുണ്ടെങ്കിലും ചെറിയ രീതിയിൽ പക്ഷി കുഞ്ഞുങ്ങൾ പറക്കുന്നതിനാൽ വീട്ടുകാർ കൂടെ നിൽക്കും. വീട്ടിലെത്തി അധികം താമസിക്കുന്നതിന് മുന്നേ തന്നെ സോമന്റെ കുടുംബവുമായി നല്ല ചങ്ങാത്തത്തിലാണ് നമ്മുടെ ദേശീയപക്ഷി കുഞ്ഞുങ്ങൾ...