ശബരിമലയിലെ പതിനെട്ട് പടികളില്‍ ഒന്നാമത്തെ പടി തിരിച്ചിട്ടിരിക്കുകയാണെന്ന വിവാദ വെളിപ്പെടുത്തലുമായി ഐക്യമലയരസഭ സംസ്ഥാന ജനറല്‍ സെക്രട്ടറിയും ചരിത്രാന്വേഷകനുമായ പി.കെ സജീവ് രംഗത്തെത്തി. സംശയമുള്ളവര്‍ ആര്‍ക്കിയോളജിക്കല്‍ സര്‍വ്വേയെ കൊണ്ട് പരിശോധന നടത്തണം. അതില്‍ കരിമല അരയന്‍ വക എന്ന് കൊത്തിവച്ചിരിക്കുന്നത് കാണാമെന്നും സജീവ് വ്യക്തമാക്കി. ശബരിമല അയ്യപ്പ സന്നിധിയിലെ പൂജാരിമാരുടെ പട്ടിക പരിശോധിക്കണം. ആദ്യത്തെ പേര് കരിമല അരയന്‍ എന്നാണെന്ന് കാണാം. പുരാവസ്തു രേഖകളില്‍ ഇതുണ്ട്. രണ്ടാമത്തെ പേര് താളനാനി അരയന്‍ എന്നും മൂന്നാമത്തെയാള്‍ കോര്‍മന്‍ എന്നുമാണ്. ഞങ്ങളുടെ കാര്‍ണവന്‍മാരെ 1902ല്‍ താഴമണ്‍മഠം അധികൃതര്‍ ജാതിയുടെ പേരില്‍ പുറത്താക്കിയ ശേഷം കയ്യേറിയതാണെന്നും സജീവ് പറഞ്ഞു. 

ശബരിമലയില്‍ നിന്ന് 28 കിലോമീറ്റര്‍ ഉള്‍വനത്തില്‍ പൊകക്കുത്തിപ്പാറ എന്നൊരു സ്ഥലമുണ്ട്. അവിടെ പതിനെട്ട് പടികള്‍ കൊത്തിവച്ചിരിക്കുന്നത് ഇപ്പോഴും കാണാം. ആധുനിക രീതിയിലുള്ള കല്ലറകള്‍ അവിടെ കാണാം. സാമുവല്‍ മാറ്ററിന്റെ പുസ്തകത്തിലും ഇക്കാര്യങ്ങള്‍ വ്യക്തമാക്കുന്നുണ്ട്. അവിടെ തമസിച്ചിരുന്ന മലഅരയന്‍മാരെ ഇറക്കിവിട്ട ശേഷം ക്ഷേത്രം കയ്യേറിയതാണ്. ഞങ്ങളെ പിതാക്കന്‍മാരുടെ ആത്മാക്കളുടെ വേദനയാണ് ഇന്ന് അവിടെ നടക്കുന്ന അനിഷ്ഠസംഭവങ്ങളെന്നും സജീവ് പറഞ്ഞു.

ജാതിയുടെ പേരിലാണ് ഞങ്ങളുടെ പിതാക്കന്‍മാരെ അധികാരമുള്ളവര്‍ ആട്ടിപ്പായിച്ചത്. നിലയ്ക്കല്‍ മഹാദേവക്ഷേത്രവും ഐക്യമലയരയ വിഭാഗത്തിന്റേതായിരുന്നു. ആ ക്ഷേത്രത്തിനടുത്തുള്ള റബ്ബര്‍ തോട്ടത്തില്‍ ഇപ്പോഴും രണ്ട് ചിത്രങ്ങള്‍ കിടപ്പുണ്ട്. 13ാം നൂറ്റാണ്ടില്‍ വരച്ച ചിത്രങ്ങളാണവ. അത്തരത്തിലുള്ള ഒരു ചിത്രം കഴിഞ്ഞ പ്രളയകാലത്ത് ആറന്‍മുളയില്‍ നിന്ന് കണ്ടെത്തിയിരുന്നു. അതുകൊണ്ട് ഞങ്ങളുടെ ആചാരാനുഷ്ഠാനങ്ങള്‍ ചെയ്യാന്‍ അനുവദിക്കണമെന്നും അദ്ദേഹം ആവശ്യപ്പെട്ടു. 

തന്ത്രി രാജീവര് പറഞ്ഞത് പൊന്നമ്പല മേട്ടില്‍ മകരവിളക്ക് കത്തിച്ചിരുന്നത് മലഅരയന്‍മാരായിരുന്നു എന്നതിന് തെളിവില്ലെന്നാണ്, ഉത്തരവാദിത്തപ്പെട്ട സ്ഥാനത്തിരിക്കുന്ന ഒരാള്‍ അങ്ങനെ പറയരുത്. 116 വര്‍ഷം മുമ്പ് തന്ത്രി കുടുംബമായിരുന്നോ മകരജ്യോതി കത്തിച്ചിരുന്നത്, അതിന് തെളിവുണ്ടോ എന്നും സജീവ് ചോദിക്കുന്നു. കാനനവാസനായ അയ്യപ്പനെ ആരാധിച്ചിരുന്ന കാനനവാസികള്‍ക്കുള്ള അധാകാരം പുന:സ്ഥാപിച്ച് നല്‍കണമെന്നും അദ്ദേഹം ആവശ്യപ്പെട്ടു. മാതൃഭൂമി ചാനലിലെ ഞങ്ങള്‍ക്കും പറയാനുണ്ട് എന്ന പരിപാടിയിലാണ് സജീവ് ഇക്കാര്യം വ്യക്തമാക്കിയത്.