പോലീസിന്റെ നിയന്ത്രണങ്ങളും സംഘര്‍ഷഭീതിയും മൂലം ശബരിമലയില്‍ തീര്‍ഥാടകരുടെ എണ്ണത്തിലും നടവരവിലും ഗണ്യമായ കുറവെന്ന് റിപ്പോര്‍ട്ട്. ഇന്നലെ അവധി ദിവസമായിട്ടും സന്നിധാനത്ത് തിരക്കു കുറവായിരുന്നു. നിലയ്ക്കലില്‍നിന്നു പമ്പയിലേക്കു നിയന്ത്രിച്ചു മാത്രം ബസുകള്‍ വിട്ടതിനാല്‍ പതിനെട്ടാംപടി കയറാന്‍ ഒരു സമയത്തും ക്യൂ ഉണ്ടാകുന്നില്ല. നട തുറന്ന് ആദ്യ നാല് ദിവസങ്ങളില്‍ ദര്‍ശനം നടത്തിയത് 75,000 പേരാണെന്നാണ് ഏകദേശ കണക്ക്.
കഴിഞ്ഞവര്‍ഷം ഇതേസമയം രണ്ട് ലക്ഷത്തിലേറെപ്പേര്‍ എത്തിയിരുന്നു. നാല് ദിവസത്തെ ദേവസ്വം ബോര്‍ഡിന്റെ വരുമാനം 10 കോടി രൂപ തികഞ്ഞിട്ടില്ല. കഴിഞ്ഞവര്‍ഷം ഇതു 15.91 കോടിയായിരുന്നു. കെഎസ്ആര്‍ടിസിയുടെ കണക്കു പ്രകാരം ഇന്നലെ 24,220 തീര്‍ഥാടകരാണ് എത്തിയത്. നിയന്ത്രണം കാരണം കെഎസ്ആര്‍ടിസിയുടെ വരുമാനത്തിലും ഗണ്യമായ കുറവുണ്ട്. പത്തനംതിട്ട ഡിപ്പോയുടെ വരുമാനത്തില്‍ മാത്രം മുന്‍ വര്‍ഷത്തെക്കാള്‍ ഒരു ലക്ഷത്തിലേറെ രൂപയുടെ കുറവുണ്ട്. പമ്പയ്ക്കു സര്‍വീസ് ആരംഭിച്ച ഈ മാസം 12 മുതല്‍ 19 വരെയുള്ള കണക്കാണിത്.
കഴിഞ്ഞ വര്‍ഷം ഇതേ ദിവസങ്ങളില്‍ 5.85 ലക്ഷം രൂപ വരുമാനം ലഭിച്ച സ്ഥാനത്ത് ഇത്തവണ 4.72 ലക്ഷം മാത്രം. തിരക്കു കുറഞ്ഞതിനാല്‍ 50 ബസുകള്‍ മറ്റു ഡിപ്പോകളിലേക്കു മാറ്റി. ചെങ്ങന്നൂരിലും കോട്ടയത്തും പത്തനംതിട്ടയിലുമടക്കം ടാക്‌സി വാഹനങ്ങള്‍ക്കും കാര്യമായ ഓട്ടമില്ലാതായി. തീര്‍ഥാടനകാലത്തെ ആശ്രയിച്ചു ജീവിക്കുന്ന ട്രാക്ടര്‍, ഡോളി തൊഴിലാളികള്‍ക്കും ചുമട്ടുകാര്‍ക്കും കച്ചവടക്കാര്‍ക്കും ഈ മണ്ഡലകാലം നല്ല ഓര്‍മകളാവില്ല സമ്മാനിക്കുക.