ശബരിമല സ്വർണക്കൊള്ള കേസിൽ പ്രത്യേക സംഘത്തിന്റെ (എസ്.ഐ.ടി) അന്വേഷണം 29നകം പൂർത്തിയാക്കണമെന്ന് ഹൈക്കോടതി ഉത്തരവ്. കുറ്റപത്രം വിചാരണക്കോടതിയിൽ എന്ന് സമർപ്പിക്കാനാകുമെന്നും എസ്.ഐ.ടി അന്ന് അറിയിക്കുകയും വേണം.

2025ൽ സന്നിധാനത്തെ ദ്വാരപാലക ശില്പങ്ങൾ സ്വർണം പൂശാനായി കൊണ്ടുപോയതിൽ പ്രതികളുടെ പങ്കും ഉദ്യോഗസ്ഥരുടെ വീഴ്ചയും വ്യക്തമാക്കുന്ന സമഗ്ര റിപ്പോർട്ട് സമർപ്പിക്കേണ്ടതാണ്. അന്വേഷണത്തിന് ഇനി സമയം നീട്ടി നൽകില്ലെന്നും ജസ്റ്റിസുമാരായ വി.രാ‌ജ വിജയരാഘവൻ, കെ.വി.ജയകുമാർ എന്നിവരുൾപ്പെട്ട ദേവസ്വം ബെഞ്ച് വ്യക്തമാക്കി.

അന്വേഷണ ഉദ്യോഗസ്ഥനായ എസ്.പി എസ്.ശശിധരൻ ഇന്നലെ കോടതിയിൽ പുരോഗതി റിപ്പോർട്ട് സമർപ്പിച്ചിരുന്നു. ദ്വാരപാലക ശില്പങ്ങൾ കഴിഞ്ഞവർഷം ചെന്നൈയിലെത്തിച്ചതിനു പിന്നിലെ ഇടപാടുകൾ കേന്ദ്രീകരിച്ചാണ് നിലവിലെ അന്വേഷണമെന്നും അറിയിച്ചു.