പ്രളയ ദുരിതാശ്വാസ പ്രവര്‍ത്തനങ്ങള്‍ക്കായി മുഖ്യമന്ത്രിയുടെ ദുരിതാശ്വാസ നിധിയില്‍ 27.11.2018 (ഇതുവരെ സാലറി ചലഞ്ച് മുഖേന സമാഹരിച്ച തുകയും ഇതില്‍ പെടും) 2683.18 കോടി രൂപ ലഭിച്ചെന്നും അതില്‍ 688.48 കോടി രൂപ ചെലവഴിച്ചെന്നും മുഖ്യമന്ത്രി നിയമസഭയെ അറിയിച്ചു.  . പ്രളയദുരിതവും പേറി പതിനായിരങ്ങള്‍ കഴിയുമ്പോള്‍ ബാക്കി രണ്ടായിരം കോടിയോളം രൂപ സര്‍ക്കാര്‍ ഖജനാവില്‍ സൂക്ഷിച്ചിരിക്കുകയാണെന്ന് മുഖ്യമന്ത്രി തന്നെ സമ്മതിച്ചിരിക്കുന്നു.

ഇതിനുപുറമെ വീടുകളുടെ നാശനഷ്ടത്തിന് സി.എം.ഡി.ആര്‍.എഫി.ല്‍ നിന്നും 1357.78 കോടി രൂപയും ചിലവ് പ്രതീക്ഷിക്കുന്നെന്നും ലോകബാങ്കിന്റെയും ഐക്യരാഷ്ട്ര സംഘടനയുടെ കീഴിലുള്ള ഏജന്‍സികളുടെയും സൂചിക പ്രകാരം നാശനഷ്ടങ്ങള്‍ പരിഹരിക്കാന്‍ 31,000 കോടി രൂപ മുതല്‍ മുടക്കേണ്ടതുണ്ടെന്നും മുഖ്യമന്ത്രി അറിയിച്ചു.

ദേശീയ ദുരന്തനിവാരണ നിയമപ്രകാരം രൂപീകരിച്ച സംസ്ഥാന ദുരന്ത പ്രതികരണ നിധിയില്‍ 987.73കോടി രൂപയാണ് ലഭ്യമായിട്ടുള്ളത്. ഇതില്‍ 586.04 കോടി രൂപ നാളിതുവരെ ചിലവായിട്ടുണ്ട്. നിലവില്‍ 706.74 കോടി രൂപ കൂടി ലഭ്യമായാലേ ബാധ്യത തീര്‍ക്കാനാവുകയുള്ളൂ. ഇതില്‍ കേന്ദ്ര സര്‍ക്കാരിന് തന്നെ റേഷന്‍ ഇനങ്ങളിലും രക്ഷാപ്രവര്‍ത്തനത്തിനായി വിമാനങ്ങള്‍ ഉപയോഗിച്ചതിനുമായി 290.74 കോടി രൂപ നല്‍കേണ്ടതുണ്ട് . എസ്.ഡി.ആര്‍.എഫിലുള്ള തുക മുഴുവന്‍ വിനിയോഗിച്ചാലും ബാധ്യതപ്പെട്ട തുക മുഴുവന്‍ കൊടുത്തുതീര്‍ക്കാന്‍ നിലവിലുള്ള ഫണ്ട് പര്യാപ്തമല്ല.

31,000 കോടി രൂപയോളം പുനര്‍നിര്‍മ്മാണത്തിന് അനിവാര്യമായും വേണ്ടിവരുമെന്നാണ് കണക്കുകള്‍ സൂചിപ്പിക്കുന്നത്. ഇത് ലഭ്യമാക്കുന്നതിന് വിവിധ തരത്തിലുള്ള സഹായങ്ങള്‍ നേടിയെടുക്കുക എന്നതും പ്രധാനമാണ്. അതിന് ജനങ്ങളുടെയാകെ സഹായം വേണം. നിയമസഭയിലെ മുഴുവന്‍ അംഗങ്ങളുടെയും പിന്തുണ ഇക്കാര്യത്തില്‍ ഉണ്ടാവുമെന്നാണ് സര്‍ക്കാരിന്റെ പ്രതീക്ഷ.

31,000 കോടി രൂപ പുനര്‍നിര്‍മ്മാണത്തിന് ആവശ്യമുണ്ടെന്നാണ് യു.എന്‍. ഏജന്‍സികളുടെ കണക്കുകളിലൂടെ വ്യക്തമാകുന്നത്. ഈ പണം സ്വരൂപിക്കുക എളുപ്പമല്ല. അതിനുവേണ്ടി വിവിധതരത്തിലുള്ള വിഭവസമാഹരണ രീതികള്‍ ആവിഷ്‌ക്കരിക്കേണ്ടി വരും.  വിവഭസമാഹരണത്തിന്റെ മാര്‍ഗ്ഗങ്ങളില്‍ ഒന്നാണ് ക്രൗഡ് ഫണ്ടിംഗ്. ഒരു പ്രത്യേക ആവശ്യം കണ്ടെത്തുകയും അതിന് ആവശ്യമായ ഫണ്ടിംഗ് ഒരു പ്രത്യേക വ്യക്തികളോ സ്ഥാപനങ്ങളോ ഗ്രൂപ്പുകളോ നിര്‍വ്വഹിക്കുന്ന രീതിയാണ് ക്രൗഡ് ഫണ്ടിംഗ്. ക്രൗഡ് ഫണ്ടിംഗ് പ്ലാറ്റ് ഫോം നിയതമായ പദ്ധതികള്‍ക്ക് ആവശ്യമായ ധനസമാഹരണം ചെറിയ തുക മുതല്‍ വലിയ സംഭാവന വരെ സമാഹരിക്കുന്ന രീതിയിലാണ് ചിട്ടപ്പെടുത്തിയിരിക്കുന്നത്. 

വ്യക്തിഗത ഭവനങ്ങള്‍, വിദ്യാഭ്യാസ സ്ഥാപനങ്ങള്‍, അംഗന്‍വാടികള്‍ എന്നിവയുടെ പുനര്‍നിര്‍മ്മാണത്തിനും മൃഗസംരക്ഷണ മേഖലയില്‍ ഉണ്ടായ നഷ്ടം നികത്തുന്നതിനാവശ്യമായ പദ്ധതികളുടെ വിശദാംശങ്ങളും ഇപ്പോള്‍തന്നെ പോര്‍ട്ടലില്‍ ലഭ്യമാണ്. ആരോഗ്യമേഖലയില്‍ ഉണ്ടായിട്ടുള്ള നാശനഷ്ടം പരിഹരിക്കാന്‍ ആവശ്യമായ പദ്ധതികള്‍ തയ്യാറാക്കിക്കഴിഞ്ഞിട്ടുണ്ട്. വിവിധ മേഖലകളിലെ ഇത്തരം ഇടപെടലുകളുടെ സാധ്യത ഇതില്‍ ഉണ്ടാകുന്നതാണ്.