ഒടുവില് പടിക്കല് കലമുടച്ച് ബിജെപി; സുവര്ണ്ണാവസരമൊക്കെ തുലച്ചു, എക്കാലത്തും ഗ്രൂപ്പുപോരും, പടല പിണക്കങ്ങളും, നേതാക്കള് തമ്മിലുള്ള പോരും തളര്ത്തിയിരുന്ന ബിജെപിയില് ഇപ്പോള് കൂട്ടക്കുഴപ്പം
ശബരിമല യുവതി പ്രവേശന വിഷയത്തില് ബിജെപിയില് അണികള് ആശയക്കുഴപ്പത്തിലാണ്. ശബരിമലയില് സമരത്തിനില്ലെന്ന ബിജെപി പ്രസിഡന്റ് ശ്രീധരന്പിള്ളയുടെ നിലപാടാണ് പാര്ട്ടിയില് കൂട്ടക്കുഴപ്പം സൃഷ്ടിച്ചത് . ശബരിമല സമരസമയത്ത് പുകഞ്ഞുനിന്ന ഗ്രൂപ്പുവഴക്ക് ഇപ്പോള് പരസ്യ കലാപത്തിന്റെ വക്കിലെത്തിയിരിക്കുകയാണ്. സംസ്ഥാന നേതൃത്വത്തിനെതിരെ പരസ്യവിമര്ശനം ഉന്നയിച്ച് വി മുരളീധരന് എംപിയും പി പി മുകുന്ദനും രംഗത്തെത്തി. ജയിലിലായ കെ സുരേന്ദ്രന് പാര്ടി നേതൃത്വം പിന്തുണ നല്കാത്തതാണ് മുരളീധരനെ പരസ്യ നിലപാടിലേക്ക് എത്തിച്ചത്. അതിനിടെ, സംസ്ഥാനത്തെ പാര്ടിയുടെ അവസ്ഥ കാണിച്ച് കേന്ദ്ര നേതൃത്വത്തിന് ആര്എസ്എസും പരാതി നല്കി.
ശബരിമലയിലെ യുവതി പ്രവേശമല്ല ഇപ്പോള് നടക്കുന്ന ബിജെപിയുടെ സമരത്തിന്റെ വിഷയമെന്ന് ഒ രാജഗോപാല്. റിവ്യൂ ഹര്ജി കോടതി പരിഗണിക്കാനിരിക്കെ സമരം ചെയ്തിട്ട് എന്തുകാര്യമെന്നും അദ്ദേഹം ചോദിക്കുന്നു. പൊലീസ് നടപടിയും ശബരിമലയിലെ അടിസ്ഥാന സൗകര്യ പ്രശ്നങ്ങളുമാണ് സമരത്തിന്റെ വിഷയം. സെക്രട്ടറിയറ്റിന് മുന്നില് നടത്തുന്നത് ബിജെപിയുടെ രാഷ്ട്രീയ സമരമാണ്. സര്ക്കാരിനെതിരായ സമരം വ്യാപിപ്പിക്കുന്നതിനാണ് സെക്രട്ടറിയറ്റിലേക്ക് മാറ്റിയത്. സര്ക്കാര് തയ്യാറാണെങ്കില് ഒത്തുതീര്പ്പ് പരിഗണിക്കാമെന്നും രാജഗോപാല് പറഞ്ഞു. ശബരിമലയുടെ പേരില് നിയമസഭ അലങ്കോലപ്പെടുത്തുന്നതിനോട് യോജിപ്പില്ല. ശബരിമല വിഷയം ചര്ച്ച ചെയ്യാന് ധാരാളം സമയമുണ്ട്. സഭ തടസ്സപ്പെടുത്തുന്ന യുഡിഎഫ് ശൈലി താന് സ്വീകരിക്കില്ലെന്നും രാജഗോപാല് പറഞ്ഞു. സ്ത്രീ പ്രവേശത്തിന്റെ പേരിലല്ല സമരമെന്ന ബിജെപി സംസ്ഥാന പ്രസിഡന്റ് പി എസ് ശ്രീധരന്പിള്ളയുടെ അഭിപ്രായത്തോട് യോജിക്കുന്നതാണ് ഒ രാജഗോപാലിന്റെ നിലപാട്.
എന്നാല് ബിജെപി സമരം മാറ്റിയത് വിശ്വാസികളുടെ മനസ്സിന് പോറലേല്പ്പിച്ചുവെന്ന് ബിജെപി നേതാവ് പി പി മുകുന്ദന് ഫേസ്ബുക്ക് പോസ്റ്റില് പറഞ്ഞു. ശബരിമല വിഷയത്തില് ജയിലില് കഴിയുന്നവരുടെ കാര്യം ഗൗരവമായി എടുക്കാന് വ്യവസ്ഥ വേണം. അയ്യപ്പ വിശ്വാസത്തിന്റെ പേരില് പ്രതിഷേധത്തിന് ഇറങ്ങിയവര് ആരായാലും അവര്ക്കൊപ്പം ബിജെപി ഉണ്ടാവണം. ശബരിമല സമരം മാറ്റാന് ബിജെപി തീരുമാനിച്ചിരിക്കുകയാണല്ലോ എന്ന മുഖവുരയോടെയാണ് മുകുന്ദന്റെ ഫേസ്ബുക്ക് പോസ്റ്റ്.
ശബരിമല സമരം ഒത്തുതീര്പ്പാക്കാന് ആത്മാഭിമാനമുള്ള ബിജെപി പ്രവര്ത്തകന് സമ്മതിക്കില്ലെന്ന് മുന് സംസ്ഥാന പ്രസിഡന്റ് വി മുരളീധരന് എം പി. സമരം പിന്വലിക്കുമെന്ന നിലപാട് എന്തുകൊണ്ടാണ് സ്വീകരിച്ചതെന്ന് സംസ്ഥാന പ്രസിഡന്റാണ് വ്യക്തമാക്കേണ്ടതെന്നും മുരളീധരന് മാധ്യമങ്ങളോട് പറഞ്ഞു.
നേതാക്കള് പലവഴിക്ക് നീങ്ങിയതോടെ സംസ്ഥാന പ്രസിഡന്റ് പിഎസ് ശ്രീധരന്പിള്ള പൂര്ണ്ണമായും വെട്ടിലായി. ശ്രദ്ധയില്ലാത്ത പ്രസ്താവനകള് കൊണ്ട് ആശയക്കുഴപ്പത്തില് പലപ്പോഴും പാര്ട്ടിയെ എറിഞ്ഞു കൊടുത്തു പിഎസ് ശ്രീധരന്പിള്ള.
ശബരിമല വിഷയത്തില് താന് നടത്തിയ എല്ലാ സമരങ്ങളും പൂങ്കാവനത്തിന് പുറത്തായിരുന്നു. ഇപ്പോഴും ശബരിമല കര്മസമിതിയുടെ സമരത്തിന് ബിജെപി പൂര്ണ പിന്തുണ നല്കുന്നുണ്ടെന്നും ശ്രീധരന്പിള്ള പറഞ്ഞു.
കേരളത്തിലെ ബിജെപിക്ക് കൈവരുമായിരുന്ന സുവര്ണ്ണാവസരം ഒടുവില് നേതാക്കള് ചേര്ന്ന് കുളമാക്കി. സര്ക്കാര് ജയിലിലിട്ട കെ സുരേന്ദ്രനു വേണ്ടിയും കാര്യമായൊന്നും ചെയ്യാനാകാതെ സംസ്ഥാന നേതൃത്വം കുഴയുന്നു.
https://www.facebook.com/Malayalivartha
