മുല്ലപ്പെരിയാര്‍ കേസില്‍ ജലനിരപ്പ് ഉയര്‍ത്തണമെന്ന വിധിക്കെതിരെ കേരളത്തിന്റെ പുന:പരിശോധന ഹര്‍ജി സുപ്രീംകോടതി ചൊവ്വാഴ്ച പരിഗണിക്കും. അണക്കെട്ടിലെ ജലനിരപ്പ് 142 അടിയായി ഉയര്‍ത്തണമെന്നായിരുന്നു വിധി. ഡാമിന്റെ സുരക്ഷ, കേരളവും തമിഴ്‌നാടും തമ്മിലുള്ള ജലംപങ്കുവയ്ക്കല്‍ കരാറിന്റെ സാധുത എന്നീ വിഷയങ്ങള്‍ കണക്കിലെടുത്താണ് കേരളത്തിന്റെ വാദം. കോടതി നിയോഗിച്ച ഉന്നതാധികാര സമിതി അണക്കെട്ടിലെ പരമാവധി ജലനിരപ്പ് പരിഗണിച്ച കണക്കുകള്‍ സംബന്ധിച്ച വിയോജിപ്പ് ഉന്നയിക്കാന്‍ കേരളത്തിന് അവസരം ലഭിച്ചിട്ടില്ല. സമിതിയുടെ കണക്കുകള്‍ കേരളത്തിലെ ബന്ധപ്പെട്ട ഉദ്യോഗസ്ഥരുമായി ചര്‍ച്ച ചെയ്തിട്ടില്ലെന്നുമാണ് പുനഃപരിശോധന ഹര്‍ജിയിലെ കേരളത്തിന്റെ ആരോപണം. പുനഃപരിശോധനാ ഹര്‍ജി ജഡ്ജിമാരുടെ ചേംബറില്‍ തീര്‍പ്പാക്കുന്നതിനു പകരം പരസ്യവാദം വേണമെന്നും കേരളം ആവശ്യപ്പെട്ടിട്ടുണ്ട്.

മുല്ലപ്പെരിയാര്‍ അണക്കെട്ടിലെ ജലനിരപ്പ് 136 അടിയാക്കി നിജപ്പെടുത്തി കേരള നിയമസഭ 2006ല്‍ പാസാക്കിയ നിയമഭേദഗതി ഭരണഘടനാ വിരുദ്ധമാണെന്നാണ് കഴിഞ്ഞ മേയ് ഏഴിനു സുപ്രീം കോടതി വിധിച്ചത്. ചീഫ് ജസ്റ്റിസ് ആര്‍.എം.ലോധ അധ്യക്ഷനായ അഞ്ചംഗ ഭരണഘടനാ ബെഞ്ച്, അണക്കെട്ട് സുരക്ഷിതമല്ലെന്ന കേരളത്തിന്റെ ആശങ്കകള്‍ അടിസ്ഥാനമില്ലാത്തതാണെന്നു വ്യക്തമാക്കി. പുതിയ അണക്കെട്ട് നിര്‍മിക്കണമെന്ന കേരളത്തിന്റെ ആവശ്യം തള്ളിയിരുന്നു. ജലനിരപ്പ് 142 അടിയാക്കി ഉയര്‍ത്താമെന്നും അണക്കെട്ട് ബലപ്പെടുത്തിയശേഷം അത് 152 അടിയാക്കാമെന്നുമുള്ള 2006 ഫെബ്രുവരി 27ലെ രണ്ടംഗ ബെഞ്ചിന്റെ ഉത്തരവ് ഭരണഘടനാ ബെഞ്ച് പൂര്‍ണമായി ശരിവയ്ക്കുകയും ചെയ്തു.