അഞ്ചുവര്ഷത്തെ നിയമപോരാട്ടം: വിവാഹമോചന രേഖകള് കീറിയെറിഞ്ഞ് ഭര്ത്താവിനെ കെട്ടിപ്പിടിച്ച് കരഞ്ഞ് ഭാര്യ
അഞ്ചുവര്ഷത്തെ നിയമപോരാട്ടങ്ങള്ക്കും തര്ക്കങ്ങള്ക്കും ഒടുവില് ഡല്ഹിയിലെ കോടതി അവിചാരിതമായ ഒരു ഒത്തുചേരലിന് സാക്ഷിയായി. കോടതിയില് വിവാഹമോചനത്തിനായി എത്തിയതായിരുന്നു ശിഖയും ഭര്ത്താവ് സൗരവും. അഞ്ച് വര്ഷമായി ഇരുവരും തമ്മിലുള്ള നിയമപോരാട്ടം ആരംഭിച്ചിട്ട്. എന്നാല് ഇത്തവണ പതിവില് നിന്ന് വ്യത്യസ്തമായി വിവാഹമോചനത്തിനുള്ള രേഖകള് കീറിയെറിഞ്ഞ ശേഷം ഭര്ത്താവിനരികിലേക്ക് ഓടിച്ചെല്ലുകയായിരുന്നു ശിഖ.
2020 ലായിരുന്നു ഇരുവരും തമ്മിലുള്ള വിവാഹം നടന്നത്. വലിയ ആഘോഷങ്ങളോടെ ആരംഭിച്ച ജീവിതത്തില് താമസിയാതെതന്നെ കലഹങ്ങള് ഉടലെടുത്തു. ഒടുവില് വിവാഹബന്ധം അവസാനിപ്പിക്കുന്നതിനായി അവര് കോടതിയെ സമീപിച്ചതോടെ ആരോപണങ്ങളും പ്രത്യാരോപണങ്ങളുമായി കേസ് വര്ഷങ്ങളോളം നീണ്ടു.
ഇത് ശിഖയുടെ കുടുംബത്തിന് വലിയ നഷ്ടം വരുത്തിവച്ചു. മകളുടെ ഭാവിയെക്കുറിച്ചുള്ള ആശങ്ക ശിഖയുടെ പിതാവിനെ മാനസികമായും സാമ്പത്തികമായും തളര്ത്തി. അദ്ദേഹത്തിന് ഹൃദയാഘാതം സംഭവിച്ചതോടെ സ്ഥിതി കൂടുതല് ദുഷ്കരമായി. കടുത്ത സാമ്പത്തിക ബുദ്ധിമുട്ടുകള് നേരിട്ടതോടെ കുടുംബം അദ്ദേഹത്തെ ഒരു സര്ക്കാര് ആശുപത്രിയില് പ്രവേശിപ്പിച്ചു.
ഈ ഘട്ടത്തിലാണ് ശിഖയുടെ ഭര്ത്താവ് വിഷയത്തില് ഇടപെട്ടത്. കോടതിയില് ഇരുവരും തമ്മിലുള്ള വിവാഹമോചനക്കേസ് നടക്കുന്നതിനിടയിലും സൗരവ് ശിഖയുടെ കുടുംബത്തെ സഹായിക്കാനായി എത്തി. ഭാര്യാപിതാവിന്റെ അവസ്ഥ അറിഞ്ഞെത്തിയ സൗരഭ് അദ്ദേഹത്തെ ഗുരുഗ്രാമിലെ കൂടുതല് സൗകര്യങ്ങളുള്ള ഒരു സ്വകാര്യ ആശുപത്രിയിലേക്ക് മാറ്റാന് സഹായിച്ചു. അവിടെ അദ്ദേഹത്തിന് സമയബന്ധിതമായ ചികിത്സ ലഭിക്കുകയും ആരോഗ്യം മെച്ചപ്പെടുകയും ചെയ്തു. നിയമപോരാട്ടങ്ങള്ക്കിടയില് നടന്ന ഈ സംഭവം ദമ്പതികള് തമ്മിലുണ്ടായിരുന്ന അകലം കുറച്ചു.
അടുത്ത സിറ്റിംഗിനായി ഇരുവരും കോടതിയിലെത്തി. വിവാഹമോചനം വേണോയെന്ന കോടതിയുടെ ചോദ്യത്തിന് മുന്നില് സൗരവ് ശിഖയെനോക്കി പുഞ്ചിരിച്ചു. ഇതോടെ വികാരഭരിതയായ ശിഖ വിവാഹമോചനത്തിന്റെ രേഖകള് കീറിയെറിഞ്ഞ ശേഷം ഭര്ത്താവിന്റെ അരികിലേക്ക് ഓടി. അതോടെ ഇരുവരുടെയും വിവാഹമോചനത്തില് വിധി വരാനിരുന്ന ദിവസം പുനഃസമാഗമത്തിനുള്ള ദിവസമായി മാറി.
https://www.facebook.com/Malayalivartha
