കെ.എസ്.ആര്‍.ടി.സിയുടെ നിലക്കല്‍ പമ്പ ചെയിന്‍ സര്‍വീസില്‍ ഷെഡ്യുളുകളുടെ എണ്ണം കൂടിയെങ്കിലും വിരലിലെണ്ണാവുന്ന യാത്രക്കാരുമായിട്ടാണ് എ.സി ലോ ഫ്‌ലോര്‍ ബസുകള്‍ പലതും പമ്പയിലേക്ക് ഓടുന്നത് . ഓരോ ആറ് മിനിറ്റിലും രണ്ട് നോണ്‍ എ.സി ലോ ഫ്‌ളോര്‍ ബസും ഒരു എ.സി ബസും എന്ന പുതിയ ക്രമീകരണം ബുധനാഴ്ച്ച മുതലാണ് നടപ്പാക്കിയത്. എന്നാല്‍ നോണ്‍ എ.സി ബസില്‍ മാത്രമേ മതിയായ യാത്രക്കാരുള്ളൂ. ഭക്തര്‍ കയറിയാലും ഇല്ലെങ്കിലും രണ്ട് മിനിറ്റ് ഇടവേളയില്‍ ബസുകള്‍ പുറപ്പെടാനുള്ള നിര്‍ദ്ദേശം നടപ്പിലാക്കിയതോടെയാണ് ഷെഡ്യുളുകളുടെ എണ്ണം കൂടിയത്.
സിംഗിള്‍ ഡ്യൂട്ടി സമ്പ്രദായമായതിനാല്‍ ജീവനക്കാര്‍ക്കുണ്ടായ അമര്‍ഷം ശമിപ്പിക്കലാണ് ഈ തീരുമാനത്തിന് പിന്നിലെന്നാണ് സൂചന. എന്നാല്‍ കുറച്ച് യാത്രക്കാരുമായി എ.സി ബസുകള്‍ ഓടിക്കുന്നത് കെ.എസ്.ആര്‍.ടി.സിക്ക് സാമ്പത്തിക നഷ്ടമുണ്ടാക്കും. അതേസമയം, പമ്പയില്‍ നിന്ന് നിലക്കലിലേക്ക് യാത്രക്കാരുണ്ടായിരുന്നു. കഴിഞ്ഞ ദിവസം 873 സര്‍വീസുകളാണ് നടത്തിയത്. തിങ്കളാഴ്ച്ചയായിരുന്നു ഇതിന് മുമ്പ് ഏറ്റവും കൂടുതല്‍ സര്‍വീസുകളുണ്ടായിരുന്നത്, 754 എണ്ണം. വെള്ളിയാഴ്ച്ച അഞ്ച് മണിക്ക് ഷെഡ്യുളുകളുടെ എണ്ണം 700 കവിഞ്ഞിരുന്നു. 150 കെ.എസ്.ആര്‍.ടി.സി ബസുകളാണ് പമ്പ നിലക്കല്‍ റൂട്ടിലോടുന്നത്. 50 എണ്ണം എ.സിയാണ്. അഞ്ച് വൈദ്യുതിയില്‍ പ്രവര്‍ത്തിക്കുന്ന ബസുകളുമുണ്ട്. പത്ത് എ.സിയും അഞ്ച് വൈദ്യുത ബസുകളും അടുത്ത ദിവസങ്ങളിലെത്തിക്കും. പമ്പയിലേക്കും തിരിച്ചും 150 രൂപയാണ് എ.സി ടിക്കറ്റ് ചാര്‍ജ്. നോണ്‍ എ.സിക്ക് 80 ഉം. 48 മണിക്കൂറാണ് റിട്ടേണ്‍ ടിക്കറ്റിന്റെ സമയപരിധി.

പമ്പയിലേക്കുള്ള ചെയിന്‍ സര്‍വീസ് സുഗമമാക്കാന്‍ നിലക്കലില്‍ തോളോട് തോള്‍ ചേര്‍ന്ന് കെ.എസ്.ആര്‍.ടി.സിയും പൊലീസും . പാര്‍ക്കിങ് ഗ്രൗണ്ടിലുള്ള ബസുകള്‍ സ്റ്റാന്റിലേക്ക് വരാനും മറ്റും നിര്‍ദ്ദേശം നല്‍കുന്നത് പൊലീസുകാരുടെ വയര്‍ലെസ് സെറ്റ് വഴിയാണ്. കെ.എസ്.ആര്‍.ടി.സി അധികൃതര്‍ നല്‍കുന്ന നിര്‍ദ്ദേശം കണ്‍ട്രോള്‍ റൂമിലെ പൊലീസ് ഉദ്യോഗസ്ഥന്‍ പാര്‍ക്കിങ് ഗ്രൗണ്ടിലെ പൊലീസുകാരെ വയര്‍ലെസ് സെറ്റില്‍ അറിയിക്കും. െ്രെഡവര്‍മാര്‍ക്ക് പൊലീസുകാരന്‍ സന്ദേശം കൈമാറുകയും ചെയ്യും