യുവതികള്‍ ശബരിമല ശ്രീകോവിലില്‍ ദര്‍ശനം നടത്തിയാല്‍ ക്ഷേത്രം അടച്ച് താക്കോല്‍ കൈമാറുമെന്ന തന്ത്രി കണ്ഠരര് രാജീവരരുടെ പ്രസ്താവനയ്ക്ക് പിന്നാലെ തന്ത്രിയെ മാറ്റാനുള്ള അധികാരം സര്‍ക്കാരിനും ദേവസ്വം ബോര്‍ഡിനും ഉണ്ടെന്ന് മുഖ്യമന്ത്രി വ്യക്തമാക്കിയത് ലോകനാര്‍ക്കാവില്‍ മുമ്പ് നടന്ന സംഭവം പറഞ്ഞാണ്. എന്നാല്‍ അത് ജനങ്ങളെ തെറ്റിദ്ധരിപ്പിക്കലായിരുന്നെന്ന് അദൈ്വതാശ്രമം മഠാധിപതി സ്വാമി ചിദാനന്ദപുരി വ്യക്തമാക്കി. ലോകനാര്‍ക്കാവില്‍ ദളിതരെയും പിന്നോക്കക്കാരേയും പ്രവേശിപ്പിക്കാന്‍ കടത്തനാട് രാജാവ് തീരുമാനിച്ചപ്പോള്‍ തന്ത്രി ക്ഷേത്രം പൂട്ടിപ്പോയെന്നും അതോടെ തന്ത്രിയെ മാറ്റി രാജാവ് പകരം ആളെ വെച്ചെന്നുമാണ് മുഖ്യമന്ത്രി വാര്‍ത്താസമ്മേളനത്തില്‍ വ്യക്തമാക്കിയത്.

എന്നാല്‍ മുഖ്യമന്ത്രി പറഞ്ഞത് ശരിയല്ലെന്നും ഇന്നും വോകനാര്‍ക്കാവില്‍ കാട്ടുമഠം കുടുംബത്തിനാണ് തന്ത്രിസ്ഥാനമെന്നും കടത്തുനാട്ട് രാജാവ് മേല്‍ശാന്തിയെയാണ് പിരിച്ച് വിട്ടതെന്നും സ്വാമി ചിദാനന്ദപുരി ചൂട്ടിക്കാട്ടി. മേല്‍ശാന്തി ശമ്പളക്കാരനാണ്. അദ്ദേഹത്തെ പിരിച്ചുവിടാനാകും. തന്ത്രിക്ക് ശമ്പളമല്ല ദക്ഷിണയാണ് നല്‍കുന്നത്. ഇതൊന്നും മുഖ്യമന്ത്രിക്ക് അറിയില്ലെന്നും സ്വാമി പറഞ്ഞു. തന്ത്രി വെറും ശമ്പളക്കാരന്‍ മാത്രമാണെന്നാണ് മന്ത്രി എം.എം മണിയും പ്യൂണിനെ പോലെ തന്ത്രിയെ നിയന്ത്രിക്കാമെന്ന് ദേവസ്വം മുന്‍ പ്രസിഡന്റ് എം.രാജഗോപാലന്‍ നായരും പറഞ്ഞിരുന്നു. 

ഹര്‍ത്താലിന് കട അടച്ച്പൂട്ടുന്ന ലാഘവത്തോടെയാണ് തന്ത്രി ക്ഷേത്രം അടച്ച് പൂട്ടുമെന്ന് പറഞ്ഞതെന്ന് മന്ത്രി ജി.സുധാകരന്‍ പരിഹസിച്ചിരുന്നു. ഇതേക്കുറിച്ച് ഭക്തജനങ്ങള്‍ അഭിപ്രായം പറയണം. ഫ്യൂഡല്‍പൗരോഹത്യത്തിന്റെ തകര്‍ച്ചയുടെ മണിമുഴക്കമാണ് ശബരിമലയില്‍ കേള്‍ക്കുന്നതെന്നും മന്ത്രി പറഞ്ഞിരുന്നു. പൂജാരിമാര്‍ ഷര്‍ട്ടിടണമെന്നും ഷര്‍ട്ടിടാത്തതിനെ താന്‍ പണ്ടേ ചോദ്യം ചെയ്തിരുന്നെന്നും മന്ത്രി പറഞ്ഞിരുന്നു.

തന്ത്രി നടയടയ്ക്കാന്‍ തീരുമാനിച്ചത് തന്നോട് അഭിപ്രായം ചോദിച്ച ശേഷമാണെന്ന് ബി.ജെ.പി പ്രസിഡന്റ് ശ്രീധരന്‍പിള്ള വെളിപ്പെടുത്തിയതോടെ മുഖ്യമന്ത്രി അടക്കം കടുത്തവിമര്‍ശനവുമായി രംഗത്തെത്തിയിരുന്നു. തുടര്‍ന്ന് ദേവസ്വംബോര്‍ഡ് തന്ത്രിയോട് വിശദീകരണം തേടിയിരുന്നു. ശ്രീധരന്‍പിള്ള പറഞ്ഞത് കളവാണെന്നും തന്ത്രി വ്യക്തമാക്കി. തന്ത്രിക്കെതിരായ നടപടി ബോര്‍ഡിന്റെ പരിഗണനയിലാണെന്ന് കഴിഞ്ഞ ദിവസം നിയമസഭയെ മുഖ്യമന്ത്രി അറിയിച്ചിരുന്നു.