യുവതികള്‍ക്ക് സുരക്ഷ നല്‍കാതെ ശബരിമല സന്നിധാനത്ത് എത്തിക്കാനുള്ള പൊലീസ് നീക്കം ഭക്തര്‍ പൊളിച്ചടുക്കി. ആന്ധ്രാ സ്വദേശിയായ യുവതി രാവിലെ സുരക്ഷതേടി പമ്പ പൊലീസ് സ്റ്റേഷനില്‍ എത്തിയിരുന്നു. അവരെ വനിതാ പൊലീസ് അകമ്പടിയില്ലാതെ രഹസ്യമായി മലകയറ്റാനായിരുന്നു ഉന്നത ഉദ്യോഗസ്ഥരുടെ തീരുമാനം. അതുകൊണ്ടാണ് പനമ്പയില്‍ ഡ്യൂട്ടിയിലുണ്ടായിരുന്ന ആയിരത്തിലധികം പൊലീസുകാരെയും നിരീക്ഷണക്യാമറകളെയും സ്്കാനറുകളും വെട്ടിച്ച് യുവതി മരക്കൂട്ടം വരെ എത്തിയത്. അതേസമയം ഇവര്‍ മരക്കൂട്ടംവരെ എത്തിയില്ലെന്നും ചന്ദ്രാനന്ദന്‍ റോഡില്‍ ബെയ്‌ലി പാലത്തില്‍ വെച്ച് ഭക്തര്‍ തടയുകയായിരുന്നെന്നും റിപ്പോര്‍ട്ടുണ്ട്. 

ചിത്തിര ആട്ടവിശേഷത്തിനും തുലാമാസ പൂജാ സമയത്തും സുരക്ഷാ അകമ്പടിയോടെ പൊലീസ് യുവതികളെ മലകയറ്റാന്‍ ശ്രമിച്ചെങ്കിലും ഭക്തരുടെ പ്രതിഷേധത്തിന് മുന്നില്‍ കീഴടങ്ങേണ്ടിവന്നു. എന്നാല്‍ യുവതികള്‍ക്ക് മുന്നോട്ട് പോകാന്‍ താല്‍പര്യമില്ലെന്ന് വ്യക്തമാക്കിയതോടെയാണ് പൊലീസ് പിന്‍വാങ്ങിയതെന്നായിരുന്നു ന്യായീകരണം. മണ്ഡലകാലം ശാന്തതയിലേക്ക് കടക്കുമ്പോള്‍ ഇന്നലെയും ഇന്നും യുവതികള്‍ എത്തിയത് ആശങ്കസൃഷ്ടിക്കുന്നുണ്ട്. സന്നിധാനത്തെ സമരത്തില്‍ നിന്ന് ബി.ജെ.പിയും ആര്‍.എസ്.എസും പിന്‍വാങ്ങിയതോടെ യുവതികള്‍ ഇനിയും എത്തുമെന്ന അഭ്യൂഹവും ശക്തമാണ്. ആന്ധ്രാ സ്വദേശികളായ യുവതികളാണ് ദര്‍ശനത്തിനെത്തിയത് എന്നതും ശ്രദ്ധേയമാണ്. ഇവരുടെ പശ്ചാത്തലം പോലും അന്വേഷിക്കാതെ പൊലീസ് രഹസ്യമായി മലകയറ്റാന്‍ അനുവദിച്ചത് ശരിയല്ലെന്ന ആക്ഷേപവും ഉയരുന്നുണ്ട്.

യുവതികളെ കയറ്റുന്നതിന് സര്‍ക്കാരിന് താല്‍പര്യമില്ലെന്ന് ദേവസ്വംമന്ത്രി കടകംപള്ളി സുരേന്ദ്രന്‍ ഇന്ന് സന്നിധാനത്ത് നടന്ന അവലോകന യോഗത്തിന് ശേഷം മാധ്യമങ്ങളോട് വ്യക്തമാക്കിയിരുന്നു. അതിന് പിന്നാലെയാണ് യുവതി മലകയറിയത്. ഇന്നലെ മലകയറാനെത്തിയ യുവതിയെ ഭക്തര്‍ തടഞ്ഞതോടെ പൊലീസ് കാര്യങ്ങള്‍ പറഞ്ഞ് മനസിലാക്കി അവരെ മടക്കി അയയ്ക്കുകയായിരുന്നു. ഇവരെ തടഞ്ഞവര്‍ക്കെതിരെ പൊലീസ് കേസ് എടുത്തിട്ടുണ്ട്.

മണ്ഡലകാലം തുടങ്ങി രണ്ടാഴ്ച ആകുമ്പോഴും ഇതുവരെ മലയാളികളായ യുവതികളാരും ദര്‍ശനത്തിനെത്തിയില്ല. അതേസമയം മറ്റ് സംസ്ഥാനങ്ങളില്‍ നിന്നെത്തിയ യുവതികളെ എരുമേലിയിലും മറ്റും ഭക്തര്‍ തടഞ്ഞിട്ടുണ്ട്. ഇന്നെത്തിയവര്‍ ആചാരം അറിയാതെയാണ് എത്തിയതെന്ന് പൊലീസ് പറയുന്നു.