ഇടഞ്ഞ ആനയുടെ തുമ്പിക്കൈ കൊണ്ടുള്ള അടിയേറ്റ് തെറിച്ചുവീണ് ഒന്നാം പാപ്പാന് ദാരുണാന്ത്യം. പാലക്കാട് കോങ്ങാട് പാറശേരി താഴശേരി വീട്ടില്‍ രാജേഷ്‌കുമാറാണ് (42) മരിച്ചത്. പരാക്രമം കാട്ടിയ നിന്ന ആനയുടെ പുറത്തിരുന്ന രണ്ടാം പാപ്പാന്‍ പാലക്കാട് സ്വദേശി ശിവദാസന്‍ മൂന്ന് മണിക്കൂറിന് ശേഷം അദ്ഭുതകരമായി രക്ഷപ്പെട്ടു. മൂന്ന് ദിവസം മുമ്പാണ് ഇയാളെത്തിയത്. തൃശൂര്‍ എല്‍ത്തുരുത്ത് പുതൃക്കോവില്‍ മഹാവിഷ്ണു ക്ഷേത്രത്തിലെ പാര്‍ത്ഥസാരഥി ഇന്നലെ ഉച്ചയ്ക്ക് 1.30 ഓടെ ക്ഷേത്രവളപ്പിലാണ് ഇടഞ്ഞത്. നീരിലായതിനെ തുടര്‍ന്ന് ആറ് മാസമായി തറിയില്‍ തളച്ചിട്ടിരിക്കുകയായിരുന്നു.
15 ദിവസം മുമ്പ് പരിശോധന നടത്തിയ ഫോറസ്റ്റ് ഉദ്യോഗസ്ഥരും ആന ചികിത്സകരും സര്‍ട്ടിഫിക്കറ്റ് നല്‍കിയതിനെ തുടര്‍ന്നാണ് ആനയുടെ കെട്ടഴിച്ചത്. സ്വതവേ ശാന്തസ്വഭാവക്കാരനാണ്. ഇന്നലെ തൊട്ടടുത്തുള്ള ഹോട്ടലില്‍ നിന്ന് ഉച്ചയൂണ് കഴിച്ച് ക്ഷേത്രത്തിലെത്തിയതായിരുന്നു രാജേഷ്‌കുമാര്‍. മാറ്റിക്കെട്ടുന്നതിന് മുന്നോടിയായി ശിവദാസന്‍ ആനയുടെ മുകളില്‍ കയറി. ഈ സമയം ആന തലകുലുക്കി തുമ്പിക്കൈ വീശി. തൊട്ടടുത്തുണ്ടായിരുന്ന രാജേഷ്‌കുമാര്‍ അടിയേറ്റ് കരിങ്കല്‍ത്തറയില്‍ തെറിച്ചുവീണു. ചലനമറ്റ് കിടന്ന ഇയാളെ ആശുപത്രിയിലെത്തിച്ചപ്പോള്‍ മരണം സ്ഥിരീകരിച്ചു. തലയ്‌ക്കേറ്റ ആഘാതമാണ് മരണ കാരണം.
കലിയടങ്ങാതെ നിലയുറപ്പിച്ച പാര്‍ത്ഥസാരഥിയെ പൊലീസും ഫോറസ്റ്റ് ഉദ്യോഗസ്ഥരും ആന ഡോക്ടറും ചേര്‍ന്ന് തളയ്ക്കാന്‍ ശ്രമിച്ചെങ്കിലും വഴങ്ങിയില്ല. മൂന്ന് മണിക്കൂറിനുശേഷം വടമിട്ട് വട്ടംപിടിച്ച് തളയ്ക്കുന്നതിനിടെ ശിവദാസന്‍ ആനപ്പുറത്ത് നിന്ന് ചാടി രക്ഷപ്പെടുകയായിരുന്നു. മുമ്പ് മറ്റൊരു ആനയുടെ കുത്തേറ്റ് ചികിത്സയിലായിരുന്ന രാജേഷ്‌കുമാര്‍ ഏറെക്കാലം പാപ്പാന്‍ ജോലിയില്‍ നിന്ന് വിട്ടു നിന്നിരുന്നു. മൂന്ന് വര്‍ഷം മുമ്പാണ് പാര്‍ത്ഥസാരഥിയുടെ പാപ്പാനായെത്തുന്നത്. ഷീജയാണ് രാജേഷ്‌കുമാറിന്റെ ഭാര്യ. രണ്ട് മക്കളുണ്ട്.