റേഷന്‍ സാധനങ്ങള്‍ മനഃപൂര്‍വം പാവപ്പെട്ടവര്‍ക്ക് നിഷേധിച്ചാല്‍, കടയുടമയുടെ പക്കല്‍ നിന്ന് പണം ഈടാക്കി കാര്‍ഡ് ഉടമക്ക് നല്‍കാനൊരുങ്ങി സര്‍ക്കാര്‍ . ഇതുസംബന്ധിച്ച ഉത്തരവ് ഭക്ഷ്യവകുപ്പ് പുറത്തിറക്കി. റേഷന്‍ ഭക്ഷ്യധാന്യങ്ങള്‍ വ്യാപാരികള്‍ കരിഞ്ചന്തയില്‍ മറിക്കുന്നെന്ന പരാതികളുടെ പശ്ചാത്തലത്തിലാണ് ഈ നടപടി.
റേഷന്‍വ്യാപാരിയുടെ സുരക്ഷാ നിക്ഷേപത്തില്‍ നിന്നോ ഡീലര്‍ കമീഷനില്‍നിന്നോ ആയിരിക്കും റേഷന് തത്തുല്യമായ തുക കാര്‍ഡ് ഉടമക്ക് നല്‍കുക. മനഃപൂര്‍വം റേഷന്‍ വിഹിതം നല്‍കുന്നില്ലെന്ന് ബോധ്യപ്പെട്ടാല്‍ ഗുണഭോക്താവിന് ബന്ധപ്പെട്ട റേഷനിങ് ഇന്‍സ്‌പെക്ടര്‍മാര്‍ക്ക് പരാതി നല്‍കാം. പരാതി സത്യമാണെന്ന് ബോധ്യപ്പെട്ടാല്‍ ഉടമകളില്‍നിന്ന് ഫുഡ് സെക്യൂരിറ്റി അലവന്‍സ് ഈടാക്കാമെന്നും സിവില്‍ സപ്ലൈസ് കമീഷണര്‍ ജില്ല സപ്ലൈ ഓഫിസര്‍ക്ക് കൈമാറിയ സര്‍ക്കുലറില്‍ പറയുന്നു. സംസ്ഥാനത്ത് 5,95,800 ലക്ഷത്തോളം വരുന്ന മഞ്ഞകാര്‍ഡ് ഉടമകളും 29,06 ,709 ലക്ഷം വെള്ളകാര്‍ഡുകാരും ഉള്‍പ്പെടെ 1,54,80,042 പേരാണ് മുന്‍ഗണനപ്പട്ടികയില്‍ ഉള്‍പ്പെട്ടിരിക്കുന്നത്.

മഞ്ഞകാര്‍ഡുകാര്‍ക്ക് പ്രതിമാസം 30 കിലോ അരിയും അഞ്ചു കിലോ ഗോതമ്പും സൗജന്യമായും കൂടാതെ, ഒരു കിലോ പഞ്ചസാര 21 രൂപക്കും റേഷന്‍ കടകള്‍ വഴി വിതരണം ചെയ്യുന്നുണ്ട്.

പിങ്ക് കാര്‍ഡുകാര്‍ക്ക് കാര്‍ഡിലെ ഓരോ അംഗത്തിനും നാല് കിലോ അരിയും ഒരു കിലോ ഗോതമ്പും കി.ഗ്രാമിന് ഒരുരൂപ നിരക്കിലും വിതരണം ചെയ്യേണ്ടതാണ്. എന്നാല്‍, സാധനങ്ങള്‍ എത്തിയിട്ടില്ലെന്നും പറഞ്ഞ് വ്യാപാരികള്‍ ഉപഭോക്താകളെ മടക്കിയയക്കുകയാണ് പതിവ്. ഈ വിഹിതം പിന്നീട് ഇപോസ് യന്ത്രത്തില്‍ മാന്വല്‍ ഇടപാട് നടത്തി കരിഞ്ചന്തയിലേക്ക് മറിക്കും. ഭക്ഷ്യവകുപ്പിന്റെ ലക്ഷ്യം ഇതു തടയുകയെന്നതാണ്.