വരുമാനവര്ധന ലക്ഷ്യമിട്ട് ഇടറോഡുകളിലടക്കം പുതിയ സര്വിസുമായി കെഎസ്ആര്ടിസി
ഗ്രാമീണമേഖലയില് കടന്നുകയറി സാന്നിധ്യം ശക്തമാക്കാനൊരുങ്ങി കെ.എസ്.ആര്.ടി.സി . വരുമാനവര്ധന ലക്ഷ്യമിട്ട് ഇടറോഡുകളിലടക്കം പുതിയ സര്വിസ് ആരംഭിക്കുകയാണ് ലക്ഷ്യം. യാത്രക്കാര് കൂടുതല് ലഭിക്കുമെന്ന് പ്രതീക്ഷിക്കുന്ന മേഖലകളില് കൃത്യമായ സര്വേയുടെയും പഠനത്തിന്റെയും അടിസ്ഥാനത്തിലാകും ബസുകള് അനുവദിക്കുക. 1000 ബസുകളാണ് ഇതിനായി വിന്യസിക്കുക. മേഖല അടിസ്ഥാനത്തിലടക്കം ഇതിനായി പഠനം പുരോഗമിക്കുകയാണെന്നും തച്ചങ്കരി കൂട്ടിച്ചേര്ത്തു. ശബരിമല സീസണ് പൂര്ത്തിയായശേഷം ഇക്കാര്യത്തില് അന്തിമ രൂപരേഖ തയ്യാറാക്കും.
നിലവില് റൂട്ടുകളില്ലാത്തതിനാല് നിരവധി ബസുകള് വിവിധ യൂണിറ്റുകളില് നിര്ത്തിയിട്ടിരിക്കുകയാണ്. റൂട്ട് പഠിക്കാതെ സ്വകാര്യബസുകളുടെ പിന്നാലെ ബസ് അയച്ചതിലൂടെ വലിയ നഷ്ടമുണ്ടാവുകയും ഇടക്കാലത്ത് നിര്ത്തിവെക്കുകയും ചെയ്തവയാണ് ഇവയില് നല്ലൊരു ശതമാനവും. ഇവ പുനര്വിന്യസിക്കാനാണ് തീരുമാനം. കെ.എസ്.ആര്.ടി.സിയുടെ ബസുകള് നല്ലൊരു പങ്കും റെയില്വേ ലൈനിന് സമാന്തരമായാണ്. കിഴക്ക്പടിഞ്ഞാറ് ദിശയിലുള്ള സര്വിസുകള് നന്നേ കുറവും. ഈ പോരായ്മകൂടി പരിഹരിക്കലാണ് ലക്ഷ്യം.
ആദ്യഘട്ടത്തില് പരീക്ഷണാടിസ്ഥാനത്തിലാവും തുടങ്ങുക. ബസുകളുടെ എണ്ണത്തില് ഏറ്റവും പിന്നിലുള്ള കോഴിക്കോട് മേഖലക്കാണ് കൂടുതല് പരിഗണന എന്നാണ് വിവരം. വടക്കന് കേരളത്തില് കെ.എസ്.ആര്.ടി.സിയുടെ സാന്നിധ്യം വര്ധിപ്പിക്കുന്നതിന് സോണല്തലത്തില് നേരത്തേതന്നെ സാധ്യതാപഠനം നടത്തിയിരുന്നു. മലബാര് റൂട്ടുകളില് സ്വകാര്യബസുകള്ക്കാണ് ആധിപത്യം. ഇവിടെ കെ.എസ്.ആര്.ടി.സിക്ക് യാത്രക്കാരെ ആകര്ഷിക്കാന് കഴിയുമെങ്കിലും ഗ്രാമീണ മേഖലയിലേക്കടക്കം മതിയായ ബസുകളില്ലാത്തതാണ് തടസ്സം. കൂടുതല് ബസുകളെത്തുന്നതോടെ സ്ഥിതി മാറും
1000 ബസുകള്കൂടി എത്തുന്നതോടെ സര്വിസ് നടത്തുന്ന കിലോമീറ്റര് വര്ധിക്കും. ഇതോടൊപ്പം ഗ്രാമീണമേഖലയിലെ യാത്രാക്ലേശവും പരിഹരിക്കാനാകുമെന്നാണ് പ്രതീക്ഷിക്കുന്നത്.
"
https://www.facebook.com/Malayalivartha
