പ്രിയങ്കാ ഗാന്ധിയെ കോണ്‍ഗ്രസ് നേതൃത്വത്തിലേക്ക് കൊണ്ടുവന്നത് രാഹുല്‍ഗാന്ധി രാഷ്ട്രീയ എതിരാളികള്‍ക്കുള്ള മാസ്റ്റര്‍ സ്‌ട്രോക്കാണെന്ന് കോണ്‍ഗ്രസ് പ്രവര്‍ത്തക സമിതി അംഗം എ.കെ ആന്റണി. ബി.ജെ.പി സര്‍ക്കാരിനെ എത്രയും വേഗം താഴെയിറക്കുകയാണ് ലക്ഷ്യം. എ.ഐ.സി.സി പുനസംഘടന അതിന് വഴിയൊരുക്കും. സംഘടനാ ചുമതല കെ.സി വേണുഗോപാലിന് നല്‍കിയത് വലിയ ഊര്‍ജ്ജമാണ് പാര്‍ട്ടി പ്രവര്‍ത്തകര്‍ക്ക് നല്‍കുന്നത്. കോണ്‍ഗ്രസില്‍ നെഹ്‌റു കുടുംബത്തിന്റെ ആധിപത്യമാണെന്ന് ഇന്ദിരാഗാന്ധിയുടെ കാലം മുതലേ ഉള്ള ആക്ഷേപമാണ്. അതെല്ലാം പൊതുജനം ചവറ്റുകുട്ടയിലെറിഞ്ഞതാണെന്നും ആന്റണി ചൂണ്ടിക്കാട്ടി.

പ്രിയങ്കയെ ജനറല്‍ സെക്രട്ടറിയായി നിയമിച്ചത് രാഹുല്‍ഗാന്ധിയാണ്, അതുകൊണ്ട് രാഹുലിന് കഴിവില്ലാത്തത് കൊണ്ടാണോ പ്രിയങ്കയെ കൊണ്ടുവന്നത് എന്ന ചോദ്യത്തിന് പ്രസക്തിയില്ലെന്നും അദ്ദേഹം വ്യക്തമാക്കി. പ്രളയത്തില്‍ തകര്‍ന്ന കേരള ജനത നവകേരളത്തിനായി കാത്തിരുന്നെങ്കിലും ശബരിമലയുടെ മറവില്‍ പിണറായി സര്‍ക്കാര്‍ ഭക്തരെ തെരുവിലിറക്കി. മൂന്ന് മാസത്തോളം സംസ്ഥാനം സംഘര്‍ഷാവസ്ഥയിലായിരുന്നു. സുപ്രീംകോടതിയില്‍ നിന്ന് സര്‍ക്കാരിന് സാവകാശം തേടാമായിരുന്നു. അതിന് പകരം വിശ്വാസികളെ പ്രകോപിപ്പിച്ചു. ബി.ജെ.പിയും ആര്‍.എസ്.എസും അത് മുതലെടുക്കുകയും ചെയ്തു. കോണ്‍ഗ്രസ് അപ്പോഴും സംയമനം പാലിച്ചു. അല്ലാതെ ആ കോഴിപ്പോരിലേക്ക് ചാടിയിരുന്നുവെങ്കില്‍ കേരളം കത്തിച്ചാമ്പലാവുമായിരുന്നെന്നും ആന്റണി പറഞ്ഞു.

ആര്‍എസ്എസ് നിയന്ത്രണത്തിലാണ് മോദി ഭരണം നടത്തുന്നത്. അതിനാല്‍ നരേന്ദ്രമോദിയുടെ ഭരണം അവസാനിപ്പിക്കണം. ആര്‍എസ്എസിന്റെ ചട്ടുകമായ സര്‍ക്കാരിനെ താഴെയിറക്കണം. ലോകത്ത് ഏറ്റവും അധികം അസഹിഷ്ണുതയുള്ള രാജ്യങ്ങളുടെ പട്ടികയില്‍ ഇന്ത്യ ഒന്നാമതായി. ദാവോസില്‍ നടന്ന ലോക സാമ്പത്തിക ഫോറത്തിലാണ് ഇക്കാര്യം ചര്‍ച്ചയായത്. മോദി സര്‍ക്കാര്‍ തല്ലി തകര്‍ത്ത ഭാരതത്തെ വീണ്ടും പരസ്പരവിശ്വാസത്തിന്റെയും സഹവര്‍ത്തിത്വത്തിന്റെയും ഭൂമിയാക്കണം. ലോകത്തിലെ എല്ലാ ഭരണഘടനകളും പഠിച്ച ശേഷം ലോകത്തിനാകെ മാതൃകയാക്കി ഉണ്ടാക്കിയ ഇന്ത്യന്‍ ഭരണഘടനയുടെ അടിസ്ഥാന മൂല്യങ്ങള്‍ ഒന്നൊന്നായി ആര്‍എസ്എസ് തകര്‍ത്തു കൊണ്ടിരിക്കുകയാണെന്നും എ.കെ ആന്റണി ആരോപിച്ചു.