ബുദ്ധിപരമായ വെല്ലുവിളി നേരിടുന്ന കുട്ടികള്‍ക്കായി അണ്‍ എയ്ഡഡ് മേഖലയില്‍ നടത്തുന്ന സ്‌പെഷ്യല്‍ സ്‌കൂളുകളുടെ ഭൗതീകവും, അക്കാദമിക്കും ആയ പ്രശ്‌നങ്ങള്‍ പരിഹരിക്കാനുള്ള നടപടികള്‍ സ്വീകരിക്കുന്നതിനായി 27/11/2017 -ല്‍ ബഹു. മുഖ്യമന്ത്രി ഒരു യോഗം വിളിക്കുകയും, യോഗ തീരുമാന പ്രകാരം ഇത്തരം സ്‌കൂളുകള്‍ക്കായി ഒരു സമഗ്ര ആശ്വാസ പാക്കേജ് ആരോഗ്യ, വിദ്യാഭ്യാസ വകുപ്പുകളുടെ സഹകരണത്തോടെ സാമൂഹ്യനീതി വകുപ്പിന് വേണ്ടി സാമൂഹ്യ സുരക്ഷാ മിഷന്‍ തയ്യാറാക്കുകയും ചെയ്തിട്ടുണ്ട്. 9/8/2018 - ല്‍ ബഹു. മുഖ്യമന്ത്രിയുടെ അധ്യക്ഷതയില്‍ ചേര്‍ന്ന യോഗം പ്രസ്തുത പാക്കേജിന് തത്വത്തില്‍ അംഗീകാരം നല്‍കിയിട്ടുണ്ട്. ഇപ്രകാരം അംഗീകരിച്ച പാക്കേജില്‍ ഉള്‍ക്കൊള്ളിച്ചിട്ടുള്ള പ്രവര്‍ത്തങ്ങള്‍ ചുവടെ ചേര്‍ക്കുന്നു.

1) കുട്ടികളുടെ എണ്ണം, ലഭ്യമായ അടിസ്ഥാന സൗകര്യങ്ങള്‍ അധ്യാപകരുടെ എണ്ണം, യോഗ്യത എന്നിവ അനുസരിച്ച് സ്‌കൂളുകളെ A,B,C എന്നീ മൂന്ന് ഗ്രേഡുകളായി തരം തിരിക്കുന്നതാണ്,
2) എ ഗ്രേഡ് സ്‌കൂളുകള്‍ക്ക് പ്രതിവര്‍ഷം 83,05,200/- രൂപയും ബി ഗ്രേഡ് സ്‌കൂളുകള്‍ക്ക് പ്രതിവര്‍ഷം 51,55,200/- രൂപയും സി ഗ്രേഡ് സ്‌കൂളുകള്‍ക്ക് പ്രതിവര്‍ഷം 19,47,600/- രൂപയും പ്രതിവര്‍ഷം ഗ്രാന്റായി നല്‍കുന്ന നിര്‍ദ്ദേശങ്ങള്‍ ഗവണ്‍മെന്റിന്റെ സജീവ പരിഗണനയിലാണ്. ആരോഗ്യ വകുപ്പിലേയും വിദ്യാഭ്യാസ വകുപ്പിലേക്കും ഉദ്യോഗസ്ഥര്‍ ഉള്‍പ്പെടുന്ന ഒരു ടീം സ്‌കൂളുകള്‍ സന്ദര്‍ശിച്ച് കുട്ടികളുടെ എണ്ണം, അടിസ്ഥാന സൗകര്യങ്ങള്‍, അധ്യാപകരുടെ എണ്ണം തുടങ്ങിയവ വിലയിരുത്തിയ ശേഷമാണ് സ്‌കൂളുകളെ ഗ്രേഡ് ചെയ്യുന്നത്.
3) പാങ്ങപ്പാറയിലുള്ള സ്റ്റേറ്റ് ഇന്‍സ്റ്റിറ്റിയൂട്ട് ഓഫ് മെന്റലി ചലഞ്ച്ഡ് എന്ന സ്ഥാപനത്തെ സ്‌പെഷ്യല്‍ എഡ്യൂക്കേറ്റര്‍മാര്‍ക്കുള്ള പരിശീലനം തുടങ്ങിയവയ്ക്കുള്ള കേന്ദ്രമാക്കി മാറ്റുന്നതാണ്. ഈ സ്ഥാപനത്തിനെ സാമൂഹിക നീതി വകുപ്പിന്റെ കീഴില്‍ ഒരു മികവിന്റെ കേന്ദ്രമായി മാറ്റാനും പദ്ധതിയുണ്ട്.

05/01/2019 -ല്‍ പാക്കേജ് നടത്തിപ്പ് അവലോകനം ചെയ്യുന്നതിനും വീണ്ടും യോഗം ചേരുകയും എത്രയും വേഗം ഗ്രേഡിംഗ് പൂര്‍ത്തിയാക്കി ഗ്രാന്റ് നല്‍കുന്നതിനുള്ള നടപടികള്‍ സ്വീകരിക്കാനുള്ള പ്രവര്‍ത്തനങ്ങള്‍ നടന്നു വരുന്നു.

2018-19 വര്‍ഷത്തെ ബഡ്ജറ്റില്‍ സ്‌പെഷ്യല്‍ സ്‌കൂളുകള്‍ക്കുള്ള പ്രത്യേക ധനസഹായമായി 40 കോടി രൂപവകയിരുത്തിയിട്ടുണ്ട്. പ്രസ്തുത തുക ഈ പാക്കേജിന്റെ നടത്തിപ്പിനായി വിനിയോഗിക്കാനാണ് തീരുമാനിച്ചിട്ടുള്ളത്. മുന്‍ വര്‍ഷങ്ങളില്‍ നല്‍കി വന്നിരുന്ന 13 കോടി രൂപ കൃത്യമായി നല്‍കിയിട്ടുണ്ട്. അധികമായി വകയിരുത്തിയ തുക വീതിക്കുന്നതിനുള്ള പുതിയ ഗ്രേഡിംഗ് സംവിധാനം കൊണ്ടുവരുന്നതാണ്.