റിയാദില് ചികിത്സയിലിരിക്കെ ഇറങ്ങിപ്പോയ മലയാളി യുവാവ് മരിച്ച നിലയില്
സൗദിയില് ആശുപത്രിയില് ചികിത്സയിലിരിക്കെ ഇറങ്ങിപ്പോയി മാസങ്ങളോളം അലഞ്ഞുതിരിഞ്ഞ മലയാളി യുവാവിനെ മരിച്ച നിലയില് കണ്ടെത്തി. തൃശൂര് ഒല്ലൂര് പാലക്കല് പരേതനായ തോമസിന്റെ മകന് ടിന്സന് (38) ആണ് മരിച്ചത്. റിയാദ് ബത്ഹയിലെ ബഹുനില കെട്ടിടത്തിന്റെ വരാന്തയിലാണ് ഇയാളെ മരിച്ചനിലയില് കണ്ടെത്തിയത്. മൃതദേഹം ആശുപത്രിയിലേക്ക് മാറ്റി. കഴിഞ്ഞ മേയ് 18ന് അബോധാവസ്ഥയിലായ ടിന്സനെ റിയാദിലെ സ്വകാര്യ ആശുപത്രിയില് നിന്ന് വിദഗ്ധ ചികിത്സയ്ക്കായി ശുമൈസി ആശുപത്രിയിലേക്ക് മാറ്റിയിരുന്നു.
തീവ്രപരിചരണവിഭാഗത്തിലെ ചികിത്സയ്ക്ക് ശേഷം ആരോഗ്യനില മെച്ചപ്പെട്ടതിനെ തുടര്ന്ന് ഇയാളെ ജനറല് വാര്ഡിലേക്ക് മാറ്റി. എന്നാല് പൂര്ണമായി ഓര്മശക്തി വീണ്ടെടുക്കുന്നതിന് മുന്പ് ഇയാള് ആശുപത്രിയില് നിന്ന് ഇറങ്ങിപ്പോവുകയായിരുന്നു.
സൗദിയിലെത്തിയിട്ട് അഞ്ചുവര്ഷമായ ടിന്സന് രണ്ടുവര്ഷം മുന്പുവരെ റിയാദ് എക്സിറ്റ് 17ലെ ടയര് കടയിലായിരുന്നു ജോലി ചെയ്തിരുന്നത്. താമസരേഖയായ ഇഖാമയുടെ കാലാവധി കഴിഞ്ഞും രാജ്യത്ത് തുടര്ന്നതിനാല് ഇയാളെക്കുറിച്ചുള്ള കൃത്യമായ വിവരങ്ങള് ലഭ്യമായിരുന്നില്ല. ജോലിയും പണവും ഇല്ലാത്തതിനാല് നാട്ടിലേക്ക് പോകാന് കഴിയാത്തതിന്റെ കടുത്തമാനസിക വിഷമത്തിലായിരുന്നു ഇയാളെന്നാണ് വിവരം.
https://www.facebook.com/Malayalivartha
