തുണിക്കടകളില് ജോലി ചെയ്യുന്ന സ്ത്രീകള് അടക്കമുള്ളവര്ക്ക് ഇരിക്കാനുള്ള സൗകര്യം നല്കണമെന്ന സര്ക്കാര് ഉത്തരവിന് പുല്ലുവില, സംസ്ഥാനത്തെ പ്രമുഖ വസ്ത്രസ്ഥാപനങ്ങളടക്കം ഉത്തരവ് നടപ്പാക്കിയില്ല
തുണിക്കടകളിലും മറ്റും ജോലി ചെയ്യുന്ന സ്ത്രീകള് അടക്കമുള്ളവര്ക്ക് ഇരിക്കാനുള്ള സൗകര്യം നല്കണമെന്ന സര്ക്കാര് ഉത്തരവിന് പുല്ലുവില. സംസ്ഥാനത്തെ പ്രമുഖ വസ്ത്രസ്ഥാപനങ്ങളടക്കം ഉത്തരവ് നടപ്പാക്കിയില്ല. തൊഴില്മന്ത്രി ടിപി രാമകൃഷ്ണന്റെ നിര്ദ്ദേശപ്രകാരം തൊഴില്വകുപ്പ് നടത്തിയ പരിശോധനയിലാണ് നിരവധി സ്ഥാപനങ്ങളില് നിയമലംഘനം കണ്ടെത്തിയത്. കഴിഞ്ഞ ദിവസത്തെ പരിശോധനയില് വിവിധ ജില്ലകളിലായി 121 സ്ഥാപനങ്ങള് നിയമലംഘനം നടത്തിയതായി കണ്ടെത്തി. അതേസമയം 237 സ്ഥാപനങ്ങളില് തൊഴിലാളികള്ക്ക് ഇരിപ്പിടം ഒരുക്കിയിട്ടുമുണ്ട്.
തിരുവനന്തപുരത്ത് പരിശോധന നടത്തിയ 13 സ്ഥാപനങ്ങളില് ഒരിടത്ത് മാത്രമാണ് ഇരിപ്പിടമില്ലാത്തതായി കണ്ടെത്തിയത്. ഇരിക്കാനുള്ള അവകാശത്തിനായി സ്ത്രീകള് സമരം നടത്തിയ ആലപ്പുഴയില് 42 സ്ഥാപനങ്ങളിലെ പരിശോധനയില് എട്ടിടത്തും തൃശൂരില് 15 സ്ഥാപനങ്ങളില് അഞ്ചിടത്തും നിയമലംഘനം തുടരുകയാണ്. കോഴിക്കോട് 56 സ്ഥാപനങ്ങളിലെ പരിശോധനയില് 19 ഇടങ്ങളിലും ഇരിപ്പിടമില്ല. മറ്റ് ജില്ലകളിലും തൊഴില്വകുപ്പ് പരിശോധന നടത്തുകയും നിയമലംഘനങ്ങള് രേഖപ്പെടുത്തുകയും ചെയ്തു.
തൊഴിലാളികള്ക്ക് സൗകര്യം ഉറപ്പാക്കിയിട്ടില്ലെന്ന് കണ്ടെത്തിയ എല്ലാ സ്ഥാപനങ്ങള്ക്കും അടിയന്തര നടപടി സ്വീകരിക്കാന് വകുപ്പ് നോട്ടീസ് നല്കി. വരും ദിവസങ്ങളിലും പരിശോധന തുടരുമെന്ന് അധികൃതര് അറിയിച്ചു. തുണിക്കടകളില് ജോലി ചെയ്യുന്നവര്ക്ക് ഇരിയ്ക്കാന് സൗകര്യം നല്കണമെന്നും കടകളില് പണി ചെയ്യുന്നവര്ക്ക് ആഴ്ചയിലൊരിക്കല് അവധി നല്കണമെന്നുമാണ് സര്ക്കാര് നിര്ദ്ദേശം. വളരെക്കാലമായി ഈ മേഖലയിലുളള തൊഴിലാളികള് ഉന്നയിച്ചുകൊണ്ടിരുന്ന ആവശ്യമാണ് സര്ക്കാര് നടപ്പിലാക്കിയത്. കേരള ഷോപ്സ് ആന്ഡ് എസ്റ്റാബ്ലിഷ്മെന്റ് ആക്ടില് ഭേദഗതി വരുത്തിയായിരുന്നു.
വസ്ത്രവ്യാപാര സ്ഥാപനങ്ങളിലും ജൂവലറികളിലും റസ്റ്റോറന്റുകളിലും അടക്കമുള്ള സ്ഥാപനങ്ങളില് തൊഴിലിടങ്ങളികള്ക്ക് ഇരിക്കാന് സൗകര്യമില്ലാത്തതിനെ തുടര്ന്ന് കോഴിക്കോട്ട് വസ്ത്രവ്യാപാര സ്ഥാപനത്തില് ജോലി ചെയ്യുന്ന വിജി ആണ് ആദ്യം പ്രതിഷേധം സംഘടിപ്പിച്ചത്. തുടര്ന്നാണ് ജീവനക്കാര്ക്ക് ഇരിപ്പിടം അവകാശമാക്കി സര്ക്കാര് നിയമഭേദഗതി വരുത്തിയത്. വസ്ത്രസ്ഥാപനങ്ങളിലും ജൂവലറികളിലും മറ്റും പത്ത് മണിക്കൂറിലധികം സ്ത്രീകള് നിന്ന് ജോലി ചെയ്യുന്നെന്ന് വ്യാപകപരാതിയുണ്ടായിരുന്നു. ഇതേ തുടര്ന്ന് തൊഴിലാളികള് പല സ്ഥാപനങ്ങളുടെയും മുന്നില് പ്രതിഷേധസമരം നടത്തിയിരുന്നു. തുടര്ന്ന് വിവിധ സംഘടനകളും സാമൂഹ്യപ്രവര്ത്തകരും തൊഴില് വകുപ്പിന് പരാതി നല്കിയിരുന്നു.
ആഴ്ചയില് ഒരുദിവസം കടകള് അടച്ചിടണമെന്ന വ്യവസ്ഥ ഒഴിവാക്കി തൊഴിലാളികള്ക്ക് ഒരുദിവസം അവധി അനുവദിക്കണമെന്ന വ്യവസ്ഥയും നിയമത്തില് ഉള്പ്പെടുത്തിയിരുന്നു. കടകള്, ഹോട്ടല്, റസ്റ്ററന്റ് , ജൂവലറി എന്നിവിടങ്ങളില് ഉള്പ്പെടെ ജോലി ചെയ്യുന്ന സ്ത്രീകള് ലൈംഗികപീഡനത്തിന് ഇരയാകുന്നത് തടയാനുള്ള കര്ശന വ്യവസ്ഥയും നിയമം വഴി ഭേദഗതി ചെയ്തിരുന്നു. രാത്രി ഒമ്പതിന് ശേഷവും രാവിലെ ആറിന് മുമ്പും സ്ത്രീകളെ ജോലിക്ക് നിയോഗിക്കുന്നതിന് നിയന്ത്രണമേര്പ്പെടുത്തും. അഞ്ച് പേരെങ്കിലുമുള്ള ഗ്രൂപ്പുണ്ടെങ്കിലേ ഈ സമയത്ത് സ്ത്രീകളെ ജോലിക്ക് നിയോഗിക്കാവൂ. ഈ അഞ്ചുപേരില് രണ്ടു സ്ത്രീകള് വേണമെന്നും തൊഴില് വകുപ്പ് പറഞ്ഞിരുന്നു. അത് ഇതുവരെ നടപ്പാക്കിയിട്ടില്ല.
https://www.facebook.com/Malayalivartha
