ഇനിയും മിണ്ടിയാല്... എന്എസ്എസ് സമദൂരം വിട്ട് ശരിദൂരത്തിലേക്ക് പോകുമ്പോള് ഞെട്ടലോടെ മുന്നണികള്; ചെറിയ വോട്ട് ശതമാനം പോലൂം വിജയത്തെ ബാധിക്കുമെന്നിരിക്കെ ഭക്തരെ ഇളക്കി സുകുമാരന് നായരെ പ്രകോപിപ്പിച്ച സിപിഎം കനത്ത വില നല്കേണ്ടി വരുമെന്ന് റിപ്പോര്ട്ട്
ഇത്തവണത്തെ തെരഞ്ഞെടുപ്പില് ഏറ്റവുമധികം ചര്ച്ച ചെയ്യുന്നത് ശബരിമല വിഷയം തന്നെയാണ്. ഭക്തരെ ഇളക്കി കോണ്ഗ്രസ് വോട്ട് ചോര്ത്താനുള്ള പിണറായി വിജയന്റെ തന്ത്രം വിജയിക്കുമോ എന്നാണ് സകലരും ഉറ്റു നോക്കുന്നത്. ഇക്കാര്യത്തിലും എന്എസ്എസിന്റെ നിലപാട് വലിയ നര്ണായകമാകും.
ശബരിമലയിലെ യുവതീപ്രവേശത്തില് തുടങ്ങിയ സി.പി.എം.എന്.എസ്.എസ്. ഭിന്നത തിരഞ്ഞെടുപ്പിലും പ്രതിഫലിച്ചേക്കുമെന്നാണ് വിലയിരുത്തല്. സമദൂരവും അതിനകത്തുനിന്നുകൊണ്ടുള്ള ശരിദൂരവുമായിരുന്നു മുമ്പ് എന്.എസ്.എസിന്റെ പ്രഖ്യാപിത നയം. ഇതിന്റെ ഗുണദോഷങ്ങള് യു.ഡി.എഫും എല്.ഡി.എഫും അനുഭവിച്ചിട്ടുണ്ട്. ഏതെങ്കിലും ഒരു മുന്നണിയെ പിന്തുണയ്ക്കുകയോ എതിര്ക്കുകയോ എന്.എസ്.എസിന്റെ നയമായിരുന്നില്ല. എന്നാല്, ഇടതുമുന്നണിയുമായി നേരിട്ട് ഇടഞ്ഞത് അവരുടെ സമദൂര സിദ്ധാന്തത്തില് മാറ്റംവരുത്തുകയാണ്.
എന്.എസ്.എസ്. നേതൃത്വംപറഞ്ഞാല് കേള്ക്കുന്നവരല്ല അണികള് എന്ന ഇടതുമുന്നണി കണ്വീനര് എ. വിജയരാഘവന്റെ പ്രസ്താവനയും അത് അടുത്ത തിരഞ്ഞെടുപ്പ് തെളിയിക്കുമെന്ന എന്.എസ്.എസ്. ജനറല് സെക്രട്ടറി ജി. സുകുമാരന് നായരുടെ മറുപടിയും സാമുദായിക വോട്ട് ധ്രുവീകരണത്തിന് വഴിവെക്കും. സി.പി.എം. സംസ്ഥാന സെക്രട്ടറി കോടിയേരി ബാലകൃഷ്ണനാകട്ടെ ഒരുപടികൂടി കടന്നു. എന്.എസ്.എസ്. രാഷ്ട്രീയപ്പാര്ട്ടി രൂപവത്കരിച്ചശേഷം രാഷ്ട്രീയനിലപാട് എടുക്കുന്നതായിരിക്കും നല്ലതെന്നുപറഞ്ഞ അദ്ദേഹം എന്.എസ്.എസിന്റെ അണികളെക്കൊണ്ടുതന്നെ അവരുടെ രാഷ്ട്രീയതാത്പര്യങ്ങളെ എതിര്ക്കുമെന്ന മുന്നറിയിപ്പും നല്കി.
സമദൂരം വിടുന്ന എന്.എസ്.എസ്. ഏതു ദിശയിലേക്ക് നീങ്ങുമെന്നതാണ് കാണേണ്ടത്. ഇടതുമുന്നണിക്കെതിരായ നിലപാടിന്റെ ഗുണം ലഭിക്കുമെന്നാണ് യു.ഡി.എഫിന്റെ പ്രതീക്ഷ. എന്നാല്, ചില മണ്ഡലങ്ങളില് അത് അനുകൂലമാകുമെന്ന് ബി.ജെ.പി.യും പ്രതീക്ഷിക്കുന്നു. പ്രത്യേകിച്ചും എന്.എസ്.എസിന്റെ ദീര്ഘകാല ആവശ്യമായ മുന്നാക്കസംവരണം കേന്ദ്രം നടപ്പാക്കിയ സാഹചര്യത്തില്. എന്.എസ്.എസിനുകൂടി സ്വീകാര്യമാകുന്ന സ്ഥാനാര്ഥിനിര്ണയത്തിനാണ് ഇരുകൂട്ടരും ശ്രമിക്കുന്നത്.
എന്.എസ്.എസ്. കടുത്ത രാഷ്ട്രീയ നിലപാടെടുത്താല് അത് എതിര്പാളയത്തിലുണ്ടാക്കുന്ന ചലനവും വലുതായിരിക്കും. സര്ക്കാരിന്റെ നവോത്ഥാന സമിതിയില് സഹകരിക്കുന്ന മറ്റ് സാമുദായിക സംഘടനകള് കൂടുതലായി ഇടതുമുന്നണിയോട് അടുക്കാം. ന്യൂനപക്ഷവോട്ടും ഇടതുമുന്നണി ലക്ഷ്യമിടുന്നു. പുരോഗമന ചിന്താഗതിക്കാരുടെയും സ്ത്രീകളുടെയും വലിയപിന്തുണ ആര്ജിക്കാമെന്നും ഇടതുമുന്നണി കണക്കുകൂട്ടുന്നു.
ചെങ്ങന്നൂര് ഉപതിരഞ്ഞെടുപ്പുവരെ എന്.എസ്.എസും സി.പി.എമ്മും നല്ല ബന്ധത്തിലായിരുന്നു. ശബരിമലയില് ആചാരസംരക്ഷണത്തിനായി നേരത്തേമുതല് നിലകൊള്ളുന്ന എന്.എസ്.എസ്. എതിര്ക്കുമെന്ന് അറിഞ്ഞുകൊണ്ടുതന്നെയാണ് സര്ക്കാര് യുവതീപ്രവേശത്തിനായി നിലകൊണ്ടതും. പ്രതിഷേധ കൂട്ടായ്മകളായി വന്ന നാമജപഘോഷയാത്രയും അതില് സംഘപരിവാര് പങ്കാളിത്തവും വന്നതോടെ സി.പി.എം. എന്.എസ്.എസിനെ വിമര്ശിച്ചുതുടങ്ങി.
എസ്.എന്.ഡി.പി. യോഗമടക്കമുള്ള സംഘടനകളെ ചേര്ത്ത് സര്ക്കാര് നവോത്ഥാനസമിതി രൂപവത്കരിക്കുകയും വനിതാമതില് തീര്ക്കുകയും ചെയ്തതോടെ അകല്ച്ച വര്ധിച്ചു. ശബരിമലയില് യുവതികള് കയറിയതോടെ അകല്ച്ച പൂര്ണമായി.
എന്എസ്എസിന്റെ നിലപാട് മാറ്റം സിപിഎമ്മിനെ അങ്കലാപ്പിലാക്കുന്നുണ്ട്. ഇതിന് പിന്നാലെയാണ് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് ശക്തമായ ഭാഷയില് രംഗത്തെത്തിയയത്. എന്എസ്എസ് ഭയപ്പെടുത്താനോ വിരട്ടാനോ നില്ക്കണ്ടെന്നെണ് കോടിയേരി പറഞ്ഞത്. സമുദായ സംഘടന രാഷ്ട്രീയത്തില് ഇടപെടേണ്ട. രാഷ്ട്രീയത്തില് ഇടപെടാനാണെങ്കില് രാഷ്ട്രീയ പാര്ട്ടി രൂപീകരിക്കണമെന്നും കോടിയേരി പറഞ്ഞു. എന്എസ്എസിന്റെ കമ്മ്യൂണിസ്റ്റ് വിരുദ്ധ നിലപാടുകള് ജനങ്ങള്ക്ക് മുന്നില് തുറന്നു കാട്ടുമെന്നും കോടിയേരി ബാലകൃഷണന് പറഞ്ഞു.
അതേസമയം, എന്എസ്എസിനെ തുടര്ച്ചയായി ആക്രമിക്കുന്ന ഇടത് നേതാക്കള്ക്കെതിരെ ജി.സുകുമാരന് നായരും രൂക്ഷ വിമര്ശനവുമായി രംഗത്തെത്തി. എന്എസ്എസിനെക്കുറിച്ച് അറിവില്ലാത്തവരും രാഷ്ട്രീയ ലാഭത്തിനായി കളവു പറയുന്ന വരുമാണ് വിമര്ശനങ്ങള്ക്ക് പിന്നിലെന്ന് സുകുമാരന് നായര് പ്രതികരിച്ചു. എന്എസ്എസിന്റെ സ്വാധീനം തിരഞ്ഞെടുപ്പില് ബോധ്യപ്പെടുമെന്നും മുന്നറിയിപ്പ് നല്കിയിട്ടുണ്ട്.
"
https://www.facebook.com/Malayalivartha
