ലേക്ക് പാലസ് റിസോര്ട്ടിലേക്ക് റോഡ് നിര്മിച്ച കേസിന്റെ എഫ്.ഐ.ആര് റദ്ദാക്കണമെന്ന് ആവശ്യപ്പെട്ട് ഹര്ജി നല്കിയ ശേഷം വിധി പറയുന്നതിന് മുമ്പ് പിന്വലിക്കാനെത്തിയ മുന് മന്ത്രി തോമസ് ചാണ്ടിക്ക് ഹൈക്കോടതിയുടെ രൂക്ഷവിമര്ശനവും പിഴയും
നെല്വയല് തണ്ണീര്തട സംരക്ഷണ നിയമം ലംഘിച്ച് ആലപ്പുഴ ലേക്ക് പാലസ് റിസോര്ട്ടിലേക്ക് റോഡ് നിര്മിച്ച കേസിന്റെ എഫ്.ഐ.ആര് റദ്ദാക്കണമെന്ന് ആവശ്യപ്പെട്ട് ഹര്ജി നല്കിയ ശേഷം വിധി പറയുന്നതിന് മുമ്പ് പിന്വലിക്കാനെത്തിയ മുന് മന്ത്രി തോമസ് ചാണ്ടിക്ക് ഹൈക്കോടതിയുടെ രൂക്ഷവിമര്ശനം. തോമസ് ചാണ്ടി അടക്കമുള്ള ഹര്ജിക്കാരുടേത് നല്ല കീഴ് വഴക്കമല്ലെന്നും കേസില് തിങ്കളാഴ്ച വിധിപറയാനിരിക്കെ ഹര്ജി പിന്വലിച്ചതിനാല് കോടതിയുടെ സമയം പാഴാക്കിയതിന് 25,000 രൂപാ വീതം ഓരോരുത്തരും പിഴ നല്കണമെന്നും കോടതി നിര്ദ്ദേശിച്ചു. പത്ത് ദിവസത്തിനകം പിഴ അടയ്ക്കണം. ഹര്ജിക്കാരില് ഒരാളായ ജിജിമോന് വര്ഗീസ് നല്കിയ ഹര്ജി പരിഗണിക്കാത്തതിനാല് പിഴ അടയ്ക്കേണ്ടെന്നും കോടതി പറഞ്ഞു.
നെല്വയല് തണ്ണീര്തട സംരക്ഷണ നിയമം ലംഘിച്ച് നിയമവിരുദ്ധമായി റോഡ് നിര്മിച്ചെന്ന കേസില് ലേക്ക് പാലസ് ഡയറക്ടര് കൂടിയായ തോമസ് ചാണ്ടി എം.എല്.എയും മക്കളായ ടോബി ചാണ്ടിയും ബെറ്റി ചാണ്ടിയും ജോസ് മാത്യു ജിജിമോന് വര്ഗീസ് എന്നിവരാണ് വിജിലന്സ് എഫ്.ഐ.ആര് റദ്ദാക്കണമെന്ന് ആവശ്യപ്പെട്ട് ഹരജികള് നല്കിയത്. ഹര്ജി പിന്വലിക്കാന് പരാതിക്കാര്ക്ക് അവകാശമുണ്ടെന്നും കോടതി പറഞ്ഞു. വിധി അനുകൂലമാകില്ലെന്ന നിയമോപദേശത്തിന്റെ അടിസ്ഥാനത്തിലാണ് ഹരജികള് പിന്വലിച്ചതെന്നാണ് സൂചന. നെല്പ്പാടം നികത്തി വലിയകുളം മുതല് സീറോ ജെട്ടി വരെ റോഡ് നിര്മിച്ചെന്ന് ആരോപിച്ച് റജിസ്റ്റര് ചെയ്ത കേസില് തോമസ് ചാണ്ടിയും ആലപ്പുഴ മുന് കലക്ടറും ഉള്പ്പെടെ 22 പേരാണ് പ്രതികള്.
അഡ്വ. സുഭാഷ് തെക്കേക്കാടന് നല്കിയ പരാതിയില് നടത്തിയ പ്രാഥമിക അന്വേഷണത്തിന് ശേഷമാണ് വിജിലന്സ് കേസ് രജിസ്റ്റര് ചെയ്തത്. മാസങ്ങളായി വാദം കേട്ട ശേഷമാണ് ഹൈക്കോടതി തിങ്കളാഴ്ച വിധി പറയാന് തീരുമാനിച്ചത്. കായല് കയ്യേറി റോഡ് നിര്മിച്ച തോമസ് ചാണ്ടിക്കെതിരെ ഹൈക്കോടതിയില് നിന്ന് പരാമര്ശം ഉണ്ടായതിനെ തുടര്ന്നാണ് അദ്ദേഹം രാജിവെച്ചത്. ലേക് പാലസ് ഹോട്ടല് നിലംനികത്തി നിര്മ്മിച്ച പാര്ക്കിംങ് ഗ്രൌണ്ട് പൊളിക്കണമെന്ന് പിന്നീട് സര്ക്കാര് ആവശ്യപ്പെട്ടു. ഗ്രൗണ്ട് പൂര്വസ്ഥിതിയിലാക്കണമെന്ന് ആലപ്പുഴ മുന്കളക്ടര് ടിവി അനുപമ നല്കിയ റിപ്പോര്ട്ട് പ്രകാരമായിരുന്നു നടപടി. കളക്ടറുടെ റിപ്പോര്ട്ടിനെതിരെ തോമസ് ചാണ്ടി നല്കിയ അപ്പീലും സര്ക്കാര് തള്ളിയിരുന്നു.
കളക്ടറുടെ റിപ്പോര്ട്ട് റദ്ദാക്കണമെന്നും നിലം നികത്തല് സാധൂകരിക്കണമെന്നും ആവശ്യപ്പെട്ട് തോമസ് ചാണ്ടി ഹൈക്കോടതിയെ സമീപിച്ചിരുന്നു. എന്നാല് സര്ക്കാരാണ് തീരുമാനമെടുക്കേണ്ടതെന്ന് കോടതി പറഞ്ഞു. തുടര്ന്നാണ് സര്ക്കാരില് അഭയംപ്രാപിച്ചത്. തോമസ് ചാണ്ടി ചെയര്മാനായ വാട്ടര്വേള്ഡ് ടൂറിസം കമ്പനിയാണ് ആലപ്പുഴ കരിവേലി പാടശേഖരം നികത്തി ലേക്ക് പാലസ് റിസോര്ട്ടിന് വേണ്ടി പാര്ക്കിംങ് ഗ്രൗണ്ട് പണിതത്. മുക്കാലേക്കറോളം പാടം നികത്തിയാണ് പാര്ക്കിംങ് ഏരിയ നിര്മ്മിച്ചതെന്ന് ആലപ്പുഴ മുന് ജില്ലാകളക്ടര് ടിവി അനുപമ സര്ക്കാരിന് റിപ്പോര്ട്ട് നല്കിയിരിന്നു.
തനിക്കെതിരെ പരാമര്ശം നടത്തിയ ഹൈക്കോടതി ജഡ്ജി ദേവന് രാമചന്ദ്രനെതിരെ തോമസ് ചാണ്ടി ചീഫ് ജസ്റ്റിസിന് പരാതിയും നല്കിയിരുന്നു. ജസ്റ്റിസ് ദേവന് രാമചന്ദ്രന് പക്ഷപാതപരമായാണ് പെരുമാറിയതെന്നായിരുന്നു പരാതി. താന് രാജിവെക്കണമെന്ന ഉദ്ദേശത്തോടെയാണ് ജഡ്ജി പരാമര്ശം നടത്തിയതെന്നും പരാതിയില് ആരോപിച്ചിരുന്നു. മുമ്പ് താന് മാത്തൂര് ദേവസ്വം ഭൂമി കയ്യേറിയെന്ന കേസില് ദേവസം അഭിഭാഷകനായി ദേവന് രാമചന്ദ്രന് ഹാജരായിരുന്നു. അതിനാല് അന്നത്തെ അറിവ് വെച്ചാണ് അദ്ദേഹം പരാമര്ശം നടത്തിയതെന്നും ആരോപിച്ചിരുന്നു.
https://www.facebook.com/Malayalivartha
