പ്രാര്‍ത്ഥനകളുടെ ഹൃദയകലശങ്ങളില്‍ പുണ്യനിവേദ്യവുമായി നാളെ ആറ്റുകാല്‍ പൊങ്കാലയുടെ അനുഗ്രഹ
ദിനം. ദശലക്ഷക്കണക്കിനു സ്ത്രീഭക്തരുടെ വ്രതനിഷ്ഠയില്‍ ആത്മസമര്‍പ്പണത്തിന്റെ അഗ്‌നിജ്വലനം. തോറ്റംപാട്ടിന്റെ ശീലുകളില്‍ പാണ്ഡ്യരാജ നിഗ്രഹത്തോടെ കണ്ണകീചരിതം പൂര്‍ണമാകുമ്പോള്‍, നാളെ രാവിലെ 9.45ന് പുണ്യാഹത്തോടെ പൊങ്കാല ചടങ്ങുകള്‍ക്കു തുടക്കമാകും.രണ്ടു ദിസവം മുമ്പേയെത്തി, ക്ഷേത്രപരിസരത്ത് അടുപ്പുകൂട്ടി കാത്തിരിക്കുന്നവരുണ്ട്.
വിവിധ ജില്ലകളില്‍ നിന്നും മറ്റു സംസ്ഥാനങ്ങളില്‍ നിന്നും വിദേശത്തു നിന്നു പോലും നേരത്തേയെത്തി ഹോട്ടലുകളിലും ബന്ധുവീടുകളിലും താമസിച്ച് പൊങ്കാലയ്ക്ക് ഒരുങ്ങുന്നവരുണ്ട്. നാളെ പുലരും വരെ അനന്തപുരത്തിന്റെ വഴികളെല്ലാം ചെറുനദികളായൊഴുകി നഗരത്തെ പൊങ്കാല അടുപ്പുകളുടെ അനന്തസമുദ്രമാക്കും.തന്ത്രി തെക്കേടത്ത് കുഴിക്കാട്ട് പരമേശ്വരന്‍ വാസുദേവന്‍ ഭട്ടതിരിപ്പാട് ശ്രീകോവിലില്‍ നിന്ന് പകര്‍ന്നു കൈമാറുന്ന ദീപത്തില്‍ നിന്ന് മേല്‍ശാന്തി വിഷ്ണു നമ്പൂതിരിയാണ് വലിയതിടപ്പള്ളിയിലെ അടുപ്പു കത്തിക്കുക. ചെറിയ തിടപ്പള്ളിയിലെ അടുപ്പ് ജ്വലിപ്പിക്കുന്നത് സഹമേല്‍ശാന്തിയാണ്. ഇവിടെനിന്ന് 10.15ന് പണ്ടാരയടുപ്പിലേക്ക് തീ പകരും. ഈ തീയാണ് അനന്തപുരിയെ ഒരൊറ്റ ഹോമകുണ്ഡമാക്കി ലക്ഷക്കണക്കിന് പൊങ്കാല അടുപ്പുകളിലേക്ക് പകര്‍ന്നെത്തുക.

ചെണ്ടമേളം മുറുകവേ, പൊങ്കാലത്തുടക്കമറിയിച്ച് വെടിക്കെട്ട് മുഴങ്ങും. ആകാശവും വായുവും അഗ്‌നിയും വെള്ളവും മണ്ണും ചേര്‍ന്ന പഞ്ചഭൂതങ്ങളെ സാക്ഷിയാക്കി, മണ്‍കലങ്ങളില്‍ തിളയ്ക്കുന്ന പെങ്കാല ആറ്റുകാലമ്മയ്ക്കുള്ള ഹൃദയനൈവേദ്യമാകും. ഉച്ചയ്ക്ക് 2.15നാണ് പൊങ്കാല നിവേദിക്കുന്നത്. ക്ഷേത്രം ട്രസ്റ്റ് ചുമതലപ്പെടുത്തിയ 250ഓളം പൂജാരിമാര്‍ പൊങ്കാലക്ക ലങ്ങളില്‍ ദേവിയുടെ അനുഗ്രഹതീര്‍ത്ഥം തളിക്കുന്നതോടെ പ്രാര്‍ത്ഥനയില്‍ ഉരുകിത്തിളച്ച സ്ത്രീമനസ്സുകള്‍ക്ക് ധന്യതയുടെ പുണ്യാമൃതം. ഇത്തവണ 40 ലക്ഷത്തോളം സ്ത്രീകള്‍ പൊങ്കാലയിടാന്‍ എത്തുമെന്നാണ് പ്രതീക്ഷ. ക്ഷേത്രത്തിന്റെ അഞ്ചര കിലോമീറ്റര്‍ ചുറ്റളവില്‍ പൊങ്കാല അടുപ്പുകള്‍ നിരക്കും.