ഓണ്‍ലൈന്‍ വഴി രാജ്യവ്യാപകമായി കഞ്ചാവ് വിതരണം ചെയ്തിരുന്ന വന്‍ അന്തര്‍സംസ്ഥാന സംഘത്തെ ഹൈദരാബാദ് നാര്‍ക്കോട്ടിക് എന്‍ഫോഴ്‌സ്‌മെന്റ് വിംഗ് പിടികൂടി. സംഭവവുമായി ബന്ധപ്പെട്ട് റാക്കറ്റിന്റെ പ്രധാന സൂത്രധാരനായ ജാര്‍ഖണ്ഡ് ഗിരിദിഹ് സ്വദേശി സത്യം മിശ്രയെ പോലീസ് അറസ്റ്റ് ചെയ്തു. ഇയാളുടെ നാല് കൂട്ടാളികള്‍ക്കായി തിരച്ചില്‍ തുടരുകയാണ്. ജാര്‍ഖണ്ഡ് കേന്ദ്രമായി പ്രവര്‍ത്തിച്ചിരുന്ന ഈ സംഘം തെലങ്കാന, മഹാരാഷ്ട്ര, തമിഴ്‌നാട്, കര്‍ണാടക, ഡല്‍ഹി ഉള്‍പ്പെടെ രാജ്യത്തെ 21 സംസ്ഥാനങ്ങളിലേക്കാണ് കഞ്ചാവ് വിതരണം ചെയ്തിരുന്നതെന്ന് ഹൈദരാബാദ് സിറ്റി പോലീസ് കമ്മീഷണര്‍ വ്യക്തമാക്കി.

വാട്‌സാപ്പും മറ്റ് സമൂഹമാധ്യമങ്ങളും വഴിയാണ് സംഘം ആവശ്യക്കാരെ കണ്ടെത്തിയിരുന്നത്. ദിവസേന 80 മുതല്‍ 100 വരെ ഓര്‍ഡറുകള്‍ കൈകാര്യം ചെയ്തിരുന്ന ഇവര്‍ക്ക് പ്രതിമാസം 30 മുതല്‍ 35 ലക്ഷം രൂപ വരെയാണ് ഇതിലൂടെ വരുമാനം ലഭിച്ചിരുന്നത്. പ്രാദേശികമായി കൃഷി ചെയ്തും മറ്റും ശേഖരിക്കുന്ന കഞ്ചാവ് ചെറിയ അളവുകളിലാക്കി പാക്ക് ചെയ്ത ശേഷം, പാക്കറ്റില്‍ മരുന്നെന്ന് എന്ന് വ്യാജമായി രേഖപ്പെടുത്തിയാണ് ഇവര്‍ പോസ്റ്റ് ഓഫീസുകള്‍ വഴി അയച്ചിരുന്നത്. ഓരോ പാഴ്‌സലിലും 50 ഗ്രാം മുതല്‍ 250 ഗ്രാം വരെ കഞ്ചാവാണ് അടങ്ങിയിരുന്നത്. ഒരു ദിവസം എട്ട് മുതല്‍ പത്ത് വരെ സ്പീഡ് പോസ്റ്റ് പാഴ്‌സലുകള്‍ ഇവര്‍ അയച്ചിരുന്നു.

കഞ്ചാവിന്റെ അളവും തരവും തിരിച്ചറിയാന്‍ മാംഗോ, സ്റ്റിക്ക്, ഫ്‌ലവര്‍ തുടങ്ങിയ രഹസ്യ കോഡ് വാക്കുകളാണ് സംഘം ഉപയോഗിച്ചിരുന്നത്. പണം കൈപ്പറ്റിയിരുന്നത് വിവിധ യുപിഐ അക്കൗണ്ടുകള്‍ വഴിയായിരുന്നു. മുംബൈ പോലുള്ള നഗരങ്ങളില്‍ ട്രെയിന്‍ മാര്‍ഗ്ഗം വന്‍തോതില്‍ കഞ്ചാവ് എത്തിച്ച ശേഷം പ്രാദേശിക ഗതാഗത സംവിധാനങ്ങള്‍ ഉപയോഗിച്ച് ഉപഭോക്താക്കള്‍ക്ക് നേരിട്ട് എത്തിച്ചു നല്‍കുന്ന ശൃംഖലയും ഇവര്‍ക്കുണ്ടായിരുന്നു.

ജാര്‍ഖണ്ഡില്‍ നിന്ന് ഹൈദരാബാദിലേക്ക് വന്ന സംശയാസ്പദമായ ഒരു പാഴ്‌സല്‍ ഹൈദരാബാദ് നാര്‍ക്കോട്ടിക് എന്‍ഫോഴ്‌സ്‌മെന്റ് വിംഗ് തടഞ്ഞുവെച്ച് പരിശോധിച്ചതോടെയാണ് ഈ വലിയ ലഹരി ശൃംഖല പുറത്തുവരുന്നത്. തുടര്‍ന്ന് നടത്തിയ അന്വേഷണത്തില്‍ ഹൈദരാബാദിലെ പ്രാദേശിക കച്ചവടക്കാരായ സുശാന്ത് വ്യാസ്, ലഡ്ഡു എന്നിവരെ പോലീസ് അറസ്റ്റ് ചെയ്യുകയും ഇവരില്‍ നിന്ന് രണ്ട് കിലോഗ്രാം കഞ്ചാവ് പിടിച്ചെടുക്കുകയും ചെയ്തു. ഇവരെ ചോദ്യം ചെയ്തതിലൂടെയാണ് ജാര്‍ഖണ്ഡിലെ പ്രധാന പ്രതിയിലേക്ക് പോലീസ് എത്തിയത്. തപാല്‍ വകുപ്പ് വഴിയുള്ള ഇത്തരം പാഴ്‌സലുകള്‍ കൃത്യമായ സ്‌കാനിംഗിന് വിധേയമാകാതെ വിമാനങ്ങളിലും ട്രെയിനുകളിലും യാത്ര ചെയ്യുന്നു എന്നത് വലിയൊരു സുരക്ഷാ വീഴ്ചയായി പോലീസ് ചൂണ്ടിക്കാണിക്കുന്നു. തപാല്‍ പാഴ്‌സലുകള്‍ കര്‍ശനമായി സ്‌ക്രീന്‍ ചെയ്യണമെന്ന് ആവശ്യപ്പെട്ട് ഹൈദരാബാദ് പോലീസ് ബന്ധപ്പെട്ട കേന്ദ്ര അധികാരികള്‍ക്ക് കത്തയച്ചിട്ടുണ്ട്.