രാധാമണിയും ആ നാല്‍പ്പത് പേരും കാരണം മുഖ്യമന്ത്രി കട്ടക്കലിപ്പിലായി, പരിപാടി ഉദ്ഘാടനം ചെയ്തിട്ട് സംസാരിക്കാതെ വേദിയില്‍ നിന്നിറങ്ങിപ്പോയി. മുഖ്യമന്ത്രിക്ക് തൊണ്ടയ്ക്ക് അസ്വസ്ഥതയാണെന്ന് പറഞ്ഞ് ആരോഗ്യമന്ത്രി കെ.കെ ഷൈലജ തടിതപ്പാനും ശ്രമം നടത്തി. കൊല്ലം ജില്ലാ ആശുപത്രിയിലെ വിവിധ പദ്ധതികളുടെ ഉദ്ഘാടനം ചെയ്യാനെത്തിയതായിരുന്നു മുഖ്യമന്ത്രി. ജില്ല പഞ്ചായത്ത് പ്രസിഡന്റ് സി. രാധാമണിയുടെ സ്വാഗത പ്രസംഗം നീണ്ടതോടെ മുഖ്യമന്ത്രി അസ്വസ്ഥനായി. നോട്ടീസിലുള്ള 40 പേരുടെയും പേരെടുത്ത് പറഞ്ഞ് രാധാമണി സ്വാഗതം പറഞ്ഞതാണ് മുഖ്യമന്ത്രിയെ ചൊടിപ്പിച്ചത്. കാര്യം ശ്രദ്ധയില്‍പ്പെട്ട അധ്യക്ഷ ആരോഗ്യമന്ത്രി രാധാമണിയുടെ അടുത്ത് ചെന്ന് പറഞ്ഞെങ്കിലും അവര്‍ ആ നാല്‍പ്പത് പേരെയും കൈവിട്ടില്ല. അതോടെ മുഖ്യമന്ത്രി എഴുനേറ്റ് പ്രസംഗം നിര്‍ത്താന്‍ പറഞ്ഞു. ശേഷം നിലവിളക്ക് കൊളുത്തി ഉദ്ഘാടനം നിര്‍വഹിച്ച ശേഷം വേദി വിട്ടു. 

കൊല്ലം ജില്ലയില്‍ ഇന്ന് ഉച്ചയ്ക്ക് മുമ്പ് മുഖ്യമന്ത്രി പിണറായി വിജയന് സ്വകാര്യപരിപാടികള്‍ അടക്കം അഞ്ച് ഉദ്ഘാടനങ്ങളാണുള്ളത്, ഉച്ചയ്ക്ക് ശേഷം തിരുവനന്തപുരത്ത് വിവിധ പരിപാടികളുടെ ഉദ്ഘാടനവും. എല്ലായിടത്തും കൃത്യസമയത്ത് എത്തുക എന്നത് മുഖ്യമന്ത്രിക്ക് നിര്‍ബന്ധമാണ്. അതിനാലാണ് പരിപാടികള്‍ സമയത്ത് തുടങ്ങി അവസാനിപ്പിക്കണമെന്ന് അദ്ദേഹം കര്‍ശന നിര്‍ദ്ദേശം നല്‍കിയിട്ടുണ്ട്. അതിനാല്‍ ഔദ്യോഗിക ഉദ്ഘാടനം നിര്‍വഹിച്ചതായി അറിയിച്ച് വേദി വിടുകയായിരുന്നു. മുഖ്യമന്ത്രിയും വേദിയിലുണ്ടായിരുന്നവരും അടുത്ത ഉദ്ഘാടന സ്ഥലത്തേക്ക് മടങ്ങി. ഉച്ചക്ക് മുമ്പ് മിനിറ്റുകളുടെ വ്യത്യാസത്തിലാണ് മുഖ്യമന്ത്രിക്ക് പരിപാടികളാണുള്ളത്. 

മുമ്പ് കേരളാ സര്‍വകലാശാല സെനറ്റ് ഹാളില്‍ നടന്ന ഒരു പരിപാടിയില്‍ സാക്ഷരതാമിഷന്‍ ഡയറക്ടറായ പി.എസ് ശ്രീകല സ്വാഗത പ്രസംഗം നീട്ടിക്കൊണ്ട് പോവുകയും മുഖ്യമന്ത്രി പിണറായി വിജയനെ പുകഴ്ത്തി സംസാരിക്കുകയും ചെയ്തതോടെ അദ്ദേഹം ക്ഷുഭിതനായി. പ്രസംഗം നിര്‍ത്താന്‍ ആവശ്യപ്പെട്ടു. സര്‍ക്കാര്‍ പരിപാടികള്‍ കൃത്യമസയത്ത് നടത്തണമെന്നും മന്ത്രിമാരെ അടക്കം വേദിയിലിരുത്തി സ്വാഗത, അധ്യക്ഷ പ്രാസംഗികര്‍ സമയം കളയരുതെന്നും നിര്‍ദ്ദേശിച്ചു. അന്നത് വലിയ വിവാദമായിരുന്നു. തുടര്‍ന്ന് സര്‍ക്കാര്‍ പരിപാടികളില്‍ കര്‍ശനമായ നിര്‍ദ്ദേശങ്ങളോടെയാണ് നടത്തിയിരുന്നത്. 

കഴിഞ്ഞയാഴ്ച സര്‍ക്കാരിന്റെ ആയിരം ദിനത്തോട് അനുബന്ധിച്ച് മലപ്പുറത്ത് നടന്ന പരിപാടിയുടെ ഉദ്ഘാടന ചടങ്ങിന് സി.പി.എമ്മുകാരന്‍ ചെഗുവേരയുടെ പടമുള്ള കൊടിയുമായി എത്തിയപ്പോഴും മുഖ്യമന്ത്രി വിമര്‍ശിച്ചിരുന്നു. എല്‍.ഡി.എഫ് ആണ് അധികാരത്തിലിരിക്കുന്നതെങ്കിലും ഇത് എല്ലാവരുടെയും സര്‍ക്കാരാണ്, സര്‍ക്കാര്‍ പരിപാടികളില്‍ മഹാനായ ഒരാളുടെ പടമുള്ള കൊടിയുമായി വന്നത് ഔചിത്യമല്ലെന്നും അദ്ദേഹം ചൂണ്ടിക്കാണിച്ചിരുന്നു. സി.പി.എമ്മിന്റെ തൃശൂര്‍ സമ്മേളനത്തിന്റെ സമാപനത്തില്‍ പിണറായിയുടെ പടംവെച്ച കൊടിയുമായി എത്തിയ പ്രവര്‍ത്തകനെ അദ്ദേഹം വിലക്കുകയും ചെയ്തിരുന്നു. പാര്‍ട്ടിയാണ് വ്യക്തിയല്ല വലുതെന്ന മുന്നറിയിപ്പും അന്ന് നല്‍കിയിരുന്നു.