പരാതിയുമായി കൊച്ചി കടവന്ത്ര സ്‌റ്റേഷനിലെത്തിയയാള്‍ക്ക് ജനമൈത്രി പൊലീസിന്റെ മര്‍ദനം. വൈറ്റിലയില്‍ ട്രാവല്‍ ഏജന്‍സി നടത്തുന്ന തൃശൂര്‍ സ്വദേശി ആല്‍ഫ്രഡിനെയാണ് കടവന്ത്ര സ്‌റ്റേഷനിലെ പ്രിന്‍സിപ്പല്‍ എസ്.ഐ, എ.എല്‍.അഭിലാഷ് മര്‍ദിച്ചത്. പോക്കറ്റിലുണ്ടായിരുന്ന അറുപതിനായിരം രൂപയും എസ്.ഐ. തട്ടിയെടുത്തുവെന്ന് ആല്‍ഫ്രഡ് ആരോപിക്കുന്നു.

കെഎസ്ഇബി ജീവനക്കാരന്‍ വൈറ്റിലയിലെ സ്ഥാപനത്തില്‍ വച്ച് തന്റെ ഭാര്യയെ അപമാനിച്ചുവെന്ന പരാതിയുമായി ബന്ധപ്പെട്ട് കടവന്ത്ര സ്‌റ്റേഷനിലെത്തിയപ്പോള്‍ പ്രിന്‍സിപ്പല്‍ എസ്.ഐ. മര്‍ദിച്ചുവെന്നാണ് ആല്‍ഫ്രഡ് പറയുന്നത്. തെളിവായി ചൂണ്ടിക്കാട്ടുന്നത് ഫോണില്‍ റെക്കോര്‍ഡ് ചെയ്ത ശബ്ദരേഖയും.

സ്‌റ്റേഷനിലെ ബാത്ത്‌റൂമിനു സമീപത്ത് വച്ച് , ഫോണുകള്‍ പിടിച്ചുവാങ്ങിയശേഷം ക്രൂരമായി മര്‍ദിച്ചതായി ആല്‍ഫ്രഡ് പറയുന്നു. അതുവരെ വാദിയായിരുന്ന തന്നെ, കെ.എസ്.ഇ.ബി. ജീവനക്കാരനെക്കൊണ്ട് കൃത്യനിര്‍വഹണം തടസ്സപ്പെടുത്തി എന്ന് പരാതി എഴുതിവാങ്ങി അറസ്റ്റ് ചെയ്യുകയായിരുന്നുവെന്ന് ആല്‍ഫ്രഡ് ആരോപിക്കുന്നു.

ആല്‍ഫ്രഡിനെതിരെ ജാമ്യമില്ലാവകുപ്പുകള്‍ ചേര്‍ത്ത് പൊലീസ് കേസെടുത്തെങ്കിലും ജാമ്യമില്ലാ വകുപ്പ് മജിസ്‌ട്രേറ്റ് റദ്ദാക്കി. ഉടന്‍ ജാമ്യവും അനുവദിച്ചു. പിടിച്ചെടുത്ത വസ്തുവകകള്‍ തിരിച്ചുനല്‍കിയപ്പോള്‍ കെട്ടിടത്തിന്റെ വാടക നല്‍കാനായി പോക്കറ്റില്‍ സൂക്ഷിച്ചിരുന്ന അറുപതിനായിരം രൂപയും എടിഎം കാര്‍ഡുകളും തിരിച്ചുനല്‍കിയില്ലെന്ന് ആല്‍ഫ്രഡ് പരാതിപ്പെടുന്നു.

നാലുദിവസത്തോളം ആശുപത്രിയില്‍ ചികില്‍സയിലായിരുന്ന ആല്‍ഫ്രഡ് ഫിസിയോ തെറാപ്പി ഉള്‍പ്പെടെയുള്ള ചികില്‍സകള്‍ തുടരുകയാണ്. എസ്.ഐയ്‌ക്കെതിരെ നടപടി ആവശ്യപ്പെട്ട് ആല്‍ഫ്രഡിന്റെ ഭാര്യ ഡിജിപിക്കും പൊലീസ് കമ്മിഷണര്‍ക്കും പരാതി നല്‍കി.