15 ലക്ഷം രൂപ വിനിയോഗിച്ച് സ്ഥാപിച്ച വൈക്കത്തെ കൂറ്റന് മണി നശിക്കുന്നു
കേരള ലളിതകലാ അക്കാദമിയുടെ ആഭിമുഖ്യത്തില് വൈക്കം ബോട്ടുജെട്ടിക്ക് സമീപം കുട്ടികളുടെ പാര്ക്കിനു മുന്വശത്തായി സ്ഥാപിച്ചിരിക്കുന്ന കൂറ്റന് മണിയോട് അധികൃതര് കാട്ടുന്ന അവഗണനയില് പ്രതിഷേധം ശക്തമാകുന്നു. 2015 ഓഗസ്റ്റ് 23-നാണ് വഴിയോര ശില്പം പദ്ധതിയില് ഉള്പ്പെടുത്തി 15 ലക്ഷം രൂപ വിനിയോഗിച്ച് വൈക്കം കായലോരത്ത് മണി സ്ഥാപിച്ചത്.
കോതനല്ലൂര് സ്വദേശി ജിജി സ്കറിയ കൊച്ചി ബിനാലെയില് അവതരിപ്പിച്ച ഇന്സ്റ്റലേഷനായിരുന്നു ഈ കൂറ്റന് മണി. കാലത്തിന്റെ നിലയ്ക്കാത്ത പ്രവാഹത്തെ അടയാളപ്പെടുത്തുന്ന നാഴികമണി വൈക്കം സത്യഗ്രഹമടക്കമുള്ള സാമൂഹ്യ മുന്നേറ്റങ്ങളുടെ ഭൂമികയായ വൈക്കത്ത് സ്ഥാപിക്കുന്നത് ഏറെ അര്ഥപൂര്ണമാകുമെന്ന ചിന്തയുടെ അടിസ്ഥാനത്തിലാണ് കൂറ്റന്മണി വൈക്കത്തേക്ക് മാറ്റി സ്ഥാപിച്ചത്.
മണിയിലെ സുഷിരങ്ങളില് നിന്നു ജലകണങ്ങള് ഇറ്റുവീഴുന്ന വിധമാണ് ശില്പത്തിന്റെ രൂപകല്പന. ജലകണങ്ങള് മണിയില് നിന്നു പൊഴിയണമെങ്കില് മോട്ടോര് പ്രവര്ത്തിപ്പിക്കണം. എന്നാല് മണിയുമായുള്ള വൈദ്യുതബന്ധം അധികൃതര് വേര്പെടുത്തിയിരിക്കുന്നതിനാല് ജലകണങ്ങള് ഇറ്റുവീഴുന്നില്ല.
മൂന്ന് ഇരുമ്പുതൂണുകളിലാണ് മണി ഘടിപ്പിച്ചിരിക്കുന്നത്. കായലില് ലവണാംശം വര്ധിക്കുന്ന സമയം ഓരുകാറ്റേറ്റ് തൂണുകള് തുരുമ്പിക്കുകയാണ്. കാലാകാലങ്ങളില് തുരുമ്പുനീക്കി ഇരുമ്പുതൂണുകളും മണിയും ചായംപൂശി മിഴിവുള്ളതാക്കണമെന്ന് ജനങ്ങള് നിരന്തരം ആവശ്യപ്പെട്ടുവരികയാണെങ്കിലും അധികൃതര് അനുഭാവപൂര്വം നടപടി സ്വീകരിക്കുന്നില്ല. വൈക്കം കായലോരത്തെ കൂറ്റന് മണി പരിരക്ഷിക്കുന്നതിന് അധികൃതര് നടപടി സ്വീകരിക്കണമെന്നാണ് നാട്ടുകാരുടെ ആവശ്യം.
https://www.facebook.com/Malayalivartha
