ഞായറാഴ്ച നല്ല ദിവസം... ഡ്രൈ ഡേ ഓര്‍മ്മയില്‍; പൂട്ടിയ ബാറുകാര്‍ കരയേണ്ട; എല്ലാവര്‍ക്കും ബിയര്‍ വൈന്‍-പാര്‍ലര്‍ ലൈസന്‍സ്
സമ്പൂര്‍ണ മദ്യനിരോധനം എന്ന് വീമ്പിളക്കി കൈയ്യടി നേടിയ മുഖ്യമന്ത്രി മാസങ്ങള്‍ക്കകം നിലപാട് മാറ്റി പറഞ്ഞതെല്ലാം തിരുത്തുന്നു. ഞായറാഴ്ചത്തെ മദ്യവില്‍പ്പന നിരോധിച്ചു കൊണ്ടുള്ള ഡ്രൈഡേ പ്രത്യേക മന്ത്രിസഭായോഗം പിന്‍വലിച്ചു. മന്ത്രിസഭായോഗമാണ് ഞായറാഴ്ച ബാറുകളും മദ്യ വില്പന ശാലകളും തുറന്നു പ്രവര്‍ത്തിക്കാന്‍ അനുമതി നല്‍കിയിരിക്കുന്നത്.
ഞായറാഴ്ചത്തെ ഡ്രൈഡേ പിന്‍വലിച്ചതിനൊപ്പം കൂടുതല്‍ ബിയര്‍-വൈന്‍ പാര്‍ലറുകള്‍ തുറക്കുന്നതിന് അംഗീകാരം നല്‍കിയതായും മുഖ്യമന്ത്രി ഉമ്മന്‍ ചാണ്ടി മന്ത്രിസഭായോഗ തീരുമാനങ്ങള്‍ വിശദീകരിച്ചു കൊണ്ട് പറഞ്ഞു. സര്‍ക്കാരിന്റെ പുതുക്കിയ മദ്യനയത്തിന്റെ ഭാഗമായി പൂട്ടിയ 418 ബാറുകള്‍ക്കും ബിയര്‍-വൈന്‍ പാര്‍ലര്‍ ലൈസന്‍സ് നല്‍കും. ജോലി നഷ്ടപ്പെട്ട തൊഴിലാളികള്‍ക്ക് അതേ ബാറുകളില്‍ തന്നെ തൊഴില്‍ നല്‍കണമെന്നും തൊഴിലാളികളുടെ പുനരധിവാസം ബാറുടമകള്‍ ഉറപ്പുവരുത്തണമെന്നും മുഖ്യമന്ത്രി അറിയിച്ചു. ബാറുകളുടെ പ്രവര്‍ത്തന സമയത്തില്‍ കുറവ് വരുത്തിയതായും അദ്ദേഹം പറഞ്ഞു.
മറ്റ് ദിവസങ്ങളില്‍ ബാറുകള്‍ തുറന്നുപ്രവര്‍ത്തിച്ചിരുന്ന സമയത്തില്‍ കുറവുവരുത്തി കുറവുവന്ന ആ മണിക്കൂറുകള്‍ ചേര്‍ത്താണ് ഞായറാഴ്ച ബാറുകള്‍ തുറക്കുന്നതെന്നു മുഖ്യമന്ത്രി വിശദീകരിച്ചു. നിലവില്‍ 15 മണിക്കൂര്‍ വച്ച് ആറു ദിവസം 90 മണിക്കൂറാണ് ബാര്‍ തുറന്നു പ്രവര്‍ത്തിക്കുന്നത്. ഇത് ഏഴു ദിവസമാക്കുമ്പോള്‍ 12. 51 മണിക്കൂറായിരിക്കും. ഈ സമയം കണക്കാക്കി ബാറുകളുടെ പ്രവര്‍ത്തനസമയം 12.30 മണിക്കൂറായി നിജപ്പെടുത്തുകയാണെന്നു മുഖ്യമന്ത്രി വിശദീകരിച്ചു. പുതുക്കിയ സമയക്രമം എക്‌സൈസ് വകുപ്പ് തീരുമാനിക്കുമെന്ന് മുഖ്യമന്ത്രി പറഞ്ഞു.
തൊഴിലാളികളുടെ തൊഴില്‍ നഷ്ടവും ടൂറിസം മേഖലയിലെ പ്രതികരണവും കണക്കിലെടുത്താണ് മദ്യനയത്തില്‍ മാറ്റം വരുത്തിയതെന്ന് മുഖ്യമന്ത്രി ഉമ്മന്‍ ചാണ്ടി പറഞ്ഞു. അതേസമയം, 3 സ്റ്റാര്‍, 4 സ്റ്റാര്‍ ഹോട്ടലുകളില്‍ ബാറുകള്‍ക്ക് അനുമതി നല്കില്ല എന്ന യുഡിഎഫ് തീരുമാനത്തിനു മാറ്റമില്ലെന്നും മുഖ്യമന്ത്രി അറിയിച്ചു. 5 സ്റ്റാറിനും അതിനു മുകളിലുള്ള സ്റ്റാര്‍ ഹോട്ടലുകള്‍ക്കും ബാര്‍ ലൈസന്‍സ് നല്കുവാനുള്ള തീരുമാനവും തുടരും. പുതിയ മദ്യനയം കാര്യക്ഷമമായി നടപ്പിലാക്കുന്നതിന് ആവശ്യമായ മാറ്റം മാത്രമാണ് വരുത്തിയിരിക്കുന്നതെന്നും മുഖ്യമന്ത്രി വിശദീകരിച്ചു.
നാഷണല്‍ ഹൈവെയുടെയും സംസ്ഥാന ഹൈവെയുടെയും ഓരത്തുള്ള ബിവറേജസ് കോര്‍പറേഷന്റെയും കണ്‍സ്യൂമര്‍ ഫെഡിന്റെയും പത്തു ശതമാനം ഔട്ട്‌ലെറ്റുകള്‍, ഹൈക്കോടതിയുടെ നിര്‍ദേശം പരിഗണിച്ച് ഈ വരുന്ന ജനുവരി ഒന്നു മുതല്‍ നിര്‍ത്തലാക്കുന്നതാണ്.
ഞായറാഴ്ചയും ഡ്രൈ ഡേ ആക്കുന്നതിനുള്ള തീരുമാനം എന്റേതായിരുന്നു. എന്നാല്‍ ഇത് ഉദ്ദേശിച്ച ഫലം ഉണ്ടാക്കിയില്ല. ഞായറാഴ്ച ഡ്രൈ ഡേ പ്രഖ്യാപിച്ചശേഷം ബിവറേജസ് ഔട്ട് ലെറ്റുകളില്‍ 60 ശതമാനം വരെ ശനിയാഴ്ച വില്‍പ്പന വര്‍ധിച്ചു. ടൂറിസം മേഖലയെ ഈ തീരുമാനം പ്രതികൂലമായി ബാധിക്കുകയും ചെയ്തു. ഇതാണ് ഞായറാഴ്ചത്തെ ഡ്രൈ ഡേ പിന്‍വലിക്കാന്‍ തീരുമാനിച്ചതെന്നു മുഖ്യമന്ത്രി പറഞ്ഞു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
