കുപ്പിയില് നിന്നിറക്കിയ ഭൂതത്തെ തിരിച്ചുകയറ്റാനിത്തിരി പാടാണെങ്കിലും പഠിച്ചപണി പതിനെട്ടും പയറ്റി കോണ്ഗ്രസ് അതില് വിജയിച്ചു, അങ്ങനെ പി.ജെ ജോസഫ് വീണ്ടും ജോസപ്പായി
കുപ്പിയില് നിന്നിറക്കിയ ഭൂതത്തെ തിരിച്ചുകയറ്റാനിത്തിരി പാടാണെങ്കിലും പഠിച്ചപണി പതിനെട്ടും പയറ്റി കോണ്ഗ്രസ് അതില് വിജയിച്ചു. പറഞ്ഞ് വരുന്നത് കെ.എം മാണിക്കെതിരെ പി.ജെ ജോസഫിനെ ഇളക്കിവിട്ട് അവസാനം ഇളിഭ്യരായ കോണ്ഗ്രസിന്റെയും പി.ജെ ജോസഫിന്റെയും കാര്യം തന്നെയാണ്. ജോസ് കെ. മാണിക്ക് രാജ്യസഭാ സീറ്റ് നല്കിയത് കൊണ്ട് കോട്ടയം പാര്ലമെന്റ് സീറ്റ് തനിക്ക് വേണമെന്ന കട്ടക്കലിപ്പിലായിരുന്നു ഗായകന് കൂടിയായ പി.ജെ ജോസഫ്. പുട്ടിന് പീരയിടുന്നത് പോലെ ജോസഫിന്റെ വാശിക്ക് കോണ്ഗ്രസ് കുടയും പിടിച്ചു. അപകടം മണത്തറിഞ്ഞ കെ.എം മാണി തോമസ് ചാഴിക്കാടനെ പോലെ ഉശിരനായ സ്ഥാനാര്ത്ഥിയെ കളത്തിലിറങ്ങി. അത് കണ്ടരിശം തീരാഞ്ഞ് ജോസഫ് കോണ്ഗ്രസ് നേതാക്കള്ക്ക് ചുറ്റും മണ്ടി നടന്നു.
അങ്ങനെയാണ് കോണ്ഗ്രസ് നേതാക്കളുടെ തലയില് പുതിയൊരാശയം ഉരുത്തിരിഞ്ഞത്. ജോസഫിനെ ഇടുക്കിയില് പൊതുസ്വതന്ത്രനായി കെട്ടിയിറക്കിയാലോ? സംഭവമറിഞ്ഞ് മൂന്നാംമുറയില് നിന്ന് തല്ക്കാലം മാറി നിന്ന മുസ്്ലിംലീഗ് നേതൃത്വം സടകുടഞ്ഞെഴുന്നേറ്റു. തങ്ങളുമായി അത്തരം കാര്യങ്ങള് കോണ്ഗ്രസ് ആലോചിച്ചിട്ടില്ലെന്ന് പി കെ കുഞ്ഞാലിക്കുട്ടി വ്യക്തമാക്കി. കെ എം മാണിയുടെ കൂടി അനുമതി നേടുമെന്നും കോണ്ഗ്രസ് നേതൃത്വം അനൗദ്യോഗികമായി പറഞ്ഞിരുന്നു. കോണ്ഗ്രസ് പച്ചക്കൊടി കാണിച്ചാല് എംഎല്എ സ്ഥാനം രാജിവെക്കാനും പി ജെ ജോസഫ് തീരുമാനമെടുത്തെത്താണ് അണിയറ രഹസ്യം. അത്രയ്ക്കൊക്കെ കടുംകൈ വേണോ ജോസഫേ... എന്ന് ചില മുതിര്ന്ന കോണ്ഗ്രസ് നേതാക്കള് ചോദിച്ചത്രേ.
കോണ്ഗ്രസിന് അനുകൂല സാഹചര്യം നിലവിലുള്ളതിനാല് യാതൊരുവിധത്തിലുള്ള മുറുമുറുപ്പും പാര്ട്ടിയിലും മുന്നണിയിലും ഉണ്ടാകരുതെന്ന് രാഹുല്ഗാന്ധി മുന്നറിയിപ്പ് നല്കിയിരുന്നു. അതോടെയാണ് സ്വന്തംപാര്ട്ടിയിലെ അടി അവസാനിപ്പിക്കും മുമ്പ് കേരളാ കോണ്ഗ്രസിനെ നന്നാക്കാന് ചിലര് അരയും തലയും മുറുക്കി ഇറങ്ങിയത്. ആ നീക്കം ചീറ്റിപ്പോയെന്ന് മാത്രമല്ല, നാണംകെട്ട് പുളിശ്ശേരി കുടിക്കേണ്ട അവസ്ഥയില് വരെ കാര്യങ്ങളെത്തി. ജോസഫിന് സീറ്റ് നല്കുന്നതിനെ പി.കെ കുഞ്ഞാലിക്കുട്ടിയും ഇ.ടി മുഹമ്മദ് ബഷീറും അടക്കം ശക്തമായി എതിര്ത്തു. മൂന്നാം സീറ്റ് ചോദിച്ച ലീഗിനെ അനുനയിപ്പിക്കാന് പെട്ട പാട് ഉമ്മന്ചാണ്ടിക്കും മുല്ലപ്പള്ളിക്കും മാത്രമേ അറിയാവൂ... അതുകൊണ്ട് ജോസഫിനെ മുന്നില് നിര്ത്തി കെ.എം മാണിക്കെതിരെ കളിക്കാനുള്ള നീക്കം കോണ്ഗ്രസ് പാതിവഴിയില് ഉപേക്ഷിച്ചു.
അപ്പോഴും ഒറ്റയാനായി നമ്മുടെ പാവം ഗായകന്, പിജെ ജോസഫ് , മോഹങ്ങള് മരവിച്ചു... മോതിരക്കൈ മുരടിച്ചു.... എന്ന അവസ്ഥയിലുമായി. പി.ജെ ജോസഫിന്റെ വാശിയിലും തര്ക്കത്തിലും അതൃപ്തരായ ഹൈക്കമാന്ഡ് അന്ത്യശാസനം നല്കി. എങ്ങനെയും ജയിക്കാവുന്ന കോട്ടയം കുളമാക്കല്ലേ? അതുകൊണ്ട് ജോസഫിനോടുള്ള പ്രേമം അവസാനിപ്പിക്കണം. അങ്ങനെ പുലിവാല് കല്യാണത്തില് സലിംകുമാറിന്റെ മണവാളന് പറഞ്ഞത് പോലെ ' അങ്ങനെ പടക്കക്കട ഗുദാ... ഹവാ... എന്തൊക്കെയായിരുന്നു. ഡാന്സും പാട്ടും മേളോം. എല്ലാം പോയി ടമാര് പഠാര്' ജോസഫ് വീണ്ടും ജോസപ്പായി....
https://www.facebook.com/Malayalivartha
