രാജ്യാന്തര ബാല ചലച്ചിത്രമേള ഇന്ന് ആരംഭിക്കും. ഉച്ചയ്ക്ക് രണ്ടിന് ടാഗോര്‍ തിയേറ്ററില്‍ മന്ത്രി എ.കെ. ബാലന്‍ ഉദ്ഘാടനം നിര്‍വഹിക്കും. മന്ത്രി കെ.കെ. ശൈലജ അദ്ധ്യക്ഷത വഹിക്കും. മന്ത്രി കടകംപള്ളി സുരേന്ദ്രന്‍ മുഖ്യാതിഥിയാകും. സംഘാടക സമിതി ചെയര്‍മാന്‍ എം. മുകേഷ് എം.എല്‍.എ,മേയര്‍ വി.കെ. പ്രശാന്ത്, വി.എസ്. ശിവകുമാര്‍ എം.എല്‍.എ, കെ.ടി.ഡി.സി ചെയര്‍മാന്‍ എം. വിജയകുമാര്‍ തുടങ്ങിയവര്‍ പങ്കെടുക്കും. 'അരുമയാണു മക്കള്‍, അവരുടെ സംരക്ഷണവും സുരക്ഷയും സമൂഹത്തിന്റെ കടമ' എന്നതാണു ചലച്ചിത്രമേളയുടെ സന്ദേശം.

വൈകിട്ട് 4ന് ഉയരെ ചിത്രത്തിന്റെ പ്രത്യേക പ്രദര്‍ശനവും കൈരളിയില്‍ ഒരുക്കിയിട്ടുണ്ട്. 160ഓളം ചിത്രങ്ങള്‍ പ്രദര്‍ശിപ്പിക്കും. കൈരളി, ശ്രീ, നിള, കലാഭവന്‍, ടാഗോര്‍ തിയേറ്ററുകളിലും നിശാഗന്ധി ഓഡിറ്റോറിയത്തിലുമാകും പ്രദര്‍ശനങ്ങള്‍. നിശാഗന്ധിയില്‍ എന്നും വൈകിട്ട് പൊതുജനങ്ങള്‍ക്ക് സൗജന്യ പ്രദര്‍ശനമുണ്ടാകും.

ആദിവാസി മേഖല, അനാഥാലയങ്ങള്‍ എന്നിവിടങ്ങളില്‍ നിന്ന് ആയിരത്തോളം കുട്ടികള്‍ പങ്കെടുക്കുന്നുണ്ട്. വിവിധ ജില്ലകളില്‍ നിന്നുള്ള കുട്ടികളെ ശിശുക്ഷേമ സമിതി തിരുവനന്തപുരത്ത് എത്തിച്ച് താമസവും മറ്റു സൗകര്യങ്ങളും നല്‍കിയാണു സിനിമ കാണിക്കുന്നത്.

പ്രഗത്ഭരായ ബാലചലച്ചിത്ര സംവിധായകര്‍, ബാലതാരങ്ങള്‍, പിന്നണി പ്രവര്‍ത്തകര്‍ എന്നിവര്‍ മേളയില്‍ കുട്ടികളോട് സംവദിക്കും. ദിവസവും ഓപ്പണ്‍ ഫോറവും സംഘടിപ്പിക്കുന്നുണ്ട്. ചലച്ചിത്ര അക്കാദമി, ചലച്ചിത്ര വികസനകോര്‍പ്പറേഷന്‍ എന്നിവയുടെ സഹകരണത്തോടെയാണ് മേള സംഘടിപ്പിക്കുന്നത്. ഭിന്നശേഷിയുള്ള കുട്ടികള്‍ക്ക് സിനിമ കാണാന്‍ പ്രത്യേകം സൗകര്യം ഒരുക്കും.

കുട്ടികളുടെ ചലച്ചിത്രമേള നടക്കുന്ന ഇന്നു മുതല്‍ 16 വരെ എന്നും വൈകിട്ട് 6.30 ന് ടഗോര്‍ തിയറ്ററില്‍ പൊതുജനങ്ങള്‍ക്ക് സൗജന്യമായി സിനിമ കാണുന്നതിനു സൗകര്യം ഒരുക്കിയിട്ടുണ്ട്. കുട്ടികള്‍ക്കും മുതിര്‍ന്നവര്‍ക്കും ഈ അവസരം പ്രയോജനപ്പെടുത്താമെന്നു സംഘാടകര്‍ അറിയിച്ചു.

കൈരളി
മദര്‍ ഐ ലവ് യു (9.00), ചുസ്‌കിറ്റ് (11.00), ദ റെയിന്‍ബോ ട്രൂപ്പ്‌സ് (6.30)
ശ്രീ
അപ്പുവിന്റെ സത്യാന്വേഷണം (9.30), ഗ്രേവ് ഓഫ് ഫയര്‍ഫ്‌ളൈ (11.30), വാങ്ഡാര്‍ക്ക്‌സ് റെയിന്‍ബൂട്ട്‌സ് (6.30)
നിള
ബട്ടര്‍ഫ്‌ലൈ (9.15), മദര്‍ ബേഡ് (11.15), നോണ്‍സെന്‍സ് (6.30)
ടഗോര്‍
എലിസബത്ത് ഏകാദശി (9.30), ഏവന്‍ മോര്‍ ആനിമേഷന്‍ ഫോര്‍ കിഡ്‌സ് (11.30), മോഡേണ്‍ ടൈംസ് (6.30)
കലാഭവന്‍
ഹമീദ് (8.45), മേരി ആന്‍ഡ് ദ വിച്ചസ് ഫ്‌ലവര്‍ (11.00), വീ ആര്‍ ഫാമിലി (4.00)