ഇന്ത്യന്‍ പ്രധാനമന്ത്രി നരേന്ദ്രമോഡിയുടെ പല കാര്യങ്ങളും കോണ്‍ഗ്രസ് അധ്യക്ഷന്‍ രാഹുല്‍ഗാന്ധിക്ക് കൗതുകമാണ്. അത് പലപ്പോഴും രാഹുല്‍ തുറന്ന് പറയാറുമുണ്ട്. ഇപ്പോള്‍ ഏവരേയും അത്ഭുതപ്പെടുത്തിക്കൊണ്ടുള്ള മോഡിയുടെ തെരഞ്ഞെടുപ്പ് പ്രചാരണമാണ് ചര്‍ച്ചയാകുന്നത്. പ്രചരണ കാര്യത്തിലും മോഡി അങ്ങനെ രാഹുലിനെ ബഹുദൂരം പിന്നിലാക്കി.

ലോക്‌സഭാ തിരഞ്ഞെടുപ്പ് പ്രചാരണത്തിനായി പ്രധാനമന്ത്രി നരേന്ദ്ര മോദി 1.5 ലക്ഷം കിലോമീറ്റര്‍ ആകാശ യാത്ര നടത്തിയെന്നും 142 റാലികളില്‍ പങ്കെടുത്തെന്നും ബിജെപി അധ്യക്ഷന്‍ അമിത് ഷാ തന്നെയാണ് വെളിപ്പെടുത്തുന്നത്. ഏറ്റവും വിപുലമായ പ്രചാരണമാണ് പാര്‍ട്ടി ഇത്തവണ നടത്തിയതെന്നും മോദിക്കൊപ്പം കഴിഞ്ഞ ദിവസം നടത്തിയ വാര്‍ത്താസമ്മേളനത്തില്‍ അമിത് ഷാ പറഞ്ഞു.

46 ഡിഗ്രി സെല്‍ഷ്യസ് വരെ ഉയര്‍ന്ന അസഹനീയമായ ചൂടിനെ നേരിട്ടായിരുന്നു പ്രധാനമന്ത്രിയുടെ പ്രചാരണം. ഫെബ്രുവരി മുതല്‍ മേയ് വരെയുള്ള തിരഞ്ഞെടുപ്പ് പ്രചാരണ കാലയളവില്‍ മോദി സന്ദര്‍ശിക്കാത്ത ഒരു സ്ഥലം പോലും രാജ്യത്തില്ലെന്നും അമിത് ഷാ പറഞ്ഞു.

മാര്‍ച്ച് 10നാണ് തിരഞ്ഞെടുപ്പ് തിയതി പ്രഖ്യാപിച്ചത്. മാര്‍ച്ച് 28ന് മീററ്റിലായിരുന്നു മോദിയുടെ പ്രചാരണ പരിപാടികള്‍ക്ക് തുടക്കം കുറിച്ചത്. 142 റാലികളും നാല് റോഡ് ഷോകളും നടത്തി. ഈ റാലികളില്‍ ഒന്നര കോടി ജനങ്ങളെ അദ്ദേഹം നേരിട്ട് അഭിസംബോധന ചെയ്തു. 

പ്രചാരണത്തിനായി 312 ലോക്‌സഭാ മണ്ഡലങ്ങളില്‍ താന്‍ സന്ദര്‍ശിച്ചെന്നും 161 റാലികളിലും 18 റോഡ് ഷോകളിലും പങ്കെടുത്തെന്നും അമിത് ഷാ അവകാശപ്പെട്ടു. 

സമൂഹത്തിന്റെ എല്ലാ മേഖലകളിലും സ്പര്‍ശിച്ചുള്ള വളരെ വിജയകരമായ പ്രചാരണമായിരുന്നു ബിജെപിയുടേത്. ഭൂരിപക്ഷത്തോടെ അധികാരം നിലനിര്‍ത്തുമെന്നകാര്യത്തില്‍ തികഞ്ഞ ആത്മവിശ്വാസമുണ്ടെന്നും ഷാ പറഞ്ഞു.
അതേസമയം ഭരണത്തിലേറി അഞ്ചുവര്‍ഷം കഴിയാറാകവേ ആദ്യമായി പങ്കെടുത്ത പത്രസമ്മേളനത്തിലും പ്രധാനമന്ത്രി നരേന്ദ്രമോദി മാധ്യമപ്രവര്‍ത്തകരുടെ ചോദ്യങ്ങള്‍ക്കു മറുപടി നല്‍കിയില്ല. ചോദ്യമുന്നയിച്ച മാധ്യമപ്രവര്‍ത്തകരോട് പാര്‍ട്ടിയധ്യക്ഷന്‍ മറുപടി നല്‍കുമെന്നു പറഞ്ഞ് അദ്ദേഹം ഒഴിഞ്ഞുമാറി. അമിത് ഷായാണ് ചോദ്യങ്ങള്‍ക്കു മറുപടി നല്‍കിയത്.

വ്യാഴാഴ്ചത്തെ ബി.ജെ.പി.യുടെ ഔദ്യോഗിക അറിയിപ്പുപ്രകാരം പാര്‍ട്ടി ദേശീയാസ്ഥാനത്തെ ഹാളില്‍ വെള്ളിയാഴ്ച വൈകീട്ട് 3.45ന് അമിത് ഷായുടെ പത്രസമ്മേളനമാണ് നടക്കേണ്ടിയിരുന്നത്. ഷായ്‌ക്കൊപ്പം പ്രധാനമന്ത്രിയുമുണ്ടാകുമെന്ന് വെള്ളിയാഴ്ച രണ്ടുവരെ അറിയിപ്പുണ്ടായിരുന്നില്ല. പാര്‍ട്ടിയാസ്ഥാനത്ത് കൂടുതല്‍ സുരക്ഷാ സംവിധാനങ്ങള്‍കണ്ട് മാധ്യമപ്രവര്‍ത്തകര്‍ അന്വേഷിച്ചപ്പോഴാണ് നരേന്ദ്രമോദിയും പങ്കെടുക്കുന്നുവെന്നറിഞ്ഞത്. തുടര്‍ന്ന് അമിത് ഷായ്‌ക്കൊപ്പം 4.20ന് പ്രധാനമന്ത്രി വേദിയിലെത്തി.

ഷായുടെ ആമുഖത്തിനുശേഷമാണ് മോദി സംസാരിച്ചത്. പാര്‍ട്ടിയാസ്ഥാനത്തെ പത്രസമ്മേളനവേദിയില്‍ ആദ്യമായാണ് എത്തുന്നതെന്ന് അദ്ദേഹം പറഞ്ഞു. മധ്യപ്രദേശിലെ റാലിയില്‍ പങ്കെടുത്തതിനുശേഷം നേരിട്ട് ഇവിടെയെത്തിയിരിക്കുകയാണെന്നും പറഞ്ഞു.

പ്രധാനമന്ത്രിയുടെ പ്രസംഗത്തിനുശേഷമായിരുന്നു ചോദ്യോത്തരവേള. പ്രധാനമന്ത്രിയോട് ചോദ്യമുയര്‍ന്നപ്പോള്‍, അധ്യക്ഷന്‍ മറുപടിപറയുമെന്ന് അദ്ദേഹം അറിയിച്ചു. 'ഞങ്ങളുടേത് അച്ചടക്കമുള്ള പാര്‍ട്ടിയാണ്. പാര്‍ട്ടിയധ്യക്ഷനാണ് സംസാരിക്കുക. അധ്യക്ഷന്റെമുന്നില്‍ മറ്റാരും സംസാരിക്കാറില്ല. ഞങ്ങള്‍ പാര്‍ട്ടിയുടെ അച്ചടക്കമുള്ള പ്രവര്‍ത്തകരാണ്. ചോദ്യങ്ങള്‍ക്ക് അധ്യക്ഷന്‍ മറുപടിപറയും' മോദി ചിരിയോടെ പ്രതികരിച്ചു. തുടര്‍ന്ന്, പ്രധാനമന്ത്രിയോടുള്ള ചോദ്യത്തിന് ഷാ മറുപടിനല്‍കി. പിന്നീട് ഷായോടായിരുന്നു ചോദ്യങ്ങള്‍.