ആനക്കൊമ്പ് കൈവശം വെച്ച കേസില് നടന് മോഹന്ലാലിന് വേണ്ടി ഹൈക്കോടതിയില് സുപ്രീംകോടതി ചീഫ് ജസ്റ്റിസ് രഞ്ജന് ഗോഗോയിയുടെ മകള് രാഷ്നി ഗോഗോയി ഇന്ന് ഹാജരായി
ആനക്കൊമ്പ് കൈവശം വെച്ച കേസില് നടന് മോഹന്ലാലിന് വേണ്ടി ഹൈക്കോടതിയില് സുപ്രീംകോടതി ചീഫ് ജസ്റ്റിസ് രഞ്ജന് ഗോഗോയിയുടെ മകള് രാഷ്നി ഗോഗോയി ഇന്ന് ഹാജരായി. കേസ് നമ്പര് 306 ആണ്. മോഹന്ലാലിനെതിരെ കുറ്റം നിലനില്ക്കുമെന്ന് കഴിഞ്ഞ ഏപ്രിലില് ഹൈക്കോടതി ചീഫ് ജസ്റ്റീസ് അധ്യക്ഷനായ ബഞ്ച് നിരീക്ഷിച്ചിരുന്നു. ആനക്കൊമ്പ് സുക്ഷിക്കാന് മോഹന്ലാലിന് മുന്കൂര് അനുമതി ഉണ്ടായിരുന്നില്ലെന്നെന്നും കോടതി പറഞ്ഞിരുന്നു. ആലുവ സ്വദേശി എ.എ.പൗലോസ് സമര്പ്പിച്ച പൊതുതാല്പ്പര്യ ഹര്ജി പരിഗണിക്കുന്നതിനിടെയാണ് കോടതി ഇക്കാര്യങ്ങള് പറഞ്ഞത്. ഇന്ന് കേസ് വീണ്ടും പരിഗണിക്കുകയാണ്.
മോഹന്ലാലിനെതിരെ പ്രഥമദൃഷ്ട്യാ കുറ്റം നിലനില്ക്കുമെന്ന് കോടതി കണ്ടെത്തിയിരുന്നു. വനംവന്യജീവി നിയമത്തിലെ സെക്ഷന് 31 ലംഘിച്ചാണ് താരം ആനക്കൊമ്പ് കൈവശം വെച്ചതെന്നും ഹോക്കോടതി നിരീക്ഷിച്ചിരുന്നു. മോഹന്ലാലിന്റെ വീട്ടില് നിന്ന് ആനക്കൊമ്പുകള് കണ്ടെത്തിയ ശേഷം വനംവകുപ്പ് കേസ് എടുത്തിരുന്നു. അതിന് ശേഷം ആനക്കൊമ്പ് കൈവശം വെക്കാന് മുഖ്യവനപാലകന് സാധുത സര്ട്ടിഫിക്കറ്റ് നല്കിയതിനെ കുറിച്ച് വനംവകുപ്പ് വിശദീകരണം നല്കണമെന്നും കോടതി പറഞ്ഞിരുന്നു. ആനക്കൊമ്പ് പിടിച്ചെടുക്കുമ്പോള് കുറ്റകൃത്യം നടന്നിരുന്നില്ലേ? അതിന് ശേഷം നിയമ സാധുത എങ്ങനെ നല്കാനാവുമെന്നും കോടതി ചോദിച്ചിരുന്നു.
ആനക്കൊമ്പ് കൈവശം വെക്കാനുള്ള അനുമതി റദ്ദാക്കണമെന്നാണ് ഹര്ജിക്കാരന് ആവശ്യപ്പെടുന്നത്. അനധികൃതമായി ആനക്കൊമ്പ് കൈവശം വെച്ചാല് മൂന്ന് വര്ഷത്തില് കുറയാത്ത ശിക്ഷ ലഭിക്കാം. 2012 ജൂണിലാണ് മോഹന് ലാലിന്റെ തേവരയിലുള്ള വീട്ടില് നിന്ന് ആദായ നികുതി വകുപ്പ് നാല് ആനക്കൊമ്പുകള് കണ്ടെത്തിയത്. രഹസ്യ വിവരത്തെ തുടര്ന്നായിരുന്നു പരിശോധന. കെ. കൃഷ്ണകുമാര് എന്ന വ്യക്തിയില് നിന്നും 65,000 രൂപ കൊടുത്ത് വര്ഷങ്ങള്ക്ക് മുമ്പ് ആനക്കൊമ്പ് വാങ്ങിയെന്നായിരുന്നു താരത്തിന്റെ വിശദീകരണം. വനംവന്യജീവി നിയമപ്രകാരം ആനക്കൊമ്പുകള് സൂക്ഷിക്കുന്നതിന് ലൈസന്സ് വേണം. മോഹന്ലാല് മറ്റ് രണ്ട് പേരുടെ ലൈസന്സ് ഉപയോഗിച്ചാണ് കൊമ്പുകള് സൂക്ഷിച്ചിരുന്നത്. ഇക്കാര്യം ആദായനികുതി വകുപ്പ് കണ്ടെത്തിയിരുന്നു.
കോടനാട് ഫോറസ്റ്റ് അധികൃതര് കേസെടുത്തെങ്കിലും ഉന്നത ഇടപെടല് കാരണം പിന്നീട് റദ്ദാക്കി. പിന്നാലെ നിലവിലെ നിയമം പരിഷ്കരിച്ച് മോഹന്ലാലിന് ആനക്കൊമ്പുകള് കൈവശം വെയ്ക്കാന് സര്ക്കാര് അനുമതി നല്കി. മുന്മന്ത്രി തിരുവഞ്ചൂര് രാധാകൃഷ്ണന്റെ നിര്ദ്ദേശം അനുസരിച്ചായിരുന്നു ഇത്. ആ സമയത്താണ് മലയാറ്റൂര് ഡി.എഫ്.ഒ മോഹന്ലാലിന്റെ കൈവശമുള്ളത് യഥാര്ത്ഥ ആനക്കൊമ്പുകളാണെന്ന് റിപ്പോര്ട്ട് നല്കിയത്. തുടര്ന്നാണ് ഏലൂര് അന്തിക്കാട് വീട്ടില് എ എ പൗലോസ് ഹര്ജി നല്കിയത്.
മുന് വനംമന്ത്രി തിരുവഞ്ചൂര് രാധാകൃഷ്ണനെ ഒന്നാം പ്രതിയായും മോഹന്ലാലിനെ ഏഴാം പ്രതിയുമായി പത്ത് പേര്ക്കെതിരെ അഴിമതി നിരോധന നിയമ പ്രകാരം കേസെടുക്കണം എന്നാണ് ഹര്ജിക്കാരന്റെ ആവശ്യം. മുന് വനംവകുപ്പ് സെക്രട്ടറി മാരപാണ്ഡ്യന്, മലയാറ്റൂര് ഡിഎഫ്ഒ, കോടനാട് റെയ്ഞ്ച് ഓഫീസര് ഐ.പി.സനല്, സിറ്റി പോലീസ് കമ്മീഷണറായിരുന്ന കെ.പത്മകുമാര്, തൃക്കാക്കര അസി.പോലീസ് കമ്മീഷണര് ബിജോ അലക്സാണ്ടര്, തൃശൂര് സ്വദേശി പി.എന്.കൃഷ്ണകുമാര്, തൃപ്പൂണിത്തുറ സ്വദേശി കെ.കൃഷ്ണകുമാര്, കൊച്ചി രാജകുടുംബാംഗം ചെന്നൈ സ്വദേശിനി നളിനി രാമകൃഷ്ണന് എന്നിവരാണ് മറ്റ് പ്രതികള്.
https://www.facebook.com/Malayalivartha
